Versets bíblics populars de Roamanz 3

Evribadi don sin, ahn notn noh deh weh gud nof fi dehn du fi meja op tu Gaad gloari. Bot Gaad shoa wi ih grays fi mek evriting rait bitween hihn ahn aal di peepl dehn. Hihn du dis wen Krais Jeezas bai aal di peepl dehn wid ih blod fi mek dehn free fahn sin.

Gaad mek evriting rait bitween ihself ahn peepl if dehn bileev eena Jeezas Krais. Gaad du dat fi aal di peepl dehn weh bileev eena Jeezas, fi di Jooz dehn ahn fi dehn peepl weh da noh Joo, kaa no difrens noh deh bitween dehn.

Gaad sen Jeezas fi sakrifais ih laif eena fi wee plays, ahn wen Jeezas ded fi fi wee sin, dat da how Gaad fagiv peepl dehn sin wen dehn bileev eena hihn. Eena dis way Gaad shoa dat hihn du weh rait aal di taim. Op til now hihn mi-di put op wid peepl sin. Hihn du dat fi shoa dat hihn raichos ahn dat hihn aalwayz du weh rait. Gaad wahn mek evriting rait bitween hihn ahn aala dehn wan weh bileev dat Jeezas don ded eena fi dehn plays.

Soh eevn if wahn persn du weh di Laa seh fi du, dat noh wahn mek dehn rait eena Gaad sait. Insteda dat, di Laa da fi mek peepl kanchos dat dehn sin.

Da jos laik weh rait dong eena di Skripcha, “Nobadi noh rait eena Gaad sait, noh eevn wan persn. Nobadi noh andastan. Nobadi noh di luk fi Gaad. Evribadi don ton dehn bak pahn Gaad. Non a dehn noh wot notn. Nobadi noh deh weh di du di rait ting, noh eevn wan.”

Soh den, wi noa dat evriting rait bitween wee ahn Gaad kaa wee bileev. Da noh kaa wi du weh di Laa tel wi fi du.

Neva! Gaad wahn kip fi hihn werd dehn eevn if evribadi els di lai. Da jos laik weh di Skripcha seh, “Gaad, evri taim yoo taak, peepl wahn si seh dat yoo rait. Ahn wen yoo joj, yoo wahn win di vikchri.”