Yóm igou temngel, tódô tonu yóm tey lenos mbel fi gu bwak, mung du yóm tey lobun mfól alì sminang lel yóm tey silà mkal gu lemen. Wen ofi bè gónón sóól yóm lobun yó, mom sminang mélél hol lómón yóm tembaga deng hló. Lemwót bè gónón sóól yóm lobun yó wen tonu fat mowil lómón tô tau kmò le. Okóm yóm ket kul na sotu, sal fat uyó le ne fat se hafak le. Yóm ti le tódô tedeng lómón ti tau. Okóm yóm hólól ti le lómón kmasing ngà safì, bede tey sminang hol lómón keslinang le yóm tembaga deng hló. Sket kul na fat sigel le nô laan yó kem hafak le, bede lómón sigel tau. Yóm lewu hafak yó kem mowil yó, ke nból le tódô stud bè tukô hafak yóm lewu kem dumu le sedà. Gbek le móyóng kihu gónó le e solu anien ke là bud le beklil.