Versets bíblics populars de Kikia 20

Comparteix

Amo na ke kolo maama abam tei ne ye a chɛ de totoŋa konto dwoŋi to, a ke a bere abam we, dé jege se dé toŋe dé woli balo na ba dana to mo. Ta‑á guli-na dé Teiru Yezu na bere tei ye o we, ‘Nmo ná kwei woŋo n pa n dwoŋi, nmo wó jwoŋi ywoni ko dwoni n ná jwoŋi woŋo n dwoŋi tei ne.’ ”

Amo nam na boŋe tei to, a ba pae se a ŋwea taa jege nyɔɔre ka pa-ne. Kolo na ye wo-chɛɔ to mo ye se a toŋe totoŋa yalo dé Teiru Yezu na ke a jeŋa ne to a ti. Totoŋa yam konto mo ye se a kwaane a bere nɔɔna Wɛ kwor-ywoŋa kam de o na yɔɔre o ke nɔɔna zaane tei to.

Nam fɔge á ta‑á nii á tete baŋa ne dedaane kɔgɔ kolo maama Wɛ Sin-laao kom na kwei o ke abam jeŋa ne se á ta‑á nii to. Ta‑á nii-na Wɛ kɔgɔ kom baŋa ne, ne nayera na nii ba pei sem tei to. Wɛ tɔge o tete bu wom toone jana bam ŋwaane mo o pa se o kɔgɔ kom ji o tete nyem.

Amo laam lage a ke abam Wɛ jeŋa ne. Wɛ wó pa á tɔge chega kalo na tɔge o zaane dem ŋwaane to. Chega kam konto wó wane ka fɔge abam lanyerane, se á laam ba á tɔge de balo maama na ye Wɛ nyem to á na ywoni o tei ne.