Versets bíblics populars de AYUB 2

Geupeugah lé peurumoh Nabi Ayub ubak gobnyan, “Ka lagéenyoe bagoe keuadaan droeneueh ya Ayub, panena mungken lom droeneueh seutia ubak Po teu Allah? Jak laju, neukutok TUHAN nyan, óh lheuehnyan maté kheueh gata!” Geujaweueb lé Nabi Ayub, “Gata neupeugah haba lagée ureuëng hana akai! Ék kheueh geutanyoe tateurimong nyang jroh-jroh mantong nibak Po teu Allah, meunyoe nyang hana gét tatulak?” Lé sababnyan, bahpi Nabi Ayub meugantoe-gantoe geurasa bala nyang keunong u ateueh geuh nyan, gobnyan teutab saba ngon hana geupeuteubiet meusikrek haba pi nyang teumeureuka ubak Po teu Allah.

Geutanyong lom lé TUHAN, “Peu kheueh kalheueh gata ngieng hamba Ulôn Nabi Ayub? Bansaboh bumoe nyoe hana ureuëng nyang lagéenyan seutia dan jroh até. Gobnyan jiseumah Ulôn dan mubacut pi hántom na jipeubuet buet nyan jeuhet. Gobnyan mantong teutab seutia ubak Ulôn, bahpi gatanyoe ka tabujuk Ulôn mangat Ulôn peuceulaka Nabi nyan deungon hana alasan mubacut pi.”

Dan geupeugah kheueh lé TUHAN ubak Jén peugoda nyan, “Gét kheueh, tapeubuet kheueh laju ban meuheuet gata ateueh Nabi Ayub nyan, asai bék gata poh maté.”

Bala nyang keunong ateueh Nabi Ayub laju jideungoe lé lhée droe rakan gobnyan, awaknyan na kheueh Elifas asai nibak banda Téman, Bildad ureuëng Suah dan Zofar ureuëng Naamah. Awaknyan ka sipakat keuneuk jaksaweue sira jipeumangat até gobnyan. Teuma bak watée jingieng lé awaknyan rot jiôh, awaknyan rab hana jituri le keu Nabi Ayub nyan. Awaknyan laju jimo ngon su nyang meuleungkeng sira jipriek-priek peukayan jih ngon jisipeuk abée ateueh ulée dan u ateueh manyang. Tujoh uroe tujoh malam awaknyan jiduek nibak tanoh bak binéh Nabi Ayub, hana jimariet bahpi meusikrek haba pi, sabab awaknyan ka deuh jikalon pakriban brat bala nyang geudeurita lé Nabi Ayub nyan.