Arabic, North Levantine Spoken: العامية اللبنانية بالقافية (Portions)

العامية اللبنانية بالقافية

حافظ سبحانُه على وعدُه للنبي نوح (عليه السلام) بنجاتُه هو وكلّ الحيوانات يلّي معُه بالسفينة. وبعت رياح عالأرض ونقّص مستوى الميّ. وانسدّت الينابيع وسكّرت مزاريب السما، وانقطعت الميّ ووقَّف المطر. ونزل مستوى الميّ عن الأرض شوي شوي وبعد خمس تشهُر من بداية الطوفان استقرّت السفينة عجبال أراراط. وبعد شهرين ونص، نقصت الميّ أكتر وبيّن راس الجبال. وبعد أربعين يوم فتح نوح (عليه السلام) الشباك تبع السفينة، وبعت غُراب صار يروح ويجي لحدّ ما نشّفت الميّ عن الأرض. بعدين بعت حمامة حتى يكتشف إذا نشفت الميّ عالآخر. والحمامة ما لقِتْلا مطرح عالأرض لأنّه الميّ كانت بعد ما نشّفت، ولمّا رِجعِت مدّ نوح إيدُه وفوّتها عالسفينة. ورِجِع بعتا بعد سبع تيّام، ووقتا رِجعِت المسا وبتمّا عرِق زيتون أخضَر، قام عرِف إنّه الميّ خفِّت كتير. ورجع بعتا بعد سبع تيّام بس هالمرّة ما رِجعِت. وبعد عشر تشهُر ونص من الطوفان وتحديدا لمّا كان عمر نوح (عليه السلام) ست ميّة وسنة، نقصت الميّ كتير عن الأرض ورفع عليه السلام غطا السفينة وشاف إنّه سطح الأرض تقريباً نشّف، وبعد شهرين تانيين نشّفت الأرض نهائياً.

أوحى سبحانُه لنوح (عليه السلام) وقلُّه: "ضهار إنتَ وزوجتك وولادك وزوجاتُن من السفينة، واطلوق سراح كلّ الحيوانات والطيور يلّي معَك، حتى ترجَع تتكاتَر، وهيك ضَهَروا كلُّن، وبنى نوح منصّة من الحجر حتى يقدّم قرابين من الحيوانات والطيور يلّي بتندبح، وقدّمها لالله تعالى. ورضي سبحانُه عنها وقبلها وعمل عهد بِقول: "مش رح أخرُب الأرض مرّة تانية بسبب الإنسان، بالرغم من إنّه الإنسان عطول قلبُه مايِل للشرّ من هوّ وصغير. وما رح إهلُك كلّ كائن حيّ متل ما عْمِلت. وما دامت الأرض باقية، فالزرع والحصاد، البرد والحرّ، الصيف والشتا، الليل والنهار، باقيين وما رح تنقطع دورتُن أبداً."

Escolta قصص من كتاب التكوين 8