Versets bíblics populars de Romapụ 6

Comparteix

Anịatịḅị si mị ḅe gbẹịnye anị—fị-ẹ; ọkụma igbikigbẹịnka Tamụnọ ḍiepịrịye mị anị simegbaso ḍumo-ẹ, Kraịst Jizọs wa Nyanaḅọ Ḅe na gbọrịye mịẹ ḅụ.

Ye si ḅẹrẹtọn ọ́ pịrị ma: anịatịḅị oloko mị chuku ḅie ómine ofori-ẹ, ọkụma Tamụnọ Ḅe ḍikiḅụgerere mị chuku ḅie-ẹ.

Mịna mengi sara mị ḅụ, anịọkụma ini wa se chụa ori na ḍipisam, wa oria fị ḅụ ye ḍia ọkịsam, mịẹse ini nwọ fị ḅụ Kraịst Ḅe sịsẹma ḅara Ḍaḅọ ḅe boma nyana kụrọ mị ḅụ, anị mine sọ pịkị ịwọ ḍumo nwọ kọnḅịa ọkụ-ẹ.

Ọ́ pịkị ọ́mịna ḅụ ma ḅụ gbọrị pẹkẹrẹ sọ se si mị chuku koroma ma, ó ḅofa anị se sitịḅịnyana fịrị nwọ nwẹngị. Anịnakaraka, ómine ọ́mịna ḅụ ma se Tamụnọ Ḅe pịrị, ini fị ḅụ ọkị ḅọrọma ḅo ḍumo ḅie chusa tomoni ḅara ḅụ, se ọ́mịna bebe ḍumo mị mgba se sarakoroma ọ̀ pịrị se ori anị se karakaramịẹmịẹye fịrị nwọ nwẹngị.

Wa pịkị mịn mị nwọ nemi waraḅẹ; na mine ḅe olomu sime ḅara mị anị nwọse Kraịst Ḅe ḅụ chụa mgbẹsẹchịn ọgọnọ ḅakụḅaasam, mịẹse si mị ḅe ojumịnị mị fịḅịa ẹrẹchị, mịẹse wa ḅarị omoni sọ si pịrị ẹka ọkụ.

Anị gbọrị ḅara ḅụ fịsapụ ḅara ọ́ nwọse ọ́ ḅụma kịẹnma si mị gbolomaye ḅụ, ọkụma Jizọs Kraịst Ḅe ḅụ ọ́ ḅọrọ Tamụnọ Ḅe na gbọrịye mịẹ ḍumo nwọ kọn.

Anịọkụma, cheye wa nwọ ḍuko ḅe? Wa pa si ḅie simemamun ḅe, mịẹse Tamụnọ Ḅe ḍikiḅụgerere mị sumamunḅịa ḅara? Ngịsị ọkọ paka ẹkẹ! Wa fị si pịrịsam nde wa ineda pịkị anịa ḅie ḍumomamunḅịa ọkụ?

Pikipikiye ofori-ẹ, ó nemimẹ na ómine omoni ḅara nwọse ọ́mịna ḅụ ma seni gbọrịḅọ nwọ pịrị na ómine ò ḍukoye mịẹḅịa nwọ ḅẹ sịkị, ò ḍukoye ọ̀ nwọ mịẹḅịa ọ́ nwọ ḅẹ ḅọ ḅe, ọ́ nyanaḅọ nwọ sọsam, sosi si-ẹ, anị mị ọkịḅoḅịaye anị fị-ẹ. Anịkanịka ḍukoye mịẹ, anị mị ọkịḅoḅịaye anị Tamụnọ na karakara ḅụ sime-ẹ.

Ọkụma mịẹḅaka sime Tamụnọ Ḅe pịrị! Anịatịḅị gbọrị sịkị ómine omoni sọ si pịrịmẹ nwọ ḅẹ sọnị, ini se ó ḍieye ma ḅụ ọ́ ḍọkịḅo kọkọmaye ma, ọ́mịna kuḅie mgba ọ́ nwọse ḅịpịpoki ḅara se àrị daọkịsam. Si ḅụ ini ó finmamẹ, se ó vinpịkịḅo karakaraye mị ḅe omoni nwọ sọsam.