Versets bíblics populars de Filipeenses 2

Comparteix

Pet jit tuchʼ etxha ibʼ, atz jit tuchʼ oksa qʼij laʼ ebʼanvat kamxh invaʼq. Pet bʼanvaq, poro aʼ ex laʼ etiqʼo kuʼl etibʼ. Tul jununil ex, aʼ laʼ ebʼana uvaʼ, aʼ vemol at tatin sevatz; atz palnaʼq tatin seviʼ laʼ enatxha. Tul jit kuxh taʼn ex laʼ etitzʼa etibʼ tiʼ kam uvaʼ nik esaʼ sejunal. Pet laʼat etitzʼa kam nik isaʼ inqʼa emol.

Tul antxh ebʼan vitxumbʼal u quBʼaal JesuKriisto uvaʼ pal ikʼutxh ka vatz txʼavaʼ.

Tan kʼuxh Tiuxh tatin u quBʼaal JesuKriisto, poro bʼane txeyich koq kuxh u nimla tatin taʼn, uvaʼ iqʼomich tzaan taʼn, eche u nimla tatin quBʼaal Tiuxh. Pet aʼl taqʼt ka quBʼaal JesuKriisto u nimla tatineʼ, atz u tatinich kʼatz quBʼaal Tiuxh. Tul taqʼ bʼen tibʼ s-vaʼl alam aanima. Tul tiqʼo kuʼl tibʼ tuchʼ vitxumbʼal s-vaʼl kʼuulanal. Tuulbʼaletz uvaʼ alam aanimaich veteʼ, tul tiqʼo kuʼl tibʼ. Tul tira nimal u quBʼaal Tiuxh taʼn, tetxhal topoon vatz u kamchil. Atz tetxhal ichʼixvisaleʼ, tan een ex kamk vet vatz kurus.

Tan aʼ u quBʼaal Tiuxh, uvaʼ at vet tetaanima, laʼ aqʼon sete etatxhvat kam uvaʼ nik isaʼ quBʼaal Tiuxh. Tul aʼ laʼ aqʼon etial tiʼ ebʼantaʼ.

Echetz s-tiʼile oksal vet iqʼij quBʼaal JesuKriisto taʼn quBʼaal Tiuxh viʼ inqʼa kam s-kaqaayil. Tul toksa vet quBʼaal Tiuxh vibʼij u tiqleʼm quBʼaal JesuKriisto uvaʼ palnaʼq vet tiibʼa jankʼal inqʼa ibʼij u tiqleʼm inqʼa iqʼesal. Echetz tiʼ u nimla tiqleʼm quBʼaal JesuKriisto, tul jankʼal inqʼa xaol s-kaqaayil laʼ qajeʼv vatz quBʼaal JesuKriisto tiʼ inatxhkʼuulaleʼ, atz jankʼal inqʼa t-amlikaʼ, atz jankʼal inqʼa vatz txʼavaʼ, atz jankʼal inqʼa jaqʼ u txʼavaʼ. Tul jankʼalxh inqʼa xaol uvaʼ at tuulbʼal u vatz txʼavaʼ laʼ alon uvaʼ taʼn u quBʼaal JesuKriisto iqʼesal tiibʼa s-kaqaayil. Echetz laʼ toksal iqʼije u quBʼaal Tiuxh.

Poro kamxh invaʼq laʼ ebʼana, tul jit laʼ nal koq kuxh etal katxhaqla yol tiʼ ebʼantaʼ. Atz jit tuchʼ yojo ibʼ tuchʼ yol laʼ ebʼanvat. Pet nuqla jikxh vet ex kʼaol imeʼal quBʼaal Tiuxh laʼ ebʼana. Echetz yeʼ laʼ itxhej kantxhaqla yole setiʼ. Tul aʼ ekʼutxh vet inqʼa bʼaʼnla txhaq txumbʼal xoʼl inqʼa xaol, inqʼa bʼanolaq tetz yeʼbʼaʼn, inqʼa elnaʼq iviʼ t-bʼey. Tul echetz vet etatin xoʼl inqʼa xaol tiʼ ikʼutxhux vibʼey, eche txiqubʼal tu tokto, eche itxiqun txʼumil vatz amlikaʼ.

Echetz nik valte sete, ex, uvaʼ nik inchiibʼ setiʼ, tan, tiʼ uvaʼ il inqʼa bʼaʼnla txhaq yol tiʼ Jesuus nimamal etaʼn, tul toq val sete uvaʼ aʼxh ebʼan yaʼl tiʼ ikʼutxhux viyolbʼal quBʼaal Tiuxh. Tan chitel vet ex s-txheel. Tul nimavaq u quBʼaal Tiuxh. Atz xoʼvataq epaʼvin s-vatz. Jitetz taʼn kuxh enimat tuulbʼal uvaʼs at in sexoʼl, pet aʼl tel enimataʼ, kʼuxh yeʼl vet in at in sexoʼl.