Versets bíblics populars de PAMUNGKAAN 27

Comparteix

Sai dilehen Debata ma di ho ombun sian langit, jana napuma angka ladangmu baenonNa! Sai dilehen ma di ho gandum dohot anggur marlobi-lobi! Sai gabe naposomu ma da angka bangso na marragam, jana talu ma maradopkon ho angka marga ni bangso na asing. Sai rajaanmu ma sude angka kahanggimu jana marsomba di jolomu ma pomparan ni inangmu. Sai hona bura ma sanga ise na mamurai ho jana tarpasupasu ma sanga ise na mamasumasu ho.”

Didok si Esau ma, “Padua noli on ma dipaoto-oto ia au. Patut do antong si Jakob goarnia. Ma dibuat ia hakku siangkaan jana saonnari dibuat ia muse dope pasupasu na aturan di au. Na so adong be he pasupasu na asing di amang silehenonmu di au?”

Dung i mandok hata ma si Ishak mangulahi, “Indangkon na adong ombun sian langit di ho, nada adong ladang na napu di ho. Sian podangmi ma ho mangolu. Tapi laing naposo ni anggimu do ho. Tapi muda mangarunta ho, malua ma ho sian kuasonia.”

Nada marnamantak si Esau mangelek-elek amangnia i, “Hum i sajo ma he amang pasupasumu? Laing pasupasu ma da dohot au, amang!” Dung i tangis ma ia mangulahi.