Versets bíblics populars de Rom Tɩŋŋaa 1

Comparteix

Mɩ bɩ hɩɩsɩŋ ka fá dɩ mɩ bʋl Wɩa wʋzɔmɔ-la, bɛɛ wɩaa ʋ nɛ ŋaa Wɩa doluŋ. Nɩalɩŋ sɩ laaba dii, Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa kala, Wɩa jaŋ laaba ta.

Wɩa wʋzɔmɔ-la dagɛ ŋɩɩ Wɩa sɩ ŋaa nɩaa wuo kɛŋ tʋɔpʋla ʋ sɩpaaŋ. Ʋ daga arɩ nɩalɩŋ sɩ laa Wɩa dii, ba kɛŋ tʋɔpʋla ʋ sɩpaaŋ, dɩ ba wuo chɩŋ ba laa diine-la naaŋ lɛ a mʋ dɛrɛ. Ba ŋmʋnsɛ ŋɩɩ nɛ Wɩa teniŋ tʋɔŋ a bʋl, “Nɩɩ-la kala sɩ laa Wɩa dii, ʋ ŋaa tʋɔpʋl tɩɩna nɛ Wɩa sɩpaaŋ, ʋ jaŋ kɛŋ mɩɩsɩŋ.”

La bɩ Wɩa nagɩsɩŋ wuo jɩŋ. Ama la wuo chaasa na ŋɩɩ ʋ sɩ kɛŋ doluŋ sɩ bɩ dɛrɛ. Ʋ bɩ nuhuobiine naga. Ʋ dagɛla wɩaa deemba, a suomi bʋa-la lɛ ʋ sɩ ŋaa dʋnɩa a kaa kʋkɔ jɩnɩŋ. Kɩalɩŋ kala ʋ sɩ ŋaa nɛ dagɛla ŋɩɩ. Ŋɩɩ wɩaa nɩbɔŋŋɔɔ deemba bɩ jaŋ wuo bʋl arɩ ba bɩ jɩŋ.

Ba jɩma Wɩa hɛ nɩmɛ nɛ, ama ba bɩ ʋ ka zil arɩ ʋ ŋaa Wɩa. Ba bɩ ʋ ka lɔllɛ. Ba tʋɔbɩɩnaa kala bɩrɩma nɛ ba ŋɩŋaa wʋlɩɩlɩŋ. Ba tʋɔbɩɩŋ lɔrʋnʋ-la kɛmba kaa mʋ hɛ birimiŋ tʋɔŋ.

Wʋtɩtɩɩ-la ba sɩ jɩma a tɩgɛ Wɩa lɛ, ba joŋu lenni wʋnyɩɛrɩŋ, a mɩɩra chʋchʋɔlɛ kɩalɩŋ ʋ sɩ ŋaa, aŋ vɩa dɩ ba chʋchʋɔlɛ Nɩɩ-la sɩ ŋaaba. Ʋ maga dɩ la dɛnnʋ a kaa mʋ wuu. Amɩɩ.

Wɩa baanɩŋ sii nɩbɔŋŋɔɔ arɩ nɩalɩŋ sɩ bɩ ʋ niiŋ wɩaa ka to nyuŋ nɛ, bɛɛ wɩaa ba wʋŋaalaa nyagɛ wʋtɩtɩɩ-la bil nɛ.

A tɩŋ ŋɩɩ wɩaa, Wɩa jomba ta nɛ dɩ baa ŋaa wʋlɩɩlɩŋ a hɩhɩɩsɛ ba tɩtɩa. Haalaa vɩa dɩ ba dɩ ba balaba pɩpɛ bɔsɔ, aŋ ka ba dɩ ba hadɔsʋŋ mɩɩra pɩpɛ bɔsɔ. Ŋɩɩ tɩtɩa nɛ baalaa ma vɩa dɩ ba jaa haalaa arɩ Wɩa sɩ sɩ baa ŋaa ŋɩɩ, aŋ mɩɩra kɛŋ ba badɔsʋŋ pɩpɩŋ a hɩhɩɛnɛ dɔŋɔ, a ŋɩŋaa hɩɩsɛ wɩaa dɔŋɔ lɛ. Ba sɩɩ ŋaa ŋɩɩ, baa dɔgɩsɛ ba tɩtɩa nɛ ŋɩɩ. Dɔgɩsɩna-la jaŋ magɛ ba yaraa lɛ. Nɩaa deemba bɩ chɛ dɩ ba jɩŋ Wɩa. Ŋɩɩ nɛ tɩɩ Wɩa lemba ta ba tuto ba tʋɔbɩɩŋ bɔmɔ-la harɩŋ a ŋɩŋaa wɩalɩŋ sɩ bɩ maga dɩ baa ŋaa.

Ba bɩɩna ba kɛŋ wʋjɩmɩŋ nɛ, ama ba yaara nɛ. Ʋ fa maga dɩ ba chʋchʋɔlɛ Wɩa sɩ kɛŋ yɩrɩŋ aŋ bɩ sʋʋ. Ka ba vɩa aŋ mɩɩra mɛ kɩaa sɩ nagɛ nuhuobiinee a sʋsʋʋ, a bɩra mɛ kɩalɩŋ sɩ nagɛ diibiisiŋ arɩ pʋsʋŋ arɩ kɩalɩŋ sɩɩ tuuri tinteeŋ, a chʋchʋɔlɛ.