Tan jatvaʼl uvaʼ nik tetxha tibʼ tiʼ invaʼq saatxh, tan tira yeʼxhkam invaʼtoʼq kam nik motx toksa tiviʼ. Pet tira nik motx ikʼaq tibʼ tiʼ ikʼulux invaʼq kokos tzeʼ uvaʼ laʼ aqʼax jaʼ tiviʼ s-txʼaqaʼm. Aloq u txʼaqaʼm uvaʼe, tan at ipalebʼal. Petetz koq oʼ, tan aʼ toq qaqʼvat yaʼl tiʼ ikʼulux u qutxʼaqaʼm uvaʼ toq taqʼ quBʼaal Tiuxh s-qe uvaʼ yeʼl paqul laʼ qʼaji. Iletz in, nik vaqʼ yaʼl tiʼ inimal u quBʼaal Jesuus, echetz laʼ inkʼulte vintxʼaqaʼm. Tan jit ech nik inbʼan tiʼ inqʼexaʼ, eche vaʼq xaol uvaʼ loqʼs kuxh nik iqʼexaʼ; tul yeʼxhkam vaʼq s-tiʼil nik qʼexka. Atz jit ech nik inbʼan, eche vaʼq xaol uvaʼ loqʼs kuxh nik tel iqʼabʼ viʼ kaqiqʼ, tul yeʼxhabʼil invaʼq at s-vatz tiʼ tetxhat tibʼ tiʼ iqʼost tibʼ s-tuchʼ.