Versets bíblics populars de 2 Koriintios 10

Comparteix

Aʼetz u txumbʼale tetz u nimla tiqleʼm quBʼaal Tiuxh nik qubʼanbʼe tiʼ teesal iqʼij inqʼa yol uvaʼ nik kuxh itxhok inqʼa xaol tiʼ teesat imol t-bʼey. Tul nik qal inuqul uvaʼ kantxhaq vitxumbʼal inqʼa xaol uvaʼ nik taqʼ bʼen tibʼ s-nim, tan nik motx imaq inqʼa xaol tiʼ tootzaqil quBʼaal Tiuxh. Tul nik qubʼokʼtzii inqʼa xaol tiʼ ijalput viyaabʼla txumbʼal uvaʼ, aʼ u palsa yolil nik ibʼan taʼn. Tul aʼ laʼ motx inima vet kam uvaʼ nik isaʼ quBʼaal JesuKriisto, eche nik tiqʼot bʼen sol joloq xaol s-pereexhoil uvaʼ palsan yol kuxhtuʼ.

Tan jit ech nik inbʼan tiʼ inkʼulelat, atz tiʼ inkolt vibʼ vatz inqʼa nik yojon ok in, eche nik ibʼan xaol tiʼ ikolt tibʼ, inqʼa jit niman tetz Jesuus. Pet aʼ nik inbʼan jatvatzul inqʼa txumbʼal tetz u nimla tiqleʼm quBʼaal Tiuxh tiʼ teesal iqʼij inqʼa nik itxhiʼan tiʼ inqʼa bʼaʼnla txhaq yol tiʼ Jesuus, atz tiʼ teesal iqʼij inqʼa nik itxhiʼan s-viʼ. Tan ech nik inbʼan tiʼ inkolt vibʼ vatz inqʼa nik itxhiʼan s-viʼ, eche tokebʼel tatibʼal sol, tetxhal ikoʼpun.

Antxhte qʼaoq uvaʼ, in alam aanima. Poro jit ech koq nik inbʼan tiʼ intxhʼaʼoin, eche nik ibʼan inqʼa xaol, inqʼa jit niman tetz Jesuus.

Tan jaʼl uvaʼ junt kuxh nik toksa iqʼij, eche nik ibʼan inqʼa xaol sexoʼl, tul aʼetz uvaʼe yeʼ laʼ etzaqʼbʼe. Pet aʼ laʼ etzaqʼbʼe jabʼil uvaʼ quBʼaal Tiuxh nik oksan iqʼij tiʼ u tiqleʼm.