Versets bíblics populars de Retaꞌ Ahun-hunut 27

Comparteix

Maut he Uisneno nasanut pinis naꞌko neno, he namriab ma nasnaub ho renen! Maut he In nfee ko penaꞌ-makaꞌ nho-hoen, ma ho pooꞌ anggur sin nafuan nho-hoen. Uuf-uuf of anjarin ho aten sin, Ma uuf-uuf naꞌko pah-pah of naꞌruriꞌ ma nhormaat ko. Maut he ho muprenat ho aom-bian sin ok-okeꞌ, ma sin arsin of anriꞌtuun nbin ho humam ma ho matam. Sekau es reꞌ ankaas ko, sin of napenin kasat amsaꞌ. Mes sekau es reꞌ anfee ko tetus, sin of napenin tetus amsaꞌ.”

Rarit naiꞌ Esau naꞌuab am nak, “In napoi kau no nua goen. Nahunu te, in napoi kau ma ntoup naan au hak aan moen unu. Oras ia, in napoi kau ntein ma ntoup naan au tetus. Etun in kaan ee ‘Yakop’. Mes ho mmuiꞌ tetus bian antein he mfee kau, oo?” (Kanaf Yakop in oetn ii ‘nnaaꞌ haen ꞌtikan’. Mes in oten bian ‘apoit’.)

Rarit naiꞌ Isak nataah in anah naiꞌ Esau mnak, “Ho ꞌmoin maan of naꞌroo naꞌko reen amriat ein, ka tiit fa pinis nsaun naꞌko neno he napeet ho afun. Ho suin aan of es anfee ko he mmoin. Mes maski on mee-mee msaꞌ, ho mjair ate meu ho oriꞌ. Suma karu ho mraban mubeiꞌ je, of naꞌ ho mufetin maan om muꞌko in aꞌniman.”

Anneen on naan ate, naiꞌ Esau noik aamf ee piut am nak, “Aam, ho mmuꞌi haa tetus meseꞌ, aa oo? Au ꞌtebes, ho of ammuꞌi mtein bian. Maski aanꞌ-anaꞌ msaꞌ, reko!” Onaim in nmurai nkae ntein.