Versets bíblics populars de Isaías 9

Comparteix

Tima tzimataiki iinchaa-niki, Iriitaki ikasiya-kaakairi Pawa. Sintsinkantsi impinkathari-wintanti. Iwaitakiniri iwairo impaitaitiri Yomitaa-naantaniri Pampoyaari, Pawa Ñaapirori, Añaanita-tsiri Asitaaniri, Pinkathari-wintan-tatsiri isaikan-taitari kamiitha.

Ikaratzi kimiwita-kariri inkinaki-tyiimi otsitini-kitzi, Ari iñaayitajirori iroopirori ootamintotsi. Otsiman-kakowi-takari yaampari kathatayiri inkinajimi sarinkawiniki. Okimiwai-taaro isaikajimi okitainkatzi.

Irijatzi pinkathari-wintairini incharini-yitajyaari David, Inthonka inkimakoi-tairo isintsinka. Ari onkanta-jitatyiiro isaikaitaji kamiitha, Asi owatyiiro ijiwawintantaji, Tampatzika-siri inatyii, kamiitha-siri inkantanti, Ari onkantaitatyiiyaani itanakyaaro iroñaaka. Tharowinta imatairo, Pawa Ñaapirori.

Aritaki isaikaji kamiitha, tikatsi owayiri-tajyaarini, intaayi-tairi ikyaantari iitziki owayiriiti. Impomitainiri iithaari-payi iwayiri-tantari, okaratzi iriraanitakiri iraantsi. Inkimita-kaita-jyaaro itayiitziro katarosi-masi.

Iroñaaka ikimaatsi-takaa-waitari Pawa yonta ashininka-payi nampitarori iipatsitiki Zabulón-iti aajatzi Neftalí-iti. Airo osamani-tzimaita inkimaatsi-waityaa. Tima ari iñiitaki apaata iroopirori waniinka-taantsi anta Tapowiniki, inampiitiki iriroriiti, tsika impiyota-jyaari pasini-satziiti, anta inkaari-thapyaaki, aajatzi intatzikironta Owaryiinkaariniki.

Tima pishikyaa-yitakiri atziri-payi, Poimosirinka-piro-tairi irirori. Oshiki inkimo-siri-winta-jiitimi, osiyawai-tajyaaro ikimo-siri-wintai-tziro yawiitai-tziro pankirintsi, Onkimiwai-tajyaaro ikimo-siri-wintai-tziro ipawakaaro owayiri-payi iwaararo.

Tima pintsiparyaa-kowintairi awiroka impira-waitaitari, Piwatsinaryaa-kotajiri isintsiwinta-waitai-tziri, Ikaratzi ikimaatsi-takaitaka ijiwawintai-tziri, Osiyawai-takaro papirotan-takariri pairani Maimani-wini-satzi.