Versets bíblics populars de Xota̱ Kolosa̱ 3

Comparteix

Ja̱kꞌi̱e̱ ja̱ngaján ti̱ꞌanchíkjo̱a̱jnúu̱ xingi̱jnú, kó ti̱ꞌanjetakónjnúu̱ xingi̱jnú tsi tjín xí ko̱óngítaꞌínjnú. Xikó tsꞌén nga Kristoo̱ katsꞌénjetakónjnú, ti̱ bo̱a̱ ti̱ tsꞌén ti̱ꞌanjetakónjnú jún.

¡Ni xi chji̱a̱ni ndiꞌakꞌajmii̱ xí ti̱ꞌankjójnú, jmí tsi ni xi chji̱a̱ni kui nga̱sondiee̱!

Ngayeje ni xi si̱ꞌánjnú, ngayeje ini̱ma̱jnú nga ti̱ꞌánjnú, xikoó tsi xaá Ndi̱a̱ná xí ndyi̱niꞌánjnú, kó jmí tsi xaá xotaa̱.

Néná jè jaꞌájinjnú jún nga je xota̱ tsjiee̱, ko̱jo xota̱ xi tjoó kui májnú jún, kuíni nga ti̱ꞌantja̱tsi̱e̱yàjnú kjo̱a̱mindyionjnú, xikoó tsi ngo ńjño xi tja̱tsi̱e̱ cha̱jájnú nga ni̱ma̱ ka̱majnú xingi̱jnú, ko̱jo nga kꞌuiéjnú kjo̱a̱nda, ko̱jo nga kꞌuiéjnú kjo̱a̱ni̱ma̱kjo̱a̱, ko̱jo nga kꞌuiéjnú kjo̱a̱ndaxota̱, ko̱jo nga kꞌuiéjnú kjo̱a̱chiyákjo̱a̱.

¡Eén Kristoo̱ ꞌniú nga tꞌíjñajinjnú xikoó tsi ngo kjo̱a̱cho̱n! Takoyajnúu̱ xingi̱jnú, kó ja̱kꞌi̱e̱ ja̱ngaján tatíxomájnúu̱ nga si̱ꞌankjiénjnú ngayeje kjo̱a̱kjínkón, ndaàjnú ngayeje ini̱ma̱jnú nga ko̱e̱ꞌéjnúu̱ ndokꞌóchjì Ndi̱a̱ná nga ko̱ndàjnú salmo̱, só xi ndaa̱ Néná, ko̱jo só xi bokoyájnú a̱si̱énni̱xtjii̱n. Ngayeje ni xi si̱ꞌánjnú, ko̱jo ni xi kꞌuínjnú ngongá jaꞌeén Ndi̱a̱ná Kjisoo̱ xi ti̱ꞌankjiénjnú nga ko̱e̱ꞌéjnúu̱ ndokꞌóchjì Néná xí Na̱ꞌmii̱, ngatꞌaa̱ ni xi katsꞌén Kristoo̱ kjo̱a̱a̱ jún.

Ti̱ꞌantjójnú xingi̱jnú, ngatꞌa̱ kjo̱a̱tjoó kuí xí ꞌniú chjí ngasenii̱ ta̱bo̱a̱jiín ni xi ngasee̱, kó kui nii̱ xi tsꞌéngo kjin kjinjnú.

Jè nijan jaꞌáꞌyájnú ko̱jo Kristoo̱, kuíni nga ti̱ndyi̱séjnú ni xi chji̱a̱ni ndiꞌakꞌajmi jàn, nínga tikón Kristoo̱ ki̱a̱ tsja fojnií Néná.

Kjo̱a̱xioó Kristoo̱ ngatatixómaá ini̱ma̱jnú, ngatꞌa̱ ta̱ngatꞌanii̱ kui nii̱, nga Néná tsíchji̱a̱nijnú tsi̱ꞌe̱ nga ta̱ ngo tsí yojoo̱ Kristoo̱ ka̱majnú, nga kꞌuiéjnú kjo̱a̱xió. Te̱ꞌéjnúu̱ ndokꞌóchjì Néná kjo̱a̱a̱ kui nii̱.

Ti̱ꞌankꞌiènjnú ni nga̱sondie xi tikónjii̱n ini̱ma̱jnú kui ni xi kjo̱a̱tondoo̱, ko̱jo ni xi ndándií, ko̱jo nga ko̱tíxomájnú ni xi ndajín xi mejeén sa̱ꞌín yojojnú, ko̱jo kjo̱a̱xki̱ꞌá to̱n. Kui xi xki̱ꞌá to̱o̱n, kuí boá xi tjimátji̱ngi kje̱ꞌe ne xi Nénájín.

Ngatꞌa̱ jún jè jesónjnú kjo̱a̱a̱ ni nga̱sondiee̱, kó Néná jè íjñá ngi̱jii̱n Kristoo̱ kjo̱a̱mindyionjnú.

Ta̱nga ngotꞌe̱ ꞌne̱, ti̱ ti̱ꞌanchꞌójnúu̱ yojojnú ngayeje kui ni xi̱ꞌbi̱: Kjo̱a̱tamaá, ko̱jo kjo̱a̱xtindaa̱, ko̱jo kjo̱a̱too̱n, ko̱jo kjo̱a̱chꞌoꞌaa̱, ko̱jo énkjàn xi chꞌo tsoó.

Ngata̱ ja̱kꞌi̱e̱ ja̱ngajánjín ꞌbíndisojo̱jnú xingi̱jnú, ngatꞌa̱ jè xikoó tsi je ikꞌiéjnú ńjño xchá xí kichajájnú ngasꞌe̱. Kó ngotꞌe̱ ꞌne̱ xikoó tsi je kichajájnú ngo ńjño xi tja̱tsi̱e̱, nga Néná tjítsꞌéntja̱tsi̱e̱yajnú xi kókón kui, ko̱jo nga nda ngase xcha̱jnú kókón Néná.

Jún xi xi̱ꞌinjnú, ti̱ꞌantjójnú chjo̱ónjnú, kó ngata̱ tajájín niꞌánjo̱jnú.

Jún xi ndíjnú, ndaꞌyáꞌénjnúu̱ ngayeje ni xi ka̱tso̱jnú xi xchájnú, ngatꞌa̱ kuí nii̱ xi tsja maa̱ Ndi̱a̱ná.

Jún xi ínchjínjnú, cha̱ndikónjnú xi̱ꞌinjnú. Bo̱a̱ ti̱ꞌánjnú xikótsꞌèn nda maá xota̱ xi tjimátji̱ngii̱ Ndi̱a̱ná.