Versets bíblics populars de Apostolkuéra 1

Comparteix

Opáichavo oñeme’ẽta peẽme pu’aka, ou vove pende’ári pe Pytu Porãmbáva, ha peẽ peikóta che rechaharekuéra ramo Jerusalénpe, opaite Juda departaméntope, Samáriape ha yvy rugua pahaite peve.

Hesu katu he’i ichupekuéra: Ndaijái peẽme peikuaa hag̃ua umi ára umíva térã pe ára Ñanderuete oiporavomava’ekue ohechauka hag̃ua ipu’aka.

Ha oñembyatypa jave hemimbo’ekuéra Hesu he’i ichupekuéra: Ani hag̃ua osẽ Jerusaléngui Ñanderuete ombou peve pe Pytu Porãmbáva, Ha’e oprometemava’ekue Che ha’e haguéicha peẽme. Juan Bautísta obautizava’ekue ýpe, peẽ katu pejebautizava’erã pe Pytu Porãmbávape mbovymi ára riremínte.

Hesu ojehechaukava’ekue ijapostolkuérape 40 ára pukukue Ñanderuete omoingove jevy rire ichupe, ha ojehupi mboyve yvágape, ha umi ára umívape ohekombo’e porãva’ekue ichupekuéra umi mba’e ndoikuaa porãiva gueteri Ñanderuete retãguasu rehegua rehe.

Ha Hesu he’ipávo ko’ã ñe’ẽ kóva, ojehupi ichupe yvágape hemimbo’ekuéra resa renondégui ha peteĩ arai omo’ã ichupe ojupívo.

Ha oma’ẽ jave hikuái Hesúre ojupi ohóvo yvágape, oñemboja sapy’a mokõi ángel ijao morotĩva hendapekuéra, ha he’i hikuái: Peẽ, kuimba’e Galiléa pegua mba’érehepa pema’ẽpeína ára rehe, peẽ pehecha haguéicha ko Hesu ojehupi pende apytégui yvágape, peichaite ou jevyva’erã.