Versets bíblics populars de 1 I-Korinto 6

Comparteix

Baka et ey dinibkan jo ey say bakdang jo ket, Timplo ni Ispirito Santo ja inpan‐iyan nen Apo Shiyos son si‐kayo. Isonga say bakdang jo, aliẃen kokowayo. Si‐kayo, may‐eshig ey tinongkal shakejo nen Apo Shiyos ni epalit; isonga say dag‐en jo koma, sota kayshedjawan nen Apo Shiyos.

Amtayo met ey sota toon ngaaw i aramid to, eg mayda‐kam shi pantoshayan nen Apo Shiyos. Isonga aliẃen sota ngaaw wa aramid i jo dag‐en, ta naytopoy nemnem jo no kowan jo ey baybay‐an nen Apo Shiyos sotan na basol. Ta sota mabii, sota maleki, sota emay‐a‐shom so nonta ira ensekig i shaka dagdag‐a shima timplo ni pagano, tan sota daleki ja kait ton daki met laeng i shaka eshola, eg ira mayda‐kam shi pantoshayan nen Apo Shiyos. Kasta met sota makibot, sota magamkam ni kompormi, maboteng, masomang, mengolbod ni kokowa ni eshom, eg ira ngo mayda‐kam.

Isonga karekayo memii ono mekileki; araẃi‐i jo ira jay ya aramid. Ta sota mabii, bakdang to shorog i dino‐shis to. Sota eshom ma basol, eg ma‐apiktaran i bakdang ja inges niyay.

Owen, agpayso sota kowan jo ey si‐katejon emati, palobos ja mebedin na dag‐en tayon emin. Nem aliẃen emin na dag‐en ket, ẃaray i‐akan ton panmaptengan tayo. Isonga no si‐kak, ekak itolok ja sotan et ngo mowan i onsekdin shi naka pansilbi son Apo Jesus.

Si Apo Shiyos, inpanbiyag tos Apo Jesus shi patey, jet panbiyag shakito ngod patey ni panakabalin to.