នទ្រី​ត្រោក នែស​នតូ លែៈ​រាងោច​អាប់​នតីល​នទើ លែៈ​រាងោច​អាប់​នតីល​មពោមពា​(ឆ្យុម) កោរាញ​ឞ្រាស​ញជេង​ជេស​លែៈ​ផ្យៅ​ទាទេ​ដ៝ង់។ ត៝ត់​នារ​ពើស កោរាញ​ឞ្រាស​ជាន​លែៈ​នទើ​នើស​លែៈ​ជេស​លែៈ​ផ្យៅ ជេសរី​ពាង់​គុ​ទើម​ឞាស​ជាន​ការ​តា​នារ​ពើស​អី​នៃ។ កោរាញ​ឞ្រាស​អ៝ន់​នាវ​គែស​ជេង​តា​នារ​ពើស​អី​នៃ កើប​នារ​អី​នៃ​ជេង​នារ​ខ្លៃ​ជេង​នារ​ក្ល៝ស​អ្វែស យ៝រ​លាស​នារ​អី​នៃ​ពាង់​គុ​ឞាស​ទឹង​លែៈ​នទើ​ពាង់​ជាន​ពាង់​ញជេង​នើស។ នទ្រី​នាវ​ងក៝ច​នតើម​គែស​ត្រោក​នតើម​គែស​នែស​នតូ។

ឞើស​នោក​ ឞ្រាស​យេហោវា  ​ញជេង​ត្រោក ញជេង​នែស​នតូ តើម​ឆី​អេ​ហ៝ៈ​គែស​ហ៝ន ឞា​ទូ​ងក៝ង​អេ​ហ៝ៈ​គែស​ដ៝ង់ យ៝រ​លាស​ ឞ្រាស​យេហោវា  ​អេ​ហ៝ៈ​អ៝ន់​គែស​ទាក​មីស​តុប​តា​នែស​នតូ​អ្យា ឞូនុយ្ស​មា​ជាន​មីរ​មោ​ហ៝ៈ​គែស​ដ៝ង់។ គែស​ទាក​លោស​នហោល​តាៈ​ឞើស​នែស​ទើម​ឞែៈ​លាម​នែស​នតូ។ ជេសរី​ ឞ្រាស​យេហោវា  ​ឆ៝ៈ​នែស​មោយ​ជាន​ម៝ន​ទូ​ហ្វេ​ឞូនុយ្ស ពាង់​ខោម​នហ៝ម់​លាប់​រ៝ៈ​ត្រោម​មុស​ឞូនុយ្ស​អី​នៃ ជេសរី​គែស​នហ៝ម់​គែស​ឆ្វាន ជេង​រេស​ប្លឺ​នទ្រី​ពាង់​ហែស។ ឞ្រាស​យេហោវា  ​អ៝ន់​គែស​ទូ​មល៝ម់​មីរ​តា​ឞ្រី​ អេដែន  តា​នតុក​មពែស​មា​លោស​នារ​នៃ ជេសរី​ឆ៝ៈ​ឞូនុយ្ស​អី​ពាង់​ម៝ន​ជាន​នើស​លែវ​គុ​តា​នតុក​មីរ​អី​នៃ។ ជេសរី​ ឞ្រាស​យេហោវា  ​អ៝ន់​តើម​ឆី​តើម​គ្លែ​អាប់​នតីល​ហ៝ន​ដែស​ព្រូ​តាៈ​ឞើស​នែស អ្វែស​ងាន់​អ្វាញ់ នទ្រែល​មា​គែស​ព្លៃ​ឆា​កាស​ដ៝ង់។ តា​ងក្លាង​ងគូល​មីរ​អី​នៃ​គែស​តើម​ឆី​ឞារ​តើម តើម​ឆី​អី​ទូ​តើម​រី​អ៝ន់​មា​នាវ​រេស តើម​ឆី​អី​ទូ​តើម​រី​ជឹត​អ៝ន់​មា​គឹត​នាល់​នទើ​អ្វែស​នទើ​អ្យើស​ដ៝ង់។ គែស​ទូ​មល៝ម់​នហ៝ង​លោស​តាៈ​ឞើស​ឞ្រី​ អេដែន  ​ហ៝ច​រ៝ៈ​មីរ​អី​នៃ ជេសរី​នហ៝ង​អី​នៃ​គែស​ញចាស​ព្វាន់​អឹ​នហ៝ង​ដ៝ង់​លោស​ឞើស​នហ៝ង​អី​នៃ។ ទូ​មល៝ម់​នហ៝ង​រាញា​ ពីហុន  ហ៝ច​ងក្វែ​ងក្វាច់​រ៝ៈ​ឞ្រី​ ហាវីលា  នតុក​ឞ្រី​អី​គែស​មាយ្ស។ មាយ្ស​អី​លោស​តាៈ​ឞើស​នតុក​អី​នៃ​អ្វែស​ងាន់ ជេសរី​គែស​ដ៝ង់​នតាក់​ឆី​បោ​កាស នទ្រែល​មា​លុ​ខ្លៃ​រាញា​ ដៃកៀម  ។ នហ៝ង​ត៝ល់​ឞារ​រាញា​ កីហូន  អី​ហ៝ច​ងក្វែ​ងក្វាច់​រ៝ៈ​ឞ្រី​ កុស  ។ នហ៝ង​ត៝ល់​ពែ​រាញា​ ហីដេកែល  ហ៝ច​មពែស​មា​លោស​នារ​មា​ប៝ន​ អាឆើរ  ។ ជេសរី​នហ៝ង​ត៝ល់​ព្វាន់​រាញា​ អើប្រាត  ។
ជេសរី​ ឞ្រាស​យេហោវា  ​ឆ៝ៈ​ឞូនុយ្ស​អី​ពាង់​ជាន​ម៝ន​នើស​អ៝ន់​គុ​តា​មីរ​ អេដែន  ​អី​នៃ នហ៝​មា​ដាៈ​ឞូនុយ្ស​អី​នៃ​គុ​ម៝ត់​អ្វាញ់​ដ៝ង់។ ឞ្រាស​យេហោវា  ​ដាៈ​ឞូនុយ្ស​អី​នៃ ពាង់​លាស៖ “លែៈ​រាងោច​ព្លៃ​ឆី​ព្លៃ​គ្លែ​តា​មីរ​អ្យា​មៃ​ឆា​ទាទេ​មោ​ច្រាវ​វាៈ តីស​មា​តា​ព្លាង់​តើម​ឆី​អ៝ន់​មា​គឹត​នាល់​នទើ​អ្វែស​នទើ​អ្យើស គ៝ប់​មោ​អោស​អ៝ន់​មៃ​ឆា មោ​អ៝ន់​មៃ​ឆា​វាៈ លាស​មៃ​ឆា​មៃ​ខឹត​នារ​នៃ​រ៝”។
ជេសរី​ ឞ្រាស​យេហោវា  ​មឹន​អេង៖ “លាស​អ៝ន់​ឞូនុយ្ស​អ្យា​គុ​ទូ​ហ្វេ​អេង​លិច​អ្វែស​អោស លាស​នទ្រី​គ៝ប់​ជាន​តៃ​ទូ​ហ្វេ​ឞូនុយ្ស​ជឹត​អ៝ន់​មា​ពាង់​គុ​នទ្រែល​តឹម​កើល​ឞាល់”។ នោក​ ឞ្រាស​យេហោវា  ​ញជេង​មពោមពា​(ឆ្យុម)​ទឹង​លែៈ​នើស ពាង់​ឆ៝ៈ​នែស​ម៝ន​អាប់​នតីល​មពោមពា​(ឆ្យុម)​តា​នែស​នតូ អាប់​នតីល​ឆ្យុម​មពារ់​តា​កាលើ​ត្រោក។ ជេសរី​ ឞ្រាស​យេហោវា  ​លែវ​ទឹង​លែៈ​មពោមពា​(ឆ្យុម)​អី​នៃ​មា​ឞូនុយ្ស យ៝រ​លាស​ ឞ្រាស​យេហោវា  ​អុច​គឹត​អា​មើម​ឞូនុយ្ស​អី​នៃ​តេៈ​រាញា​អ៝ន់​មា​មពោមពា​(ឆ្យុម)​ទឹង​លែៈ​អី​នៃ ជេសរី​មពោមពា​(ឆ្យុម)​ទឹង​លែៈ​គែស​រាញា​តឹង​ឞូនុយ្ស​តេៈ​រាញា​អ៝ន់។ ឞូនុយ្ស​តេៈ​រាញា​លែៈ​រាងោច​មពោមពា​(ឆ្យុម)​តា​ឞ្រី តា​ប៝ន នទ្រែល​មា​ឆ្យុម​មពារ់​តា​កាលើ​ត្រោក​ដ៝ង់។ យើន​មា​មោ​អោស​ឆៃ​គែស​ទូ​នតីល​នទើ​មា​ឞ្លាវ​តឹម​កើល​ឞូនុយ្ស​អី​នៃ មា​ឞ្លាវ​គុ​នទ្រែល​ពាង់។
នទ្រី​ ឞ្រាស​យេហោវា  ​អ៝ន់​ឞូនុយ្ស​អី​នៃ​លេត​ឞិច ឞ្រាស​យេហោវា  ​ឆ៝ៈ​ទូ​មល៝ម់​នតីង​ពាយ្ស​ឞូនុយ្ស​អី​នៃ ជេសរី​ញជឹរ​លើយ​មលៃ​អ៝ន់​ជឹរ។ នតីង​ពាយ្ស​អី​ ឞ្រាស​យេហោវា  ​ឆ៝ៈ​តាៈ​ឞើស​ឞូនុយ្ស​អី​នៃ​ពាង់​ជាន​ជេង​ឞូ​អូរ ជេសរី​លែវ​ឞូ​អូរ​អី​នៃ​អ៝ន់​មា​ឞូនុយ្ស​ឞូ​ក្លោ​អី​នៃ​នើស។ ឞូនុយ្ស​អី​នៃ​លាស៖
“ឞូនុយ្ស​អ្យា​រ៝​នតីង​អី​ឆ៝ៈ​តាៈ​ឞើស​នតីង​គ៝ប់
មលៃ​អី​ឆ៝ៈ​តាៈ​ឞើស​មលៃ​គ៝ប់
គ៝ប់​ក្វាល់​ពាង់​រាញា «ឞូ​អូរ»
យ៝រ​លាស​ពាង់​នើស​លោស​តាៈ​ឞើស​ឞូ​ក្លោ”។
យ៝រ​មា​កើត​នទ្រី​ទឹង​ឞូ​ក្លោ​លោស​ទូ​ឞើស​មែ​ឞឹ ហាន់​គុ​អា​អូរ ជេសរី​ឞារ​ហៃ​ខាន់​ពាង់​នៃ​ជេង​អូរ​ឆាយ​ជេង​ទូ​រាង្លៃ​ឆាក់។
នោក​នៃ​លែៈ​ឞារ​ហៃ​អូរ​ឆាយ​ខាន់​ពាង់​នៃ​គុ​លាហោក មោ​គែស​នាវ​ដីត​ព្រេង​ដេៈ​រ៝។

Escolta នាវ​នតើម 2

Escolta នាវនតើម 2