ဒ်သိးပှၤအ့ဖရဲၣ်ဖိအသုတဃ့ၢ်ပူၤဖျဲးတဂ့ၤဒီး, ပှၤကံးလဧးဖိတဖၣ်ဟံးန့ၢ်တၢ်လီၢ်တဖၣ်ဖဲတၢ်ခီဂာ်ထံကျိယၢ် ဒ့ၣ်သ့ဝဲန့ၣ်လီၤ. ဖဲပှၤအ့ဖရဲၣ်ဖိတဂၤဂၤလၢအကျဲးစၢးဒ်သိး ကပူၤဖျဲးအဂီၢ်ဃ့တၢ်ပျဲလၢကခီဂာ်တၢ်န့ၣ်ပှၤကံးလဧးဖိတဖၣ်သံကွၢ်ဝဲ, “နမ့ၢ်ပှၤအ့ဖရဲၣ်ဖိဧါ.” ဒီးအဝဲမ့ၢ်စံးဆၢ, “တမ့ၢ်ဘၣ်”, ဒီး အဝဲသ့ၣ်စံးဘၣ်အီၤလၢကတဲ, “ၡံးဘိၤလ့း” န့ၣ်လီၤ. ဘၣ်ဆၣ်အဝဲစံး, “စံးဘိၤလ့း” မ့ၢ်လၢအဝဲသ့ၣ်ကိးတၢ် ကတိၤန့ၣ်တကျါဘၣ်. တုၤနုၤတစု, အဝဲသ့ၣ်ဖီၣ်အီၤဒီးမၤသံ ကွံာ်အီၤဖဲတၢ်ခီဂာ်ထံကျိယၢ်ဒ့ၣ်အလီၢ်တတီၤန့ၣ်လီၤ. အကတီၢ်ဖဲန့ၣ်ပှၤအ့ဖရဲၣ်ဖိတဖၣ်ဘၣ်တၢ်မၤသံကွံာ်အီၤအဂၤလွံၢ် ကလးခံကထိန့ၣ်လီၤ.