Mahte 19
19
Myi Làng Gâng É Hkyô
Mrk 10:1-12
1Yesuq gi, mhoqshit é dang haú pé lé ban taí jáng, Galile mau mai htoq ló mù, Yodan làng tû-tap mâ é Yuda mau má ê jé ri. 2Byù mòqmó gi, Yhâng htâng cháng kô é nghut mù, Yhang gi, haú bang mâ é nòhpyo hui bang lé, haú má lhoqgê byî ri.
3Haú hkûn, Hparishe pé ra-am gi, Yhâng chyáng lé jé kômù, Yhang lé chyam wú é dông, “Byù rayùq gi, hai hkyô mai nghut nghut, yhûmsing é yhang myi lé lhoqkâng pyâm le, târâ wang lhê lhú?” ga myî akô.
4Haû jáng, Yhang tû taî é gi, “A-nham sânghi lé, Hpân Sû, ‘byù hpan é hkûn, yùqgè eq myiwe lé hpan é nghut lhê.’#A-pûn 1:27 ga le, 5‘Hau é yánmai, yùqgè gi, yhûmsing é înu îwâ chyáng mai htoq luî, yhang myi eq rahá rading ralhum za kut nyî mù, yhángnhik gi, gùngsho ralhum za dùt byùq kôrâ nghut lhê.’#A-pûn 2:24 ga le kâ tô é lé, núngmòq a nghap wú kó lhú? 6Haû mù luî, yhángnhik gi, í yùq a nghut lô é za, rayùq za dùt bê nghut ri. Haû mù luî, Garai Gasang lhoqtsûm tô é lé, byù gi, a lhoqkang sháng gàq.” gâ ri.
7Haú hkûn, yhángmòq gi, “Haû nghut le nhîng, yùqgè rayùq gi, lhoqkang laiká za ká byi mù, yhang myi lé wó nhang pyâm lhê ga, haî mù, Mosheq, hkunmó hkyô tô lhê lhú?” ga, Yhang lé dum taû myî akô.
8Haû mù, Yesuq gi, “A-nham sânghi mai gi, haú dông a nghut. Nghut kôlhang, núngmòq é myìt nhiklhum htân kô é yánmai, núngmòq é yhang myî pé lé lhoqkang râ ahkáng, Mosheq byî tô é ru nghut lhê. 9Ngò, núngmòq lé taí kôlé, sulàng lú é za a nghut jáng, yhûmsing é yhang myi lé kâng pyám mù, myiwe gótû dum hâng yu é sû ó yùq nghut kôle, su-myi lú é sû dùt bê.” ga, yhángmòq lé dum tû taî ri.
10Haú hkûn, haû chángzô pé gi, “Myi làng hkyô má haú dông ru nghut le gi, a yu le lháng je ge nyo ri.” ga taî akô.
11Haû mù, Yesuq gi, “Yùq hkangmó gi, dang haú lé wó hàp yu é a nghut, wó hkâm râ jeju wó é bang za shèq, wó hàp yu é nghut lhê. 12Byù ra-am gi, înû ûnghkaû mai yhang, yùqgè a jé gû hku lé lo é bang nghut akô; ra-am gi, góbâng èq kut é yánmai, yùqgè a jé dùt byùq akô; ra-am nghut jáng, mauhkûng mîngdán é matú, yùqgè a jé râ dông kut yu pyâm akô nghut ri. Shí hkyô lé wó hàp yù sû gi, hàp yù sháng gàq.” ga dum taî ri.
Zoshâng Wuì Eq Yesuq
Mrk 10:13-16; Luk 18:15-17
13Hau htâng, Yesuq mai zoshâng wui htoq má lòq ke mù, shimân byi sháng gàq ga, zoshâng wuì lé Yhâng chyáng shuî lé lo akô. Haû chángzô pé kúm gi, haû shuî lé lô bang lé lhom tân hkûm akô nghut ri.
14Nghut kôlhang, Yesuq gi, “Haû zoshâng wuì lé, Ngá chyáng lé nhâng keq; yhángmòq lé hkâhkûm zing to kó; hkâsu mù gâ le, mauhkûng mîngdán gi, haû sû é bâng é mîngdán ru nghut lhê.” ga taî kat ri. 15Yhang gi, zoshâng wui htoq má lòq ke shimân byi mù, haú jowò mai htoq ló bê nghut ri.
Sùt Wó É Zorâm Rayùq É Hkyô
Mrk 10:17-31; Luk 18:18-30
16Byù rayùq gi, Yesuq chyáng lé jé mù, “Sará ê, ahtum abyùq é chyungxe wó yû râ matú, ge é múzó haî kut ra râ lhú?” ga myî ri.
17Haû jáng, Yesuq gi, “Ge é hkyô eq séng luî, haî mù Ngo lé myî lhê lhú? Ge é Sû gi, rayùq za nyi lhê. Nàng, chyungxe dui é má wàng nau é nghut le gi, jep é târâ pé lé cháng aq.” ga tû taî ri.
18Haú yùq gi, “Hká gû lé lhú?” ga dum myi jáng, Yesuq gi, “‘Byù hkâsat, su-myi hkâlú, hkâhkau, a teng a mán é sàksé hkâhkám, 19náng nu náng wa lé hkúngga hpautap aq.’#Htoq Ló 20:12-16; Târâ Pun 5:16-20 ga le, ‘náng gûng lé nàng chyitdàp é su, náng é chyáng nâm mâ é bang lé le chyitdàp àq.’#Nhông 19:18 ga le bo tô ri.” ga taî kat ri.
20Haú hkûn, zorâm hpó haû gi, “Haú pé bànshoq lé, ngò cháng bê nghut lhê; haî kut râ ashî lhú?” ga dum taû myî ri.
21Yesuq gi, “Nàng, gúmjùp sû dùt nau le gi, ló mù, nàng wó é sùtzè pé lé ûng pyám luî, myùng bang lé byî pyám aq; haû jáng, nàng, mauhkûng htoq má sùtzè wó râ nghut lhê; haû mù, Ngá htâng lé cháng aq.” ga tû taî ri.
22Zorâm hpó haû gi, sùtzè gyai wó sû nghut é yánmai, dang haú lé wó gyo jáng, gyai yhang myìt a ngón é èq ló byùq bê nghut ri.
23Hau htâng, Yesuq gi, Yhâng é chángzô pé lé, “Ngò, núngmòq lé teng za taí kôlé, sùtzè wó bang gi, mauhkûng mîngdán wó wâng râ gyai yhang wuî ri. 24Hau htoq agó, Ngò, núngmòq lé taí kôlé, sùtzè wó sû rayùq, Garai Gasâng é mîngdán má wó wâng râ htoq, gola-uk radu âpno mai wó wang lai râ gi, je luì râ nghut lhê.” ga taî ri.
25Haû chángzô pé gi, haû su gâ é lé wó gyo kôjáng, “Haû ru nghut le gi, ó yùq za hkyi yu é hui râ nghut lhê lhú?” ga, Yhang lé myî akô nghut ri.
26Haú hkûn, Yesuq gi, yhángmòq lé wú kat mù, “Haú hkyô lé byù mai gi, wó kut râ a nghut; nghut kôlhang, Garai Gasang gi, lhúnglháng lé wó kut é Sû nghut lhê.” ga taî ri.
27Haú hkûn, Petiruq gi, Yhang lé, “Ngá-mòq gi, wó é gû lhúnglháng lé tô pyâm to luî, Náng htâng cháng bê nghut lhê. Ngá-mòq, haî wá wó râ nghut lhê lhú?” ga myî kat ri.
28Haû mù, Yesuq tû taî é gi, “Ngò, núngmòq lé teng za taí kôlé, lhúnglháng lé asik dum saî dùt nhang é má, haû Byu Yhangzo gi, Yhâng é hpungwup bo é hkóhkâm tángmyhâng má zùng tô é hkûn, Ngá htâng châng é bang núngmòq le, hkóhkâm tángmyhâng raxe í lhûm htoq má zung to kômù, Isira-elaq a-myû raxe í hú lé jéyáng kôrâ nghut lhê. 29Ngá é yánmai, yhûmsing é yhûm, nhiktâng wuì, înu îwa, zodù wuì eq yò pé rajung jung lé tô pyâm tô é sû ó yùq nghut kôle, rashô tú a-kyû myô jàt shoq wó râ nghut é htoq agó, ahtum abyùq é chyungxe le, wó yû râ nghut lhê. 30Nghut kôlhang, hí nghut nyi é bang myo myo gi, htâng gyó byùq kôrâ nghut mù, htâng gyó nyî bang yùq gi, hí bekô râ nghut lhê.
Цяпер абрана:
Mahte 19: znot
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2025, Wycliffe Bible Translators, Inc.