Versets bíblics populars de Rɔm 16

Comparteix

Baa mɨnde gɨ Kumu gɨ ba-bee gusi-dɔbɛ kɨya rade cay Sidan a te tɨbayigɨŋ dɨŋ dugo. Kuɗa gɨ ɗarwa di da Ba-gulondɨna Jesu baa danagɨŋ.

Ay karmɨnɨ ga ban̰aŋ dan̰ ga kandɨ, aŋ halgɨŋ cay hɨnga ga pɨna. Ɗagɨŋ muɗɔlɛ a cay gusɨgɨŋ gɨŋ, a cay kalaŋ ga ka-gɨlgɨŋ hɨnga ga woy kan̰dɨge dan̰ hɨnga ga ni gɨle ga kɨŋ ba je tumɔ. Kalaŋ ga nee le, na ka-pɔyɛ ka-aye kudurɔ duroy nee bɨ, ka-dɨbe sɨya tumon̰ ka-aye kudurɔ bɨ. Dɨragɨŋ gusɨgɨŋ sɛdɨ gusɨge coŋ.

Na cɨndi, kalaŋ ga nee le, laage gɨye bɨn̰ na Ba-gulondɨna Kɨris naŋ, ama leege gɨye bɨn̰ na kuduroyge ƴɔbɨ. Kalaŋ ga hɨnga-sɔlɛ kage baa gɨyəŋ le, kan nadɨrdɨge dan̰ kɔl ga mɔɔ bɨ, ga ni narɨn̰ cɨn̰-kɨɗɨn̰ bɨ.

Gusoŋ-tɔgɛ na gɨ da Kumu! Kɨya wa Kumu ɓal lɔɔ gɨ kɨŋ na ɨrɨn̰ usa a te aye kudurɔ gɨŋ hɨn̰ gɨ Kɔl-gɨ-Ɗari gɨ da Jesu-Kɨris gɨ ɨŋ ba tee bɛrnɛdi ba ye wo̰. Hɨnga ga ungo sɨla naŋ ga woy kɨɗɨn̰ wɔsɛdɨge gaŋ na jɨne ɓɨrag hage le, Kumu wasɨn̰ cayge lee gɨ kalaŋ solge dan̰ gɨyəŋ gɨ da Kɔl-gɨ-Ɗari gɨ kɛ le. Ama haw kɛ na, Kɔl-gɨ-Ɗari le woy a cɨn̰-tɨwa dɨŋ waŋ. Na toy di hɨn̰ wo̰ ma, kalaŋ nɔm ga toyge na Jubɨ naŋ le, solɨn̰ge Kɔl-gɨ-Ɗari gɨ da Kɨris dan̰ gɨyəŋ gɨ da Kɔl gɨ walge a duroy Magtubun̰əŋ di da ka-yɔɔ-kɔl-gɨ-Kumu-ba-yɔɔ gaŋ. Kumu gɨ ba-sɔmɛ dan̰ tumoyi ay te tumɔ di kɛ le hɨn̰ wo̰, ɗe kalaŋ nɔm na ayan̰ge kuduroyge bɨ, jan̰ge kɔl kɨbi bɨ. Gusoŋ-tɔgɛ na gɨ da Kumu, na ban pɨna hayi ƴɔbɨ ma na ba cɨn̰-muɗɔlɛ. Kuɗa gɨ kalaŋ dɨbɨ gusoŋ-tɔgɛ cayi dan̰ gɨyəŋ gɨ da Jesu-Kɨris ɨlge dan̰ ɨlge! Ɗa-ɗe-woy-hɨn̰-wo̰.