Versets bíblics populars de 2 Kuruntus 4

Comparteix

Wa ma nukhuttu baalna fi cheyy al-binchaaf. Nukhuttu baalna fi cheyy al-ma binchaaf. Achaan al-binchaaf yikammil wa laakin al-ma binchaaf yagood ila l-abad.

Achaan da abadan ma naksalo. Sahiih, jisimna gaaʼid yumuut wa laakin al-haya al-jadiide gaaʼide tiziid fi guluubna kulli yoom. Wa l-taʼab al-indina hassaʼ da, hu khafiif wa ma yitawwil. Laakin al-taʼab da yijahhizna le l-majd al-aziim al-abadan ma yikammil.

Aniina yidaayuguuna fi ayyi bakaan laakin ma yiwaggufuuna. Wa aniina mutahayyiriin laakin ma waddarna al-acham. Wa l-naas yitaʼʼubuuna laakin Allah ma yikhalliina. Yarmuuna laakin ma yidammuruuna.

Wa l-baraka al-indina di misil dahab saafi al-gaaʼid fi maaʼuun hana tiine. Wa da yiwassif kadar al-gudra al-ajiibe al-nakhdumu beeha, hi min Allah bas wa ma minnina aniina.

Al-naas al-ma muʼminiin dool guluubhum amyaaniin achaan Ibliis indah sulta fi l-dunya di wa hu amaahum. Hu yidoor yadharhum ma yichiifu al-nuur al-majiid hana l-Masiih al-niballukhu beyah al-bichaara. Al-Masiih hu suurat Allah.

Wa zamaan Allah gaal : «Khalli al-nuur yidawwi fi ust al-dalaam.» Wa hu bas al-nawwar guluubna achaan naʼarfu nuur Allah al-majiid al-gaaʼid fi wijih Isa al-Masiih.