Versets bíblics populars de 1 Korintios 12

Comparteix

Ïjïkobai gïr maakai Diuxi naana maaxi gubukarhigai saidi gïr soikïiña aatïmï aipakoga dai sai podukai gï maatïkana ix gïr ïmadï daja Diuxi Ibhïadï.

Go ñoki ix makïdï gïn aagidi aanï gïr tukugakïdï gobai ïr ïmo maaxidaragai ix dukatai aatabuayi aatïmï buaboitudadami. Suxi Kristo tukugadï dukami aatïmï tudu ïmo aadunumïkatai. Muidu aatïmï dai bïïxkatai aatïmï bïïna daraka Suxi Kristo. Ïpïan dukami aatïmï tutuidadï Suxi tukugadï.

Pomaaxi ïpï xïxkadï kokoakagi lïïchi tukugadï ïmo odami. Mai bhai taadakana bïïxi tukugadï aidï. Dai ix lïïchi gïr tukuga biakagi ïmo bhai ïrhiaragai maaxi aidï gia bïïxi gïr tukuga bhai gï ïrhidi. ¿Maiti ix ïr buaboi gobai?

Daiñi, Diuxi Ibhïadï mamaakai gubukarhigai ïïmoko sai gatïtïïgiada ñoki aagaitai tïgibudagai ix makïdï kïïga ïr soiñi. Dai jaa mamaakai ïgai gubukarhigai ix kïïga maatïkana dai aagaiña ixtumaxi Diuxi gïn tïtïgiadagi. Dai jaa mamaakai ïgai gubukarhigai saidi kïïga buaboitudaiña ïgai Diuxi bïïxi aïkatïrï. Dai jaa mamaakai ïgai gubukarhigai sai duduadaiña kokokoñiadï. Naana maaxi gubukarhigai bia buaboitudadami tudu dai Diuxi Ibhïadï ïgai dai maakai. Ïïmoko mamaakai ïgai gubukarhigai saidi ibuadana maaxidaragai ix makïdï odami maiti ixtutuidikïi xi ibuadagi. Dai jaa saidi ïr Diuxi ñokituldiadamikagi. Dai jaa maakai ïgai gubukarhigai sai maatï kaïkana ix bhai Diuxi Ibhïadïkïdï ñokai ïmo aatagadami. Dai jaa mamaakai ïgai gubukarhigai sai todian dukai bhaigakana ix ñokadagi ïmamaaxi ñokadami ñokidïkïdï ix makïdï tomarhi ïgai dai tomarhi go gaa ix makïdï ami daraka mai maatï kaï. Dai jaa mamaakai ïgai gubukarhigai sai aagaiña ix tïiya ïrhidi ñokidï go ïma maaxi ñokadami.

Arhi ïmaduga Diuxi Ibhïadï tudu dai gamaakai ïgai gubukarhigai xorai maakia ïrhiadagi ïgai.

Podui Diuxi sai ïmapi aatabuadagi gïr tukuga tutuidadï gïn soikïitai aipakoga.

Daiñi, Diuxi Ibhïadï ïjïkobai gïr maakai gubukarhigai aatïmï buaboitudadami saidi ibuadana aatïmï Diuxi aaduindadï. Dïï tomaxi naana maaxi gubukarhigai bia aatïmï bïïxkïrï mos ïmo ïmapïkïañdïrï daibïi gobai, Diuxi Ibhïadïañdïrï. Aatïmï buaboitudadami naana dukai ibuayi aaduindadï Diuxi dïï mos arhi ïmo Gïr Nukadakami bïïtarï aatabuayi aatïmï. Naana maaxi gubukarhigai bia aatïmï ïjïkobai tudu Diuxi aaduindadï bïïtarï dïï gia go gubukarhigai mai aipadïrï dibia. Mosïkaxi Diuxi ïgai dai gïr maakai gobai.

Daiñi, darai Diuxi naana maaxi gïr soikïdami gïr saagida. Ïpïgioma darai ïgai ix makïdï ïr ojotosadï Suxi Kristo. Dai gokiïrï darai ïgai jaa ix makïdï ïr Diuxi ñokituldiadamigadï. Dai bhodïrï darai ïgai mamaatïtuldiadami. Daidi maa ïgai gubukarhigai jaa saidi ibuadana ïgai maaxidaragai ix makïdï odami mai bhaiga ix ibuadagai. Dai jaa saidi duduadaiña kokokoñiadï. Dai jaa saidi naana maaxiïrï soikïiña go gaa. Dai jaa saidi ïr bhaitï gukakamikana. Dai jaa maa ïgai go gubukarhigai saidi todian dukai bhaigakagi ix ñokiagi ïma maaxi ñokikïdï.

Ka nïidi aatïmï tudu sai mai xu xi mosïkaxi ïmo ixtumaxi bia gïr tukuga. Naana maaxi tutuidadï bia gobai.

Daiñi, sïïrhikïdï tïgito aatïmï tutuidadï gïr tukuga ix makïdï bamioma mai gupuka maaxi.

Dai podukai ïpï xi ïmo bujikamudai bïïxi gïr tukuga xadïrï kaïkamudai aatïmï. Gï agai gïr naanaka ïpï di. Dai podukai ïpï ix ïr ïmo naakaikamudai bïïxi gïr tukuga aidï gia ¿Dukatai uubagiadamudai aatïmï ixtumaxi? Dïï maiti ïr podukai dai bhaiyoma Diuxi darai naana maaxi tutuidadï gïr tukugana ïïgi ix dukatai bhai ïrhi ïgai. Dai ix mos ïmo ixtumaxi biakamudai gïr tukuga aidï gia ka maiti ïr gïr tukugakamudai kïïgakïrï ¿Aba? Kaxkïdï tudu gï agai naana maaxi ix biakagi gïr tukuga.