Versets bíblics populars de Galaciaĉantyidyes 5

Comparteix

Anic yocve carijtaquiꞌ Jenꞌsiꞌ Ạꞌedyeꞌ muꞌ, mọꞌ yiꞌ paj qui mạꞌjeyacsejaty bäꞌjaꞌ tsun, mọꞌ soꞌmisinꞌ maꞌjodyeꞌ judyeyaꞌ dyichyedyeꞌ, judyeyaꞌ chimeꞌ paj qui vaj meij jämꞌjitiĉaꞌ tsun judyeyaꞌ paj qui jämꞌjeyacsejaty bäꞌjaꞌ tsun judyeyaꞌ ñịbeꞌ ĉọcsejaꞌ chimeꞌ, judyeyaꞌ paj qui jịꞌcätsaĉaꞌ p̂eyacdyeꞌ tsun meꞌ jéyacsejaꞌ jụijyaꞌ. Chimeꞌdye yiꞌ paj qui jam vaꞌbunnaĉaꞌ, judyeyaꞌ paj qui jämꞌ ĉujcatiĉaꞌ chimeꞌ tsun. Itŝiꞌ mọꞌyaꞌ yụꞌtacdyeꞌ yiꞌ paj qui jam meꞌ bäꞌjaꞌ tsun.

Yụ raꞌ jéyac miꞌin: cäc̣häꞌchubimac Jenꞌsiꞌ Ạꞌedyeꞌ muꞌ, paj qui jam cäc̣häꞌchutiñeꞌ aꞌc̣his dyijyedyeꞌ aꞌsiꞌ miꞌin.

Mọꞌ qui namꞌ Jenꞌsiꞌ Ạꞌedyeꞌ muꞌ tsạꞌchusinꞌ tsun, jemoñeꞌ ĉụiꞌ jiꞌsäsdyiĉaꞌ paj qui mọꞌ bächäsinꞌ tsun.

Muꞌin Jesucristoty in aty jiꞌsänaqui in aꞌc̣his dyijyedyeꞌ ĉụiꞌsiꞌ muꞌin, räjtumdye aꞌc̣his mạꞌjeꞌsiꞌ in, croshcheꞌ jiquej jiꞌsänac aꞌc̣his dyijyedyeꞌ muꞌin.

Anic jorojĉan muꞌin bäꞌyi in aꞌsiꞌ aꞌc̣his dyijyedyeꞌ meꞌchuquity in, muꞌin ac̣hiꞌ bäꞌyi in, judyeyaꞌ voꞌvodyeꞌ dyijtuiꞌ in, tyiĉan ĉụiꞌ mọmoꞌ ĉọshiꞌ in. Pạrej jämꞌtacdyeꞌcheꞌ cudyiti in, judyeyaꞌ pạrej cọcojsiꞌnaqui in, judyeyaꞌ chimeꞌ vaj meij fáquitidyeij in, judyeyaꞌ doroiꞌjitidyeij in, jedyeꞌ ĉụiꞌ mọmoꞌ jiꞌfajquiyiti in, pạrej muꞌyaꞌ jam jaijve fạ́coij in, judyeyaꞌ yi in paj qui vaj meijti fáquiti yoctyiꞌ in, judyeyaꞌ yoc yoc dyijyi in. Pạrej jiꞌmeꞌtyiyitidyeij jedyeꞌ in, pạrej shuꞌqui in, pạrej feshtadyeꞌ dyijtuiꞌ in, joꞌmemes meꞌchuiꞌ in, meꞌ meꞌ bäꞌyi in muꞌin aꞌc̣his dyijyedyeꞌ aꞌsiꞌ meꞌchuquity in. Quivij raꞌ yụ fercheꞌ jéyac: tyi chuc meꞌ bäꞌyity jụijyaꞌ in, muꞌin jam junꞌ Jenꞌyadyety in ayoꞌbuꞌyedyeꞌĉan muꞌ.

Vojity, aty c̣hoñity miꞌin yụꞌtacdyeꞌĉan. Meꞌ tsanꞌ meꞌ, jam qui na ramꞌ cäj yi miꞌin: "Aty c̣honjaty tsun, junꞌ chuc mạꞌjeꞌ aꞌ tsun aꞌc̣his, tupuj meꞌ jämꞌtaĉaꞌ", jam raꞌ meꞌ yi miꞌin. Damꞌdye jämꞌ vaj meij ñútyitidyeij miꞌin mạꞌjitidyesyaꞌ miꞌin.

Mọꞌ aꞌc̣his dyijyedyeꞌ aꞌsiꞌ tsun fáquitiꞌ Jenꞌsiꞌtum Ạꞌedyeꞌ muꞌ, mijam vaj meꞌ buꞌyiꞌ mọꞌtum, mọꞌin pärenꞌ in vaj fáquitiꞌ in. Jenꞌsiꞌ Ạꞌedyeꞌ muꞌ anic yocve, jam jeñej aꞌc̣his dyijyedyeꞌ aꞌsiꞌ tsun, mọꞌdyes jam tupuj aꞌc̣his cäc̣häꞌchutiñeꞌ mọꞌ mạꞌjes aꞌ miꞌin.

Mọꞌ mọjoꞌchas yụꞌtacdyeꞌ yiꞌ: "Mạꞌjeyacsevac fer chätidyeꞌ miꞌin yódyemꞌ ĉụiꞌ mạꞌjiti u miꞌin." Räj yocsiꞌ yụꞌtacdyeꞌ in sitiꞌ in ọijĉan yirissisĉan yụꞌtacdyeꞌ Jenꞌsiꞌ muꞌ.

Mọꞌdyes jam raꞌ ĉụiꞌ timaꞌquitiĉaꞌ tsun mijam raꞌ jiꞌfajquiyitiĉaꞌ, mijam raꞌ jiꞌmeꞌtyiyitiĉaꞌ jedyeꞌ tsun.

Aty c̣honjaty tsun, muꞌ Cristo jiꞌc̣honsinꞌ tsun. Mọꞌdyes fer buꞌjamꞌ miꞌin, jam raꞌ cuvij jiꞌsässun yụꞌtacdyeꞌĉan miꞌin paj qui jam quivij mọꞌ bächäbunac miꞌin.