Versets bíblics populars de Ibriniyawa 11

Comparteix

Nwuak fwuo hwa yet gbang a̱lyia̱ di̱ kyang nang zi̱ ntyia̱ fwuo a̱ni, ku nwuak zi̱t a̱chuchuk di̱ kyang da̱nang zi̱ li a̱ni bah. A̱tsak a̱lyiat, nwuak fwuo da̱ A̱gwaza hwa ku mbyia̱, á̱niet gbangbang ba si̱ mmaai, A̱gwaza si̱ chyin baa.

A̱wot á̱ mbyia̱ a̱tyu nang A̱gwaza si̱ mi̱n fa̱k nyinyang nggu, di̱ mi̱n nwuak fwuo a̱ni bah. Kuzang a̱yin a̱ chat bai kpa̱mkpaan ma̱ng A̱gwaza a̱ni, ku yet ta hwa, gu nwuak a̱chuchuk nyia̱ A̱gwaza nshya̱, a̱wot a̱ ni̱ nang a̱mgba̱m á̱niet ba̱ chat gu ma̱ng fwuo nyiung a̱ni zang.

Nwuak fwuo da̱ A̱gwaza hwa mbyia̱, nang zi̱ nfi̱k nang A̱gwaza wa nyia̱ swanta hu mi̱ di̱ kaat a̱lyiat nggu hu. Mat a̱nia wa, zi̱ fi̱k nkyang nang A̱gwaza nyia̱ mi̱ swanta nang á̱ nwuan ma̱nini a̱ni, na̱ neet ma̱ á̱si̱ na á̱ nwai nwuan a̱ni.

Mat nang Ibrahim ku nnwuak fwuo da̱ A̱gwaza a̱ni, a̱ si̱ fa̱k yei A̱gwaza hu, a̱ si̱ nyia̱ ta̱m ma̱ng a̱lyiat nggu na. A̱ si̱ ghwon a̱li nggu ka, a̱ si̱ nat a̱byin a̱ghyang nang A̱gwaza ku nyia̱ a̱li̱ka̱uli a̱ na nang gu, ka̱ yet gado nggu a̱ni. Ibrahim ku ghwut, a̱ si̱ ghwon a̱keang nggu ka. Da̱ nggu, a̱ lyen a̱vwuo ka nang gu nnaat a̱ni bah. A̱wot ku nang gu ku si̱ ntat a̱byin ka nang A̱gwaza nyia̱ a̱li̱ka̱uli a̱ na nang nggu a̱ni, mat nwuak fwuo nggu hu, a̱ si̱ swan a̱ja ma̱ á̱suswak nang á̱nietchen a̱ni. A̱wot ma a̱nia wa, Ishaku ma̱ng Yakubu, mba meang ba̱ si̱ mun á̱ ya gado a̱byin nang A̱gwaza nyia̱ a̱li̱ka̱uli a̱ na nang mba a̱ni.

Mat nang Nuhu ku nnwuak fwuo da̱ A̱gwaza a̱ni, a̱ si̱ shap a̱gba̱ndang kukwon a̱wak, gu ka nsan kyang bwak nggu hu ma̱ a̱gba̱ndang a̱sa̱khwot a̱ri̱giwa wu. Nuhu si̱ khwi a̱lyiat A̱gwaza a̱ ku gba nggu a̱ni, ku nang a̱ri̱giwa wu ka̱n bai a̱ni bah. Mat nang Nuhu ku nnwuak fwuo da̱ A̱gwaza a̱ni, ku si̱ tak nang shi̱ri̱ya A̱gwaza tazwa á̱niet swanta ba ngyet a̱tsotswat wa. Huhwa si̱ mbyia̱ A̱gwaza si̱ kyiak Nuhu a̱ yet a̱tsotswat a̱yin, mat nang gu nnwuak fwuo da̱ A̱gwaza a̱ni.

Mat nang Enok ku nnwuak fwuo da̱ A̱gwaza a̱ni, a̱ si̱ khwu bah: Ma̱nang á̱ ndyuut ma̱ A̱lyiat A̱gwaza na a̱ni, nyia̱, “A̱gwaza si̱ kyiak gu, a̱ nat ndyo Tswazwa.” Neet nang á̱ ka̱n kyiak Enok á̱ nat ndyo Ma A̱gwaza tswazwa ka bah, á̱ ku lyen nang A̱gwaza nfa̱k nyinyang nggu, mat nang gu nnwuak fwuo da̱ A̱gwaza a̱ni.

Mat nang Abila ku nnwuak fwuo da̱ A̱gwaza a̱ni, a̱ si̱ neap za̱nang ji̱ myim A̱gwaza a̱ni, a̱ swak si̱ Kayinu ji. A̱gwaza ku kyiak Habila a̱ yet a̱tsotswat a̱yin wa. A̱ si̱ san za̱nang nggu ji. A̱nia wa, A̱gwaza si̱ ntak kpa̱sai nang gu nfa̱k nyinyang za̱nang nggu ji. Ku nang Abila nkhwu neet gbangbang a̱ni, kidee nwuak fwuo nggu ji ni̱ lyiat ma̱ng a̱nzi̱t ba̱ng ba̱ tat a̱fwun.

Mat nang Sa̱ratu, a̱byii̱k Ibrahim wu, ku nnwuak fwuo da̱ A̱gwaza a̱ni, A̱gwaza si̱ tyia̱ a̱ si̱ shya̱ a̱fa, ku nang gu ku ngyet a̱na̱khwu, a̱ si̱ bu kwop ba̱t a̱ni. Sa̱ratu si̱ nwuak fwuo nang A̱gwaza na nyia̱ kyang hu nang gu nnyia̱ a̱li̱ka̱uli a̱ na nang mba a̱ni.

Ibrahim ku swan ma̱ng tyia̱ fwuo a̱ nwuan á̱zanson. A̱ fwuong a̱gba̱ndang a̱keang nang A̱gwaza ku tyan a̱ si̱ tsa kuntyin sang sangba̱p nka hu, a̱wot a̱ si̱ nok ka ma̱ a̱pyia̱ nggu a̱ni.

Mat nang Musa ku nnwuak fwuo da̱ A̱gwaza di̱n jen nang gu ku nshi a̱ni, a̱ si̱ lak shim á̱ kyiak gu nang a̱tyu a̱ yet nggwon a̱nap a̱gwam Fi̱ra̱una kya a̱ni. Musa ku khai a̱ nat da̱ a̱vwuo á̱niet A̱gwaza, mat a̱ ka swuo a̱bung dundung ma̱ng a̱mba; da̱ a̱kwonu ka nang gu na nswan Ma̱sa̱r gu fa̱k nyinyang a̱ka̱tuk nyia̱ da̱ a̱bada̱dei njen a̱ni. Musa ku nyia̱ a̱di̱dam nang ku ngyet a̱ swak á̱ nyia̱ nggu lihyat da̱nian Kristi, nang gu na shya̱ zwá ma̱ a̱byin Ma̱sa̱r a̱ni; mat nang gu nnwuan a̱gba̱ndang zang nang gu na shya̱ á̱zanson a̱ni. Mat nang Musa ku nnwuak fwuo da̱ A̱gwaza a̱ni, a̱ si̱ ghwon a̱byin Ma̱sa̱r ka. Da̱ nggu, a̱ ku fa̱k a̱wun mwai lyen nang a̱gwam Ma̱sa̱r wu na fa̱k a̱ni bah. A̱ si̱ gbang a̱lyia̱, a̱ si̱ lak bwuok lilyim hu. Mat a̱ ku tyia̱ á̱ghyi da̱ a̱tyu nang á̱ghyi a̱tyubishyi si̱ mi̱n di a̱ni bah.

Mat nang Ibrahim nnwuak fwuo da̱ A̱gwaza a̱ni, a̱ si̱ neap Ishaku a̱ yet nggwon nggu ka nang za̱nang a̱ni da̱ a̱vwuo A̱gwaza, di̱n jen nang A̱gwaza ku mmak gu a̱ni. Ibrahim wa ku san a̱li̱ka̱uli nkwai nang A̱gwaza nyia̱ nggu ndyo a̱ni. A̱mgba̱m ma̱ng a̱nia, a̱ si̱ shim gu neap A̱gwaza nggwon nggu ka, nang gu byia̱ ma̱nyin ka a̱ni, ka̱ yet za̱nang

Mat nang Rahab, a̱byii̱k wu a̱ ku yet kham ji, ku nnwuak fwuo da̱ A̱gwaza a̱ni, a̱ si̱ nwai khwu ma̱ng á̱niet lak khwi A̱gwaza ba. Mat a̱ ku san á̱niet Isi̱rela ba mbwak nfeang, ba̱ ku bai zop a̱byin ka da̱ a̱bang a̱ni.

Mat nang á̱niet Isi̱rela ba ku nnwuak fwuo da̱ A̱gwaza a̱ni, ba̱ si̱ byia̱k A̱shong Kyai A̱sa̱khwot wu. Ba̱ si̱ chong ma̱nang gu wa yet a̱khwot a̱byin wa a̱ni. A̱wot nang á̱niet Ma̱sa̱r ba nkwan ba̱ fi̱n á̱niet Isi̱rela ba a̱ni, a̱sa̱khwot na si̱ kup mbaa. Ba̱ si̱ ya̱lyi̱ri̱p, ba̱ si̱ kwi.

Mat nang á̱niet Isi̱rela ba ku nnwuak fwuo da̱ A̱gwaza a̱ni, ba̱ si̱ nchong mami mam a̱natat á̱ kaat bat a̱keang Yeriko hu. A̱wot bat a̱keang hu si̱ kwa a̱byin ma̱ wurum!

Mat nang Musa ku nnwuak fwuo da̱ A̱gwaza a̱ni, a̱ si̱ tyia̱ á̱niet Isi̱rela ba si̱ song A̱yet Ghwut Mman Isi̱rela mi̱ Khwo hu. A̱wot a̱ si̱ bu tyia̱, ba̱ si̱ ya̱sang a̱sok a̱ kai nyinyiit na ma̱ a̱ka̱sa mba na; kalak a̱ta̱m tswa A̱gwaza wu gu hyaai mman á̱sam na̱ ku yet mman a̱ni̱nap Isi̱rela na a̱ni.

Mat nang Isuu ku nnwuak fwuo da̱ A̱gwaza a̱ni, di̱n jen nang gu mbwat kpa̱mkpaan ma̱ng a̱khwu a̱ni, a̱ si̱ shei á̱zanson ma̱ng a̱lyia̱ nggu a̱nyiung nang á̱niet Isi̱rela ba na nghwut, ba̱ ghwon a̱byin Ma̱sa̱r ka. A̱wot a̱ si̱ tak ma̱ng mba ba̱ kwok nkunkup nggu na di̱n jen nang ba̱ na nghwon a̱byin Ma̱sa̱r ka a̱ni.

Mat nang Yakubu nnwuak fwuo da̱ A̱gwaza a̱ni, di̱n jen nang gu ku nkwop, a̱ si̱ bwat kpa̱mkpaan ma̱ng a̱khwu a̱ni, a̱ si̱ nang kuzang nggwon Isuu a̱nu. A̱wot ma̱nang á̱ ndyuut a̱ni, nyia̱, “A̱ si̱ ta̱yuk di̱ shan a̱chyet nggu ji, a̱ si̱ kyuak ntong a̱zaghyi A̱gwaza.”

Mat nang Ishaku ku nnwuak fwuo da̱ A̱gwaza a̱ni, a̱ si̱ nang mman nggu na, Yakubu ma̱ng Isuwa a̱nu, ba̱ ka shya̱ a̱li̱ba̱rka á̱zanson.