Versets bíblics populars de प्रेरीत् 14

Comparteix

“नीङ्इ दोह् हायःसा बोङःतेःनानाङ्‌स। नीचीमा नीङ्‌लो लेखा मान्‍ता लेःआः ङच द्यव्‌तापाय् खेःङचल बा। ‘इ आह्रे मनःओ थोक्‌लम् फेती ओउः जीङः नाःओ फेल्‌बाङ् ल्‍हाव्‍ह्‌दैबाङ्‌मा साः तीःमा ओहाङः मुओलम्‌कायःमा जाङ्‌ह्ओ परमेस्‍वर्‌कायः झाह्‌ती फुस्‌ती तोनु’ त दाय्‍ह्‌ती इ पेओ समचार्‌ तोलाङ् वाङ्ओआः ङच बा।

ओउः क्‍ल्‍योय्ओ मान्‍ताइपाय् पावुल्इ तोती स्‍यान्ओ कुरा सायःती मुतोक्‌हाङः ओउःकायः पावुल्इ जुर्‌ती योती “ङाइ तोओ कुरापाय् ङ्‌हाम्‌ती झ्‍यान्‍ते ओउःकायः स्‍याक्‌ताक्‌सा खाय्‌लेःनाङः” त चीःती झ्‍यान्‍ते “लौ दोम् सोल्‍ह्‌ती चीङ्अ” त दाय्‍ह्‌ती पावुल्इ सोतोलेः तोउती ती ओउः मान्‍ता क्र्योन्‌योक्‌त चीङ्‌ती वाह्‌माआ।

ओउः सहर्‌लम्‌हाङःमा ङ्‌हाम्ओ मान्‍तालम्‌कःहाङः ओउःनीस्इ यात् नीस्‌चाक् छीङ्‌ह्‌ती अरुलम्‌कायः स्‍यान्‌साकायःमा हुकुम् बयःसाकायःमा “लौ इहाङःकोः ङ्‌हाम्ओलम्‌कोः थालवःपा स्‍याव्‌तेःपै” त दाय्‍ह्‌ती गम्आकाचु। छीङ्‌ह्‌ती गम्‌तोक् बेलाहाङः ओउःमयः पावुल् बर्‌नाबास्‌कुस् उपाङ् काःती “लौ प्रभुय इ मान्‍तालम्इ नाङ्‌कोः कुरा पेतोलेः ङ्‌हाम्‌नानी बा। ओउःमयःकायः काम् पेतो जाङ्‌ह्‌ताक्‌पाःथास दै” त दाय्‍ह्‌ती ओउःनीस्इ परमेस्‍वर्‌कायः तेती तोआकाचु।