Versets bíblics populars de Romans 3

Comparteix

လူမှန်သမျှသည် အပြစ်ဒုစရိုက် ကျူးလွန်သူများဖြစ်ကြ၍ ဘုရားရှင်၏ရှေ့တော်မှောက်မှ ဝေးကွာစွာနေရကြ၏။ လူတို့အား အပြစ်မှလွတ်မြောက်စေတော်မူသော ခရစ်တော်ယေရှုကို အကြောင်းပြု၍ ဘုရားရှင်သည် အခမဲ့ ဂုဏ်ကျေးဇူးတော်အားဖြင့် လူတို့အားမိမိနှင့်မှန်ကန်စွာ ဆက်ဆံစေတော်မူ၏။

လူတို့အား ဘုရားရှင်နှင့် မှန်ကန်စွာ ဆက်ဆံနိုင်စေသည့်‌ နည်းလမ်းမှာ ယေရှုခရစ်တော်အား ယုံကြည်ခြင်းပင်ဖြစ်သည်။ လူတို့သည်ခြားနားခြင်းမရှိကြပေ။

ခရစ်တော်ယေရှု၏ အသေခံတော်မူခြင်းအားဖြင့် လူတို့သည် အပြစ်များမှပြေလွတ်နိုင်ကြစေရန် ဘုရားရှင်သည် ထိုအရှင်ကို ပူဇော်သက္ကာအဖြစ် သတ်မှတ်တော်မူ၏။ လူတို့သည် ခရစ်တော်ယေရှုကို ယုံကြည်ကြခြင်းဖြင့် အပြစ်များမှ ပြေလွတ်ခြင်းကို ခံစားကြရ၏။ ဘုရားရှင်သည် ခရစ်တော်ယေရှုကို ပူဇော်သက္ကာအဖြစ် သတ်မှတ်ခြင်းမှာ ကိုယ်တော်သည် ဖြောင့်မတ်တော်မူသော အရှင်ဖြစ်ကြောင်းကို ပြသရန်ဖြစ်သည်။ ယခုခေတ်ကာလအထိတိုင် ဘုရားရှင်သည် စိတ်ရှည်သည်းခံတော်မူပြီးလျှင် လူတို့ကျူးလွန်ခဲ့ကြသည့် အပြစ်များကို အရေးယူတော်မူခြင်း မရှိခဲ့ပေ။ သို့ရာတွင် ယခုခေတ်ကာလ၌ ကိုယ်တော်သည် မိမိ၏ ဖြောင့်မတ်ခြင်းကို ပြသရန်အတွက် လူတို့၏အပြစ်များကို အရေးယူတော်မူ၏။ ဤနည်းအားဖြင့် ဘုရားရှင်သည် မိမိကိုယ်တိုင်ပင် ဖြောင့်မတ်သော အရှင်ဖြစ်တော်မူကြောင်းကိုလည်းကောင်း၊ ကိုယ်တော်ယေရှုအား ယုံကြည်သူအပေါင်းတို့ကို မိမိနှင့်မှန်ကန်စွာ ဆက်ဆံစေတော်မူကြောင်းကိုလည်းကောင်း ဖော်ပြတော်မူ၏။

ပညတ်တရား၏ ပြဌာန်းချက်များကို စောင့်ထိန်းခြင်းအားဖြင့် မည်သူကမျှ ဘုရားရှင်နှင့် မှန်ကန်စွာ မဆက်ဆံနိုင်ကြပေ။ ပညတ်တရား၏ဆောင်ရွက်ချက်မှာ လူတို့အား မိမိတို့သည်အပြစ်ကျူးလွန်သူများ ဖြစ်ကြောင်းကို သိရှိလာစေရန်ပင်ဖြစ်၏။

ကျမ်းစာတော်တွင်၊ "ဖြောင့်မတ်သူဟူ၍ တစ်ယောက်မျှမရှိ။ ပညာရှိသူဟူ၍ မရှိ၊ ဘုရားရှင်ကို ကိုးကွယ်သူတစ်ယောက်မျှမရှိ။ လူအပေါင်းတို့သည် ကိုယ်တော်ကိုကျောခိုင်းကြပြီး ထွက်သွားကြလေပြီဖြစ်၏။ သူတို့အားလုံးသည် လမ်းလွဲကြလေပြီဖြစ်၏။ အမှန်တရားကို ပြုကျင့်သူဟူ၍ တစ်ယောက်မျှမရှိပေ။

ယုံကြည်ခြင်းအားဖြင့်သာလျှင် ကိုယ်တော်နှင့် မှန်ကန်စွာဆက်ဆံခွင့် ရရှိနိုင်ကြောင်းနှင့် ပညတ်တရားကို ကျင့်သုံးခြင်းအားဖြင့် မရရှိနိုင်ကြောင်းကို ငါတို့ ယခုသိကြပြီဖြစ်သည်။

မည်သည့်နည်းနှင့်မျှ ဤသို့မဆိုနိုင်ပေ။ လူတိုင်းကပင် လိမ်လည်ကြစေကာမူ ဘုရားရှင်သည်ကား ကတိသစ္စာ တည်တော်မူမည်သာဖြစ်၏။ ကျမ်းစာတော်က၊ "ကိုယ်တော် မိန့်တော်မူသောစကားသည် မှန်ကန်ရမည်။ တရားရင်ဆိုင်တော်မူရလျှင်လည်း ကိုယ်တော်သာလျှင် အနိုင်ရမည်" ဟုဖော်ပြသည့်အတိုင်းပင်ဖြစ်၏။