Versets bíblics populars de ROMANOS 6

Comparteix

Juchaj pagonqa wañuymin, Diospa regalonrí wiñay kausay, Cristo Jesús Señorninchejpi.

Chayrayku juchaqa manaña kamachisonqachejchu, imaraykuchus manaña leypa kamachimpichu kankichej, astawanqa Diospa khuyakuynimpi kankichej.

Bautismonejta Cristowan khuska wañuypi p'ampasqas karqanchej, imaynatachus Cristopis, wañusqamanta kausarimorqa, Dios Tata jatunchasqa kanampaj atiyninwan; ajinallatataj noqanchejpis mosoj kausaypi purinachej.

Amallataj cuerpoykichejta juchaman qoychejchu, paynejta sajra imasta ruwanapajqa. Astawanqa qankuna kikiykichej wañusqasmanta kausarimusqas jina, Diosman qayllakuychej; cuerpoykichejtataj Diosman qoychej, cheqan kajta ruwanampaj.

Yachanchej mauk'a runanchejqa paywan khuska chakatasqa kasqanta, juchallikoj aychanchej wañunampaj, amañataj astawan juchata kasunanchejpaj.

Ajinallatataj qankunapis yachaychej, juchapaj wañusqas kasqaykichejta, Diospajtaj kausasqaykichejta Cristo Jesús Señorninchejpi.

Kunan ima nisuntaj? Juchachakullasumpunichu Diospa khuyakuynin astawan ashkhayanampaj? Chayqa mana jinachu. Juchapajqa wañorqanchejña. Imaynatataj juchallapipuni kausasunri?

Manachu yachankichej pillatapis wata runa jina kasuspa, chaypa kamachin kasqaykichejta? Ajina ari, juchata kasunkichej chayqa, wañuypaj kanqa; Diosta kasunkichej chayrí, cheqan kausaypaj kanqa.

Ñaupajta juchaj kamachisnin karqankichej. Kunantajrí Diospa khuyakuyninrayku tukuy sonqowan kasunkichejña, chay yachachiy qosqaman jina, mayqempichus yachachisqas karqankichej. Juchamanta kacharisqas kaspataj, cheqan kajpa kamachisninman tukunkichej.