Lituto za Siraki 38
38
Matuku ni milyani
1U kuteke ñaka ka likute le li
mu swanela bakeñisa musebezi wa hae.
Ni yena n'a bupilwe ki Muñ'a Bupilo.
2Bona bualafi luli kasibili bu zwa
ku Mulimu,
sina mpo ye zwa ku mulena.
3Zibo ye ñata ya mu hulisa
mi i mu fumanela likute mwahal'a
ba batuna.
4Mulimu u tisize milyani kuli i be
teñi mwa lifasi
mi ya butali h'a na ku i nyaziseza.
5 #
Mut 15.23-25
Kana sibala sa kota ne si si ka
natifisa mezi,
ili ku bonisa maata a yona?
6Kamukwaoswana u file liñaka zibo
ili kuli ba tabe ka maata a misebezi
ya hae.
7U itusisa likota kwa ku alafa
ni ku folisa matuku,
mane liñaka ba eza milyani
ka ku i zwaka?
8Kabakaleo misebezi ya hae ha i feli,
mi ka yena, bupilo bo bunde
bu ambakani lifasi kaufela.
9Mwan'a ka, ha u kula
u si ke wa felelwa ki sepo.
U lapele ku Muñ'a Bupilo
mi u ta ku folisa.
10U tuhele bumaswe bwa hao
mi u lukise mikwa ya hao
ni ku kenisa pilu ya hao kwa libi
kaufela.
11U eze sitabelo ka insense ni kupuzo
ya bupi bo bu nekile hahulu,
mi u eze sitabelo se sinde
ka m'o konela kaufela.
12Mi cwale u fe ñaka sibaka,
kakuli ni yena u bupilwe
ki Muñ'a Bupilo,
mi u si ke wa mu tuhela a ku siya,
kakuli wa mu tokwa.
13Fokuñwi u ta kona ku tusa.
14Ni bona liñaka ba kupa Mulimu
kuli a ba fe tuso ya ku feza butuku
ni ku folisa, kuli ba puluse bupilo.
15Mukuli wa fosa fapil'a Mulimu,
haiba a hana litaelo za ñaka.
Malilo
16 #
Litu 22.11-12
Mwan'a ka, u lilele mufu
mi u bokolole hahulu ku bonisa
butuku bwa maswabi a hao a mwa pilu.
U mu buluke ka mukwa o lukela,
mi u si ke wa hana ku kuteka libita
la hae.
17U lile hahulu ni ku bokolola ka tata,
mi u silise ka mw'a lukela
ku silisezwa mufu,
i ka ba lizazi li li liñwi kamba
a mabeli, ku hanisa linonge,
mi cwale u kale ku ambolisana ni
banabahenu.
18Maswabi a matuna a kona
ku tiseza mutu lifu,
mi pilu ye utwile hahulu butuku
i tokwisa mutu maata.
19Maswabi a matuna a mwa pilu a fele
ka kepelo,
kakuli bupilo bwa maswabi a matuna
hahulu
bu filikanya ngana.
20U si ke wa lumelela pilu ya hao
ku kenelwa ki maswabi.
U itobohe mi u hupule
ka za mafelelezo a hao.
21U si ke wa libala kuli ha ku na
ya kuta,
ni kuli ha u koni ku tusa mufu.
U ta ikolofaza feela ili wena.
22“Hupula bumai bwa ka,
kakuli ni wena, bu ta ba bwa hao.
La maabani ne li la ka.
Kacenu ki la hao.”
23Mufu a sa bulukwa feela,
ku yena ku felile.
Mu si ke mwa ikataza,
moya wa hae ha u s'o zwile.
Misebezi
24Nako ya pumulo
ki yona ye fumanisa muñoli sibaka
sa ku ba ni butali.
Mutu ya sa ezi lika ze ñata
u kona ku ba ni butali.
25Mulimi u ta kona cwañi ku ba ni
butali,
kanti muhupulo wa hae o mutuna
ki ku itusisa tupa.
H'a kwaeza lipulu za hae, ni ku nahana
ka za musebezi wa zona,
h'a na makande a sili haisi a likomu.
26U beile pilu ya hae kaufela
kwa mifolo y'a lukisa,
ni manzibwana kamukana u patehile
ku uta mankomwana a hae.
27Ku cwalo ku mubeleki ni ku sikwala
kaufela.
Ba sebeza busihu ni musihali.
Ba ba lukisa maswayo,
kamita ba lika ku nahana
ka bukabali bo bunca,
ba beile lipilu za bona kwa
ku likanyisa lika mo li inezi luli,
mi ba iteekezi ku kondisa hande
musebezi.
28Cwale kihona mw'a inezi mumbuti.
H'a inzi kwatukw'a noto ya hae,
u nahana mw'a ka tulela lisipi
za hae.
Buhali bwa mulilo bu mu cisa
litalo
h'a nz'a tukufalezwi
mwa mufutumala wa mulilo.
U toliywa ki mwenge w'a tulisa,
mi meeto a hae a talimile feela
fa mufuta wa s'a tula.
U isize pilu kwa ku feza musebezi
wa hae,
mi u iteekezi ku loleka s'a ezize.
29Hape kihona mw'a inezi mubupi
wa lizupa ya kwa musebezi wa hae.
H'a nz'a sikulula wili ka mahutu a hae,
a zwelapili cwalo kamita a tokomezi
musebezi wa hae,
ku nyanganya kwa munwana o muñwi
ni o muñwi
ku nze ku tokomezwi hande.
30U mbambata lizupa ka lizoho la hae
ni ku li luba ka mahutu.
U beya pilu ya hae kwa ku kondisa
musebezi
mi u iteekezi ku kenisa liyulo.
31Ba kamukana ba sepile mazoho
a bona,
mi yo muñwi ni yo muñwi
u bukwala mwa musebezi wa hae.
32Munzi n'o si ke wa yahwa kwand'a
bona,
mi ne ku si ke kwa ba ni miyaho
kamba misipili.
33Kono ha ba tokwahali
kwa mukopano
mi ha ba na litulo ze tuna
mwa kopano.
Ha ba ini fa lipula za baatuli,
mi ha ba zibi hande milao.
34Ha ba bonahali ku ba ba ba itutile
ni ku ba ni zibo ya likatulo,
mi ha ba fumanehi mwahal'a baezi
ba linguli.
Kono ba zwelapili mwa misebezi
ya bona ya mazoho
mi litapelo za bona li ama feela
za misebezi ya bona.
Цяпер абрана:
Lituto za Siraki 38: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.