Versets bíblics populars de Romanos 12

Comparteix

Oonáatɨ na pꞌekꞌau eujãdepema ijãadakꞌaa beerãpa oopatakꞌa. Mãɨrãpa kꞌĩsiapata ãchia oo kꞌinia pꞌanɨdepai. Parã jõdee, kꞌĩsiadaipia bɨ Akꞌõrepa kꞌinia bɨkꞌa. Mãgá kꞌawaadaitꞌee Akꞌõrepa kꞌinia bɨ ne–inaa pia, kꞌachia wẽe; ne–inaa irua pia akꞌɨpari.

Ɨ̃pemaarã, mɨa nãga ũraaitꞌee: Tachi Akꞌõrepa eperãarã chupɨria kꞌawaapari perã, atꞌãri chokꞌai pꞌanɨ misa, oopítɨ Tachi Akꞌõremaa irua kꞌinia bɨkꞌa pɨ ome. Mãgá pãchi pꞌekꞌau kꞌachia ooyaa bɨ kꞌapꞌɨa pꞌoyaadai, pꞌanapataadaitꞌee Akꞌõrepa kꞌinia bɨkꞌa. Ichiaba mãgá akꞌɨpidai parãpa wãara Tachi Akꞌõre kꞌinia iru pꞌanɨ.

O–ĩa pꞌanadaipia bɨ nɨ pꞌanɨ misa Tachi Akꞌõre eujãdee wãdaitꞌee. Choodaipia bɨ nepɨrade baaidakꞌãri. Ichita ɨtꞌaa tꞌɨ̃pataadaipia bɨ Tachi Akꞌõremaa.

Kꞌĩrakꞌaupai ne–inaa kꞌachia oodai. Ma kꞌãyaara kꞌachia pꞌoyáatɨ ne–inaa pia oo pꞌanɨpa.

Chikꞌinia pꞌanapataadaipia bɨ, tachi ëreerã ome pꞌanapatakꞌa. Audua pꞌanadaikꞌaraa bɨ. Ma kꞌãyaara awaraa ijãapataarã pipɨara akꞌɨdaipia bɨ tachi kꞌãyaara.

Awaraarã tꞌãri jĩpꞌa kꞌinia iru pꞌanadaipia bɨ. Ne–inaa kꞌachia kꞌĩra tꞌãdoo oodaikꞌaraa bɨ. Mãgee ne–inaa unuamaa iru pꞌanapatáatɨ. Pia aupaita jɨrɨdaipia bɨ oodaitꞌee.

Awaraarã nepɨra jɨrɨyaa pꞌanɨ mĩda, parã jõdee kꞌãiwee pꞌanapatáatɨ chĩara ome.

Ɨ̃pemaarã kꞌiniarã, kꞌĩra jõ–ee pꞌananáatɨ. Ma kꞌãyaara ichiakꞌau bɨ́tɨ, Tachi Akꞌõrepa ãrapa oodapꞌedaa akꞌɨmerã mãikꞌaapa miapimerã ichia kꞌinia bɨkꞌa. Mɨa mãga jara bɨ Akꞌõre Ũraa pꞌãdade jara bairã: ‘Mɨa aupaita eperãarãpa oopata akꞌɨpari jaraitꞌee pia wa kꞌachia. Mɨata pꞌekꞌau kꞌachia oopataarã miapiitꞌee.’

Kꞌoo–idaa pꞌanadaikꞌaraa bɨ. Tꞌãripa oodaipia bɨ Akꞌõre Jaurepa oopi bɨkꞌa. Mãgá oodaitꞌee Tachi Waibɨa Jesucristopa oopi kꞌinia bɨkꞌa.

Tachi Akꞌõrepa mɨ pia ooji mɨ jɨrɨtꞌerakꞌãri parãmaa jarateemerã. Maperã mɨa ũraaitꞌee parãdepema apidaapa kꞌĩsianaadamerã: “Mɨ pipɨara bɨ awaraarã kꞌãyaara”. Ma kꞌãyaara kꞌĩra jĩpꞌa jɨrɨipia bɨ Akꞌõrepa oopi kꞌinia bɨ mãikꞌaapa tꞌãripa mãga ooipia bɨ, ɨtꞌaa iidi bɨ misa irua kꞌaripamerã.

Awaraarãpa parã kꞌachia oodakꞌãri, aukꞌa oonáatɨ. Ichita ne–inaa pia óotɨ awaraarãpa unudamerã Cristo kꞌaurepa parãpa ne–inaa pia oopata.

Tꞌãri aukꞌa pꞌanadaipia bɨ awaraa ijãapataarã ome. Jĩpꞌa jɨrɨdaipia bɨ Akꞌõrepa parãmaa oopi kꞌinia bɨ. Kꞌĩsiadaikꞌaraa bɨ parã awaraarã kꞌãyaara pipɨara pꞌanɨ. Aukꞌa kꞌõpꞌãyo meraadaipia bɨ chupɨria beerã ome mãikꞌaapa pꞌaratꞌara beerã ome. Audua pꞌanadaikꞌaraa bɨ.

Awara ãi ichiaba jara bɨ: ‘Eperãpa pɨ kꞌĩra unuamaa iru bɨ pɨrã, nãgá ooipia bɨ. Mãgɨ́ jarrapisia bakꞌãri, nekꞌopíji mãikꞌaapa opisia bakꞌãri, ne–inaa topíji. Mãgá ooru pɨrã, iru kꞌĩra nejasiapiitꞌee mãikꞌaapa irua pɨmaa kꞌachia oo kꞌinia bɨ oo–e pai.’

Awaraarãpa parã jɨrɨdakꞌãri ne–inaa kꞌachia oodaitꞌee, ɨtꞌaa iidítɨ Akꞌõrepa ãra chupɨria kꞌawaamerã mãikꞌaapa bendiciamerã. Iidináatɨ Akꞌõrepa ãra maldiciamerã. Awaraarã o–ĩa pꞌanadakꞌãri, aukꞌa o–ĩa pꞌanadaipia bɨ. Jõdee tꞌãri pꞌua pꞌanadakꞌãri, aukꞌa jẽedaipia bɨ.

Awaraa ijãapataarã chupɨria kꞌawaadaipia bɨ mãikꞌaapa ne–inaa wẽe pꞌanɨ pɨrã, ãramaa teedaipia bɨ. Awaraarã pãchi tꞌãide pꞌasia chedakꞌãri, tꞌãri pia auteebaidaipia bɨ. Kꞌãidaitꞌee wẽe pꞌanɨ pɨrã, pãchi tede kꞌãipítɨ.

Tachi kꞌapꞌɨade nãgee ne–inaa chokꞌara iru bɨ; bɨɨrɨ tꞌɨaitꞌee; jua ne–inaa jitaitꞌee; mãgee ne–inaa. Ma chaachaa ne–inaa awara–awaraa oopari. Aukꞌa oodakꞌaa. Mãga pɨkꞌa bɨ tachi Cristode ijãapataarã. Tachi jõma araa pꞌanɨ iru ome. Mapa aukꞌa araa pꞌanɨ apemaarã ijãapataarã ome kꞌapꞌɨa apai bɨkꞌa.