Versets bíblics populars de Abharuumi 1

Comparteix

Eni nteekorighi chaasoni kuraghani Angʼana Anchömu iyo, gho kubha nibho obhotoro bho Ryobha bhuno bhoghotoori abhaato bhoose bhano bhakomokumi Yesu, korwera mo‑Bhayahuuti mbagha mo‑bhaato bha matöngö.

Angʼana Anchömu iyo nekwërëki haheero kinya bhuno Eryobha rekubharera abhaato kubha abhahëënë ambërë yaache. Abhaato mbakubhareru kubha abhahëënë ambërë e Ryobha gho nchëra e ghokumi okwene. N‑kinya bhuno Amandëkö Amatööbhiyu ghakobhugha kubha, “Uno anyi omuhëënë, nakumanya kwo bhokumi.”

Simoka e se, Eryobha ꞉ndiitëëmiri ebheghiro bhyose. Korwera eriibhagha riyo, abhaato mbaghotora korimënya Eryobha kebhuno reenyi, koru nangabha bhataakorerighi. Ebheghiro bhino ꞉riitëëmiri mbëköbhëërëki kubha Eryobha ndeenyi na changuru choose, wiiki kubha iryo niryo Eryobha eryene, retaanyi‑ho erende. Gho ghayo, abhaato bhataaghotora kobhugha kubha bhataryeche Eryobha.

Nangabha bharyeche Eryobha kinya reenyi, amare bhataakoreghongi koru koriitabheri kinya Eryobha reebho. Amiihëëbhö ghaabho ghaakabha amabhe, ghaghakundekeru ne ekengʼuuri.

Mbatighiri ghokumi obhuhëënë bho Ryobha, bhaghatambana obhuröngö. Mbaghusëngëra ebhetyenyi na kobhihökëri, amare mbatighiri ghusëngëra Waryobha Ghitëëmi uno arëngʼaaniire ghoghongibhu emiishe ghyose. Hawubhaabha.

Eryobha eryene ndëhëërëki haheero koru Mwishaaro kubha, ndehaarööna abhaato bhano bhakoryanga na ghuköra amabhe. Abhaato bhayo mbahaanga obhuhëënë bhooche, kurëngʼaana na amabhe ghaabho

Gho ghiri iyo, Eryobha ndebhatighiri bhabhe bharaköra amangʼana gha chaasoni kinya bhuno bhakwënda. Abhakari mbatighiri kuhökëri emebhere gheebho kinya bhuno bhatëëmuru, mbagharwire na ghoghihökëri bhuno etaakwëndëru. Hangʼu hangʼu abhasubhe bhoose, mbatighiri kuhökëri emebhere gheebho kinya bhuno bhatëëmuru, omosubhe no omukari. Abhasubhe mbaghwighombana abheene kwo bheene, mbaghuköra amangʼana gha chaasoni. Gho ghuköra hangʼu, ꞉mbiiyaahuriire abheene anchagho ino ekurëngʼaana na amaköri ghaabho amabhe. Mbe, gho kubha abhaato mbaangiri korimënya Eryobha, ryose ndebhatighiri bhabhe bharatambana amiihëëbhö ghaabho ghano ghakobharumeeri. Ibheere mbaghuköra amangʼana ghano ghataakurëngʼaanera ghuköru.

Mbakwihacha kubha nibho bhaanyi na amangʼiini, amare m‑bhaghëëghë. Mbatighiri korisëngëra Eryobha Eritööbhiyu rino reenyi‑ho emiishe ghyose, bhaghikareerera ghusëngëra chasanaamu che misambu chino chetuubhiine na abhaato bhano bhaaghoku, hamu chatyenyi, hamu ebhinyönyi hamu ebhetyenyi bhino bhekwingʼuurera chanda.