Versets bíblics populars de Jị'cavacdye' 6

Comparteix

Cạvi yụ, yiris nạijtyeꞌ yụ cavayo jaiꞌbaiꞌyaiꞌsiꞌ. Muꞌcheꞌ foquiꞌtyity "Sänꞌdyeꞌ" tịj muꞌ, judyeyaꞌ yoctyiꞌ dyiꞌvetaque, tịj muꞌsiꞌ "Säñitysiꞌ ĉärꞌtacdyedyes muꞌin," meꞌ buꞌyiꞌ mus tịj. Muꞌin soꞌmac ferdyeꞌ in paj qui daiꞌ ujacsi jacchety muntyiꞌ in, pạrej chutidyeꞌĉan ujatidyeij in, pạrej na dáquistum säñi in, pạrej japacjodyeꞌtum säñi in, judyeyaꞌ pạrej vajedyedyeij in. Anic daiꞌ jacchety muntyiꞌ meꞌ ujac in, araj chocyaꞌ quiꞌ jịjcaij säñi in.

Cạvi yụ, yiris vatyquej nạijtyeꞌ yụ cavayo jaiꞌbas. Muꞌcheꞌ foquiꞌtyity meꞌchuiꞌ yiris cọiꞌdyeꞌ, judyeyaꞌ soꞌmac ĉästacdyeꞌ chimeꞌ, muꞌ qui yụꞌtac jiꞌpenacsity. Chat qui sacti muꞌ jiꞌpenacsequi.

Chat qui muꞌ Oveca buꞌyity jäctyeꞌ mọꞌ ĉanamꞌyis cac̣htacdyeꞌ. Aty jäctyeꞌyaꞌ muꞌ, cạvi yụ mụijyaꞌ úĉan jiꞌcoꞌshayacdyeꞌĉan, vatyquej cạvacsebi yụ mọꞌĉan ạꞌedyeꞌ muꞌin voroꞌyedyedyes ijactyiꞌ jiquej in voroꞌyitysiꞌ jiquej in Jenꞌsiꞌ p̂eyacdyeꞌ muꞌ.

Muꞌin fer p̂eyaqui yi in: —Jenꞌ, mi ferdyeꞌtumtyiꞌ, judyeyaꞌ rụijtyity mi, jịꞌcätsety p̂eyacdyeꞌ mi. ¿Junꞌsiꞌ bu raꞌ jịꞌcäts yụꞌtacsim juchadyeꞌyaꞌ jacchety muntyiꞌ in paj qui soꞌmacsi vaꞌtacdyeꞌ mi muꞌin ijantyiꞌ tsun in? —yi jéte in. Chat qui muꞌ räj soꞌmacsi jaiꞌbaty coftyity muꞌin, judyeyaꞌ jéyacsi paj chum damꞌ tyumꞌchutidyeꞌtum bisaqui in, junꞌ quiꞌ chuc cạ̈tsiꞌ ijacdyety raꞌ muntyiꞌ in, voroꞌyedyedyes p̂eyacdyeꞌ Jenꞌsiꞌ muꞌ, ĉaĉaij na tacaꞌ raꞌ ijac pạrej muꞌin vojity muꞌin Jenꞌdyes carijtaquity in. Tacaꞌ jayej muꞌin ijactyiꞌ raꞌ in yojdyemꞌ muꞌin jiquej u in, mọꞌ raꞌ yejĉoij biseꞌ in, chat q̂uinꞌdyemꞌ raꞌ vaꞌtacdyeꞌ soꞌmac in muꞌin ijacsity in.

Meꞌĉandye yocsiꞌ jiꞌcavitiꞌ cavayo chäshes. Muꞌcheꞌ foquiꞌtyity soꞌmac ferdyeꞌ, muꞌ qui jäctyetacsi paj qui jam jämꞌjiti in jacchety muntyiꞌ in. Chat tiyacchuiꞌ chutidyeij in judyeyaꞌ ujatidyeij in. Muꞌ foquiꞌtyity chimeꞌdye muꞌ soꞌmac därsiꞌ coc̣hino chutidyes muꞌ.

A nash ayij tupudyeꞌ muꞌ, muꞌ raꞌ jịꞌcaveyacsi muntyiꞌ in fạ́codyeꞌ muꞌ. ¿Tyi buty raꞌ tupuj dyichjepte fạ́codyeꞌ muꞌ? ¡Jam jụꞌñity tupuj dyichjepte!

Muꞌ Oveca buꞌyity jäctyeꞌ mọꞌ jäbänyis cac̣htacdyeꞌ. Jäctyeꞌ mọmoꞌ meꞌĉandye bubaquiꞌ fer ọij jac muꞌ na tsun tyumꞌ tyeij, jeñej tsinꞌcuty quịꞌsiꞌ, joꞌmeij tyeij muꞌ tsun, mọꞌ na ịvaj chäsheiꞌ mọꞌ tyeiꞌ. Muꞌin na ọ́rotaꞌ in vetsetsej muꞌin tyeij jọꞌchaij in, jaccheꞌ tŝọij muꞌin in, yojdyemꞌ cätidyes väsh omꞌ tyiꞌmutyiꞌyaꞌ, meꞌ tyeij muꞌin ọ́rotaꞌ in.

Chat qui muꞌ Oveca buꞌyity jäctyeꞌ chibinyis cac̣htacdyeꞌ mọꞌ. Yụ seꞌvebiꞌ p̂eyacdyeꞌ mọꞌ chibinyis tsạꞌ buꞌyis, yiꞌ mọꞌ: —Atsiva. Yocsiꞌ cạveꞌ yụ cavayo tsinꞌcus. Muꞌ muꞌcheꞌ foquiꞌtyity unĉan muꞌ meꞌchuiꞌ yiris javquis tuputuquis. Chat qui yụ seꞌveꞌ yiris p̂eyacdyeꞌ, mọꞌinyaꞌ shupquiꞌ tsạꞌ buꞌyisyaꞌ in, yiꞌ mọꞌ p̂eyacdyeꞌ: —Jayej raꞌ säcsedyeꞌ, yiris mạyedyeꞌ carijtaqui tupuj yaꞌij yirity quiro trivo, jam jụijyaꞌ chibin quiro cebada, meꞌquiꞌ mọꞌ tupujtyeꞌ, mọꞌ qui namꞌ aseijte judyeyaꞌ vino paj jam bojviꞌ mọꞌsiꞌ yaꞌidyeꞌ mọꞌ.

Mọꞌ na mạyedyeꞌ tas mọꞌ itŝiꞌ tyeiꞌ, jeñejyiꞌ paper comonꞌtacsiꞌ, meꞌ tyeiꞌ. Muꞌin na mụcuꞌ in, räj muꞌin yocyaꞌ yụꞌtac in, meꞌdye chimeꞌ poc̣hoꞌ in. Räjenꞌ muntyiꞌ jacchety in tyumꞌ tyeij ĉojtyiꞌ muꞌin noiꞌyi in, judyeyaꞌ muꞌin ayoꞌbuꞌyity in, judyeyaꞌ muꞌin fer buꞌyity in, judyeyaꞌ väc̣häꞌtyitytyiꞌ ayoꞌ in, judyeyaꞌ muꞌin jedyeꞌtumtyiꞌ in, judyeyaꞌ úñity in judyeyaꞌ jam úñity in, räj muꞌin toꞌĉan jịjcaij jijmuꞌsiti in judyeyaꞌ mụcuꞌyatyyaꞌ mij, muꞌve jịjcaij jijmuꞌsiti in.