Versets bíblics populars de Apokaliipsis 3

Comparteix

Tan tira nik insaʼ ex sinkʼatza. Pet tzaqʼbʼe vaq in. Tan ech nik insaʼt ex, eche vaʼq xaol uvaʼ txaklel vatz jubʼal. Tul nik isikʼleneʼ. Jaʼletz uvaʼ nik abʼin vinqul, tul laʼ ijaq u jubʼal sinvatz. Yaʼne laʼ paloʼk in s-kʼatza. Tul laʼ txʼaʼon in s-tuchʼ. Atz laʼ txʼaʼon sinkʼatza paqte. Tan aʼ insaʼ uvaʼ laʼ itzaqʼbʼe in, atz laʼ ok in t-taanima. Tul laʼ inbʼan vaʼl inyol s-tuchʼ.{*}

–Vootzaqle kam vebʼanoʼm nik ebʼan sinvatz. Tan jit tira koqxh tzʼaʼ ex; atz jit tira koqxh txhʼitxhʼ ex sinvatz. Pet aʼ nik val uvaʼ aʼl bʼaʼn tiraetz koq tzʼaʼ ex, atz maq tira laʼ txhʼitxhʼbʼ ka ex. Poro tiʼetz uvaʼ, ech kuxh ex, eche liʼkin aʼ sinvatz, tan kaʼl kuxh ekʼuul s-viʼ, tul tiraetz kuxh toq veesa el ex t-vaanima, eche laʼ ixaʼvat eluʼl vaʼq xaol vaʼq kam titziʼ.

Jankʼaletzxh inqʼa at vaanima s-tiʼ, tan nik motx voksa s-jik; atz nik motx voksa t-bʼey. Echetz nik valte sete uvaʼ itzʼavaq etibʼ tiʼ inqʼa yeʼbʼaʼn uvaʼ nik ebʼaneʼ. Tul aʼetzxh vet tzʼeʼy etaanima s-viʼ laʼ ebʼana.

–Vootzaqle kam vebʼanoʼm nik ebʼan sinvatz. Iletze nik val sete uvaʼ bʼanvaq jabʼistee u bʼaʼnla bʼanoʼm, eche ijaqeʼv jubʼal sevatz. Tul yeʼxhabʼil laʼ maqon ex tiʼ ibʼanaxeʼ, eche laʼ ijupux jubʼal sevatz. Tul kʼuxh jit sibʼlen ex tiʼ ibʼanaxeʼ, poro bʼaʼn uvaʼ nik ebʼan tiʼ inimal vinyolbʼal. Tul yeʼl ex nik eteleʼl sinkʼatza tiʼ innimaleʼ.

Jaʼletz inqʼa nik toleʼv tiʼ tel iqʼij inqʼa yeʼbʼaʼn, eche uvaʼ qat voleʼveʼ, aʼetz uvaʼe, laʼ vaqʼ tiqleʼm tiʼ ikʼuqeʼv sinkʼatza tal uvaʼ kʼuqlel in tuchʼ u viqleʼm. Eche qat inkʼuqeʼv tal uvaʼ kʼuqlel vinBʼaal tuchʼ u tiqleʼm.

Tan ech nik etal s-eche: “Oʼ vet txʼiol iqʼij. Qat qutxʼoll vet itxhej qupuaq. Yeʼxhkam vet invaʼq nik isaʼon s-qe,” chich ex. Tul tira yeʼ nik ibʼen sete uvaʼ meebʼaʼ kuxh etatin sinvatz. Atz txhoʼnebʼal aanima kuxh etatineʼ. Txumlebʼal evatz. Tan atz ex kuxh meebʼaʼ sinvatz. Atz tzottinaʼq ex sinvatz. Tul tira surlel el ex sinvatz.

Tul tiʼ uvaʼ nimamal vinyolbʼal etaʼn, atz nik ekotxʼ evatz t-inqʼa itzaʼlal, tul inetz laʼ kolon ex tuulbʼal u mam tzaʼlla kʼaxkʼo uvaʼ laʼ ul tiibʼa inqʼa xaol vatz txʼavaʼ s-kaqaayil. Echetz laʼ vilte jaʼl uvaʼ laʼ titzʼa tibʼ, atz jaʼl uvaʼ yeʼ laʼ titzʼa tibʼ.

Poro tetxhalxh toq uloq in sexoʼl. Pet txakbʼavaq etibʼ tuchʼ inqʼa yol, inqʼa iqʼomal vet etaʼn. Echetz laʼ ekʼulte vetxʼaqaʼm, eche ikʼulux vaʼq koroona, pet jit vaʼlen laʼ kʼulun.

Pet itzʼavaq etibʼ. Tul aqʼvaq yaʼl tiʼ etok bʼen tiʼ quBʼaal Tiuxh. Tan il ex aalemal etel ka tiʼ quBʼaal Tiuxh tuchʼ inqʼa ebʼanoʼm, eche vaʼq xaol uvaʼ bʼiit kuxh vet ikam taʼn yaabʼil. Tan nik vileʼ uvaʼ yeʼl ex nik etopoon tiʼ vebʼanoʼm vatz quBʼaal Tiuxh.