Mateu 23
23
Jesu u lemusa batu kuli ba tokomele Baluti ba Mulao ni Bafalisi
(Mar 12.38-39; Luk 11.43, 46; 20.45-46)
1Cwale Jesu a bulela kwa nyangela ni kwa balutiwa ba hae. 2A li, “Baluti ba Mulao ni Bafalisi ba filwe maata a ku toloka Mulao wa Mushe. 3Kabakaleo, mu swanezi ku mamela ni ku eza ze ba mi bulelela kaufela. Kono mu si ke mwa likanyisa likezo za bona, kakuli ha ba ezi ze ba luta. 4Ba tama mitiyo ye bukiti, mi ba i kulekisa batu, kono bona ha ba lati ku ba tusa ka ku swala kwateñi nihaili ka munwana feela. 5#Mat 6.1; Lipa 15.38; Mul 6.8 Ze ba eza kaufela, ba li eza kuli ba bonwe ki batu. Mu bone butuna bwa likwama za litimana za Mulao ze ba lwezi fa lipata ni fa mazoho a bona. Mu lemuhe ni butuna bwa mingundo ya liapalo za bona. 6Ba lata hahulu libaka ze kutekeha mwa mikiti, ni lipula ze kwa pili mwa masinagoge. 7Ba lata hahulu ku lumeliswa ka likute mwa mapatelo ni ku bizwa ki batu ka libizo la Muluti. 8Mina, mu si ke mwa bizwa ka libizo la Muluti, kakuli kaufel'a mina mu bana ba mba, mi mu na ni Muluti a li muñwi feela. 9Mi mu si ke mwa biza mutu mwa lifasi ka libizo la Ndate, kakuli Ndat'a mina ki a li muñwi feela, ili yena ya kwa lihalimu. 10Hape, mu si ke mwa bizwa ka libizo la Muzamaisi, kakuli muzamaisi wa mina ki a li muñwi feela, yena Mesia. 11#Mat 20.26-27; Mar 9.35; 10.43-44; Luk 22.26 Yo muhulu mwahal'a mina a be yena mutang'a mina. 12#Luk 14.11; 18.14 Mutu ni mutu ya ta ipahamisa u ta kokobezwa, mi ya ta ikokobeza u ta pahamiswa.
Jesu u nyaza muipo wa Baluti ba Mulao ni Bafalisi
(Mar 12.40; Luk 11.39-42, 44, 52; 20.47)
13“Bumai bwa mina ki bo butuna, mina Baluti ba Mulao ni Bafalisi, baipi! Mu kwalela batu Mubuso wa Lihalimu. Ha mu keni mwateñi mina, mi ba ba lata ku kena mwa ba hanisa!
14“Bumai bwa mina ki bo butuna, mina Baluti ba Mulao ni Bafalisi, baipi! Mu putelela limbelwa. Mu ba uzweza mandu a bona mu nze mu ba puma-puma ka ku ba ezeza litapelo ze telele! Kabakaleo, katulo ya mina i ta ba ye maswe ka ku fitisisa!
15“Bumai bwa mina ki bo butuna, mina Baluti ba Mulao ni Bafalisi, baipi! Mu zamaya mu feza mawate ni mafasi ku fumana mutu a li muñwi feela ya ka ipulela, mi ha mu se mu mu fumani, mu mu eza ya swanela ku kena habeli mwa lihele, sina mina!
16“Bumai bwa mina ki bo butuna, mina baeteleli ba libofu! Mu luta batu, mu li, ‘Haiba mutu a konka ka Tempele, ha ku na s'a itamile ka sona. Kono h'a ka konka ka gauda ya mwa Tempele, yo u itamile luli.’ 17Mina libofu za likuba! Sa butokwa ki sifi? Ki gauda nji, kamba ki Tempele ye kenisa gauda? 18Mi hape mu luta kuli, ‘Haiba mutu a konka ka katala ka ka kwa Tempele, ha ku na s'a itamile ka sona. Kono h'a ka konka ka mpo ye fa katala, yo u itamile luli.’ 19Mu libofu ze cwañi mina! Se situna ki sifi, mpo ye fa katala kamba kona katala kasibili ka ka kenisa mpo yeo? 20Kamukwaocwalo, mutu h'a konka ka katala, u konka ka kona ni ka limpo ze ku kona kaufela. 21H'a konka ka Tempele, u konka ka yona kasibili ni ka Mulimu, yena ya pila mwateñi. 22#Isa 66.1; Mat 5.34 Mutu h'a konka ka lihalimu, u konka ka lubona lwa Mulimu ni ka yena ya inzi fateñi.
23 #
Malivi 27.30
“Bumai bwa mina ki bo butuna, mina Baluti ba Mulao ni mina Bafalisi, baipi! Mu fa Mulimu nto i liñwi ku ze lishumi ili za miloho ze mu fumani, ze cwaleka minta, ni anisi ni kumini, mi ha mu isi pilu kwa lituto ze tuna ze mwa Mulao, ze swana sina tuto bakeñisa ku luka, ku ba ni musa ni busepahali cwalo. Ze, ki zona ze mu swanela ku eza, mu sa tuheli ze ñwi. 24Mina bazamaisi ba ba shwile meeto! Mu toola nzi ye mwa sino sa mina, kono mu miza kamele!
25“Bumai bwa mina ki bo butuna, mina Baluti ba Mulao ni Bafalisi, baipi! Mu tapisa likomoki ni mikeke ya mina kwande, kono mwahali ku nze ku tezi lika ze mu fumani ka ku uzwa ni ka ku lakaza ze maswe. 26Wena, Mufalisi ya shwile meeto! Tapisa pili mwahal'a komoki, mi ku ta kena ni kwande!
27 #
Lik 23.3
“Bumai bwa mina ki bo butuna, mina Baluti ba Mulao ni Bafalisi, baipi! Mu swana ni mabita a basizwe busweu, a bonahala bunde kwande, kono mwahali ku tezi masapo a bafu ni lika ze bolile. 28Ni mina cwalo, kwande batu kaufela ba bona kuli mu lukile kono mwahali ku tezi muipo ni bumaswe.
Jesu u bulela ka za katulo ya Baluti ba Mulao ni Bafalisi
(Luk 11.47-51)
29“Bumai bwa mina ki bo butuna, mina Baluti ba Mulao ni Bafalisi, baipi! Mu ezeza bapolofita mabita a mande, mi mu kabisa mabita a ba ba pilile bupilo bo bunde. 30Mu li, ‘Kambe ne lu li teñi mwa linako za bo kukw'a luna, kambe ne lu si ke lwa eza ze ba ezize, ili ku bulaya bapolofita.’ 31Kamukwaocwalo, mu itumelela hande-nde kuli mu ba lusika lwa babulai ba bapolofita! 32Hakulicwalo, mu zwelepili, mu feleleze ze ne ba kalile bo kukw'a mina! 33#Mat 3.7; 12.34; Luk 3.7 Mina linoha, bana ba libili! Mu ka banduka cwañi katulo ya ku atulelwa lihele? 34Kifohe, mu teeleze! Ni ta mi lumela bapolofita, ni ba ba butali ni baluti. Mu ta bulaya ba bañwi ba ku bona, ba bañwi mu ta ba kokotela fa sifapahano, mu ta natela ba bañwi mwa masinagoge a mina, mi mu ta ba lelekisa mwa minzi kaufela. 35#Sim 4.8; 2 Lita 24.20-22 Kamukwaocwalo, katulo ya pulao ya batu ba ba si na mulatu kaufela i ta ba fahalimw'a mina, ku kala ka pulao ya Abele ya n'a lukile ku tisa ku ya Zakaria, mwan'a Barakia, ye ne mu bulaezi mwahal'a Tempele ni katala. 36Ni mi bulelela niti, ni li, ‘Katulo ye lukela lipulao zeo kaufela, i ta ba fahalimw'a batu ba ba pila ka nako ye.’
Jesu u lilelela Jerusalema
(Luk 13.34-35)
37“Mawee, Jerusalema, Jerusalema! Wena ya bulaya bapolofita ni ku pobaula ka macwe ba ba lumilwe ku wena ki Mulimu! I se li hakai ni batile ku kopanya bana ba hao sina kuhu ha i kubukanya tuzwinyani twa yona kwatas'a mafufa a yona, kono u hanile! 38Cwale, ndu ya mina i ta mi siyalela ili matota feela. 39#Lipi 118.26 Ku zwa hona fa, na mi bulelela, ha mu sa na ku ni bona hape, ku fitela ha mu ta li, ‘Mulimu, u tohonolofaze ya taha ka libizo la Mulena.’ ”
Цяпер абрана:
Mateu 23: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.