Versets bíblics populars de Jo Kolocai 3

Comparteix

Wudi cwinywu kekenwu, ŋat acel acel odi cwinye i kom lawote, kun wutimo kica ki luwotwu i kinwu kekenwu pi balwu. Ka ŋat mo i kinwu tye ki lok mo i kom lawote, timo kica pi bal myero obed tye macalo Rwot bene ceŋ otimowu kica.

Wuket cwinywu i kom jami ma tye malo i polo ento pe i kom jami me lobo.

Tic mo keken ma wutiyo, wuti maber ki cwinywu ducu, macalo wutiyo bot Rwot, ento pe pi dano.

Ento wun aye jo ma Lubaŋa doŋ oyero, jo maleŋ ma Lubaŋa maro; pi meno myero doŋ wuruk cwiny ma miyo wuparo pi can pa luwotwu, wubed ki kica, mwolo, woro ki diyo cwiny.

Wuwek lok pa Kricito obed i iwu mulony, ka wupwonnye, kun wujukke bene kekenwu ki ryeko ducu ma Lubaŋa omiyowu. Dok bene ka wuwero jabuli, wer me pako Lubaŋa ki wer mogo mukene me dini, wuwer bot Lubaŋa ki pwoc i cwinywu. Gin ducu ma wutiyo, kadi ki i lok nyo i tic mogo, wutigi i nyiŋ Rwot Yecu, kun wumiyo pwoc bot Lubaŋa Won wok ki bote.

Ento makato magi ducu, myero wubed kun wupoŋ ki mar. Pien mar keken aye tweyo jami ducu, ribogi kacel ma cobo bene maber licwic.

Macalo yam doŋ wucer kacel ki Kricito, wuket cwinywu doŋ i kom jami ma tye malo, ka ma Kricito tye iye i kabedo me deyo i ŋet Lubaŋa tuŋ acuc.

Wuwek kuc pa Kricito ma yam olwoŋowu i kom acel aye olo cwinywu, ka wek doŋ wubed jo ma miyo pwoc kare ducu.

Pi meno myero doŋ wunek gin ducu me lobo ma tye i iwu, ma gin aye abor, caro, mit me kom, ki par marac ma kelo lewic, ki woro me jami ma rom ki woro jogi.

Pien yam wuto woko, ento kombeddi doŋ gikano kwowu kacel ki Kricito bot Lubaŋa.

Ento kombeddi myero doŋ wubwotgi woko ducu: kiniga, kwar cwiny, raccwiny, yet, ki loko lok mogo me lewic ma pe myero giwiny ka katti ki i dogwu.

Pe myero wubwolle kekenwu, pien doŋ wubwoto kwowu macon ki ticce ducu, ci doŋ wuruko dano manyen ma Lacwec tye ka rocone i ŋec manyen me dwoko i calle kikome.

Wun co bene, wumar monwu, pe wubed ki gero i komgi.

Wun litino, wuwiny lunyodowu i lok ducu, pien meno aye yomo cwiny Rwot.

Wun mon, wumine kenwu i te loc pa cogwu, pien meno aye gin ma myero i kin jo ma tye i Rwot.