Versets bíblics populars de रोमि 1

Comparteix

नना येसु मसिना बारेते सोबाता पोल्लोसाटि लज्जा आयोन; बाक्याकि बोरायि अगा विस्वास इरान्तोरक ओना पिसाना साटि मुने यहुदि अनि पजा यहुदि आयोर लोकुरकुन ओद पिसाना साटि परमेस्वरना लाव मन्ता।

बाक्याकि परमेस्वर आपुना पोरो विस्वास किन्तोर ओर लोकुरकुन बदाम येताना योग्य बनेहकिन्तोर इन्जोर येसु मसिना बारेते सोबाता पोल्लोतिगा सुचेह कितोर। परमेस्वरना मुने येताना योग्य मुनेटाल आकरिवनाह विस्वासतिगा टिकेमाता। पवित्र पुस्तकतिगा कोटता मन्ता अदाम लेहका “परमेस्वरना मुने येताना योग्य विस्वासते जिवित मन्दानुर।”

बाक्याकि दुनियाता रचना आता असकेडाल परमेस्वरना गुपित गुण अनि परमेस्वरना अनन्त लाव अनि परमेस्वरत्व मन्जे परमेस्वरना स्वभाव साप साप दिसान्ता। परमेस्वर रचना कितोर ओद सबोय चिजताल ओरक पुरा रितिते ओव पोल्लो पुन्दिला परान्तोरक इन्जोर परमेस्वर हिलेर इदाम विस्वास केवालोरकुन बाताले इन्दिला परोर।

ओरक परमेस्वर मन्तोर इदाम पुन्तोर मति ओरक परमेस्वरतुन आदर अनि धन्यवाद हेवोरक। मति ओरक आपुना विचारते परमेस्वरना बारेते बेकार पोल्लोंग किन्तोरक इन्जोर ओरा निरबुद्धि मन आन्दारते निन्दिता।

ओरक परमेस्वरना खरोयतुन खोटालतासंग बदलेकितुरक, अनि ओरक सृष्टिकेवालतुन तासिस सृष्टितुन आरादना कियाला लागतुरक। मति सबोयता सृष्टिकेवाल परमेस्वरे सबोय काळते धन्य मन्तोर, आमेन।

परमेस्वरना विरोद किता खराब बुतो ते खरोयतुन मकहान्तोर लोकुरा खराब बुतोंग अनि सबोय गलतिता पोरो स्वरगताल परमेस्वर पकाय होंग किन्तोर।

इन्जोर परमेस्वर ओरकुन खराब वासनाता कयदे सोपेह कितुर; ओरांग आसक मानेयनासंग हुन्जाना तासित अनि ओव दुसरो आळदासंग खराब वासनाते हुन्जिला लाकतुंग। इदामे मानेयक वने आळदासंग हुन्जाना तासिस ओर आपसते खराब वासनाता पकाय इच्चा कियाला लागतुरक अनि मानेय मानेयनासंग व्यभिचार कियाला लाकतुर। परमेस्वर ओरकुन इदाम अदारमिक व्यवहार साटि ओरा पापता अनुसार दन्ड हितुर। बसके ओर परमेस्वरना बारेते विचार कियाना वने विरोद कितुर असकेडाल परमेस्वर ओरकुन ओरा मन्दा बेकार विचार ओरा पोरो अदिकार कियाला हितुर। इन्जोर ओर बसकेय केमाकिर अदाम पकायि खराब बुतो ओर लोकुरक कितुरक।

ओर आपुनतुन बुद्धिमान तोहच मुर्ख बनेमातोरक; अनि बसकेय नाश आयोर ओर परमेस्वरना महिमातुन नाश आयवाल मानेय, पिटेंग, जानवर, अनि पोटाते ताकवांग अलग अलग जानवरता रुप लेहका बनेकिता मूरतितिगा ओर लोकुरक बदले कितोरक।