Buka ya Pili ya Makabaeusi 14
14
Litumbo za Simoni
1Ka silimo sa mwanda ka mashumi a supile ni ze peli Mulena Demetriusi a kopanya makuta a mpi ya hae mi a ya mwa Media kuli a y'o fumana tuso ya ku lwanise Tirifo. 2Arasakesi mulena wa Peresia ni Media, h'a utwa kuli Demetriusi n'a s'a keni mwa naha ya hae, a luma yo muñwi wa bazamaisi ba hae ba ndwa ku y'o mu swala a nz'a pila. 3Nduna yo a ya, a y'o tula mpi ya Demetriusi mane a mu swala mi a mu tisa ku Arasakesi. Yena a mu beya mwa tolongo.
4Ka nako ya puso ya Simoni naha ya ba mwa kozo.
A hupula hande ka za sicaba sa habo,
mi batu ba tabela hande puso ya hae,
ni maata a hae mwa bupilo bwa hae
kaufela.
5Ka maata a hae kaufela a matuna
a hapa Jopa, a u eza likamba la hae,
mi a fumana ka ona nzila ya kwa lioli
za mwa liwate.
6A hulisa milulwani ya sicaba sa habo,
a nz'a busa naha ya habo.
7A hapa batanga ba bañata.
A tula Gezeri, Beti-Zuri, ni Sisabelo
sa mwa Jerusalema.
A lataka lika ze si ka kena mwateñi,
mi ha ku na ya kile a itwanela ku yena.
8Batu ba lima naha ya bona ka kozo,
naha ya ba ni lico ze ñata,
mi likota za mwa libala za beya miselo.
9Bahulu ba impumulela hande
mwa mikwakwa,
mi makande a bona kamukana
n'e li a bupilo bwa bona bo bunde.
Micaha ba apala maata ni liapalo
za ndwa.
10A fumanela minzi lico ze tokwahala
kamukana,
ni ku i sileleza ka makwakwa
ni lilwaniso,
ku fitela libubo la hae li y'o utwahala
ni kwa mafelelezo a lifasi.
11A tiisa kozo mwa naha,
mi Isilaele a ba ni tabo ye tuna.
12Mutu ni mutu a ikinela mwatas'a
kota ya hae ya veine ni ya feiga,
mi ne ku si na ya n'a ka ba sabisa.
13Ne ku si na sila se si kile sa siyala
mwa naha ku ba lwanisa,
mi ka ona mazazi ao, malena ne ba
pyatilwe.
14A tiisa ba ba ne ba ishuwile
mwahal'a batu ba habo
mi a shandaula libangoki
ni ba ba maswe kamukana.
15U lwanela ku tiisa ni ku buluka
Mulao,
mi a lukisa Tempele sinca
ni ku i kenisa.
A i kabisa ka linkwana ze nca
ze kenile.
Majuda ba swalisanwa sinca ni Masipata ni Baroma
16Ha se ku zibahala kwa Roma, mane ni mwa Sipata, kuli Jonatani u shwile, batu ba swaba hahulu. 17Kono ba utwa hape kuli mwanahabo yena Simoni u ngile sibaka sa hae ku ba muprisita yo muhulu ni mubusi wa naha hamoho ni minzi ya mwateñi. 18#1 Mak 8.22 Kapili-pili ba mu ñolela fa matapa a kopa ka za tumelelano ya silikani ni swalisano, ili ze ne ba ezize pili ni banabahabo, bo Judeasi ni Jonatani. 19Liñolo leo la balelwa, sicaba se si kopani mwa Jerusalema.
20Liñolo le ne li zwa kwa Masipata ki le, li li,
“Luna babusi ni muleneñi wa Sipata lu lumelisa Simoni muprisita yo muhulu, ni bahulu, ni baprisita, hamohocwalo ni sicaba sa Majuda kamukana. 21Lindumeleti bo mu lumile kwa batu ba luna ba lu zibisize za maata ni likute la mina, mi lu tabile hahulu ha ba til'o lu potela. 22Lu ñozi litaba za zibiso ya bona mwa libuka za mikopano ya nyangela cwana, ‘Numeniusi mwan'a Antiokusi ni Antipata mwan'a Jasoni, lindumeleti za Majuda, ba tile ku luna ku t'o eza sinca litumelelano za silikani sa bona ni luna. 23Mi batu ne ba tabezi hahulu ku amuhela batu bao ka likute, ni ku buluka liñolo la manzwi a bona mwa libuka za litaba za naha, ili kuli batu ba Sipata ba te ba kone ku li hupulanga. Hape ba lumela Simoni muprisita yo muhulu le liñwi ka manzwi a swana.’ ”
24Mwamulaho wa zeo, Simoni a luma Numeniusi kwa Roma, a lwezi tebe ye tuna ya gauda ya bukiti bo bu eza likilo ze mashumi a mane ka ze ne ku y'o tiisa bulikani ni swalisano ya bona ni Baroma.
Ku lumbwa ni ku huliswa kwa Simoni
25Likezo ze ha li se li bihezwi batu, bona ba li, “Lu ka bonisa cwañi tabo ku Simoni ni bana ba hae? 26U yemi ka maata, yena ni banabahabo, mane ni ba mba ya ndat'ahe kaufela. U lwanisize ni ku leleka lila za Isilaele, mi u i fumanezi tukuluho.” Cwale ba ñola manzwi fa matapa a kopa mi a pahekwa fa misumo ili fa Lilundu la Sione. 27Manzwi a liñolo leo ki a.
“Ka la bulishumi ni supile ka li li liñwi la kweli ya Elelu mwa silimo sa mwanda ka supile ni ze peli, ili silimo sa bulalu sa puso ya Simoni muprisita yo muhulu ya maata, lu filwe zibiso mwa lapa la Tempele. 28Zibiso ye lu filwe mwa mukopano o mutuna wa baprisita ni batu, bazamaisi ba sicaba ni bahulu ba naha, ne i lu zibisize cwana. 29Ka nako ya lindwa Simoni, mwan'a Matatiasi wa mba ya Joaribi, hamoho ni banabahabo ba ipeya mwa kozi, mi ba lwanisa lila za sicaba sa habo bona, ku sileleza sibaka sa bona se si kenile ni Mulao, mi mane ba tumisize hahulu sicaba sa habo bona. 30Jonatani a kile a kopanya sicaba sa habo, a ba yena muprisita wa bona yo muhulu, kono a shwa mi a y'o bulukwa ku ba lusika lwa habo. 31Lila za bona za lela ku kena kuli li t'o lwanisa naha, ka mulelo wa ku sinya sibaka sa bona se si kenile. 32Kono cwale Simoni a zuha mi a lwanela sicaba sa habo. A sinyeza bufumu bwa hae kamukana fa ku lekela balwaneli ba sicaba lilwaniso, ni litifo za bona. 33A sileleza minzi ya Judea ni Beti-Zuri kwa mululwani wa Judea ko ne li bulukela lila lilwaniso kale, mi yena a beya mwateñi makuta a masole ba Majuda. 34Hape a sileleza Jopa wa fa likamba la liwate ni Gezeri wa fa milulwani ya Azoto, ili sibaka se ne si li sa lila. A beya mwateñi Majuda, mi a ba tusa ka ze ne tokwahala ku ba konisa ku tiya. 35Batu ha ba bona busepahali ni maata a n'a na ni ona kwa ku tusa sicaba sa habo, ba mu keta ku ba mueteleli ni muprisita wa bona yo muhulu kabakala zona likezo za hae z'a n'a ezize, niti ni busepahali bw'a n'a na ni bona kwa sicaba sa habo, ni kabakala kuli u likile mw'a n'a konela ku buluka likute la naha ya hae.
36“Ka nako ya puso ya hae, ni ka zamaiso ya hae, batu ba kona ku zwisa bahedeni mwa naha hamoho ni ba ba ne ba li mwa Munzi wa Davida mwa Jerusalema, ili sona Sisabelo mo ne ba zwanga bahedeni ku y'o lwanisa ni ku sinya mwa matuko a sibaka se si kenile, ba nze ba sinya ni ku si silafaza maswe. 37A beya mwateñi masole ba Majuda, a si tiisa kuli i be sisilelezo sa naha ni muleneñi, mi a tiisa mamota a Jerusalema. 38Ka ku eza cwalo, Mulena Demetriusi a mu hulisa ku mu eza yena muprisita yo muhulu. 39A mu eza yo muñwi wa Balikani ba hae ni ku mu hulisa hahulu. 40N'a utwile kuli Baroma ba biza Majuda kuli ki balikani, batusi, ni banabahabo bona. N'a utwile hape kuli ne ba amuhezi lindumeleti ba Simoni hande ka likute le lituna.
41“N'a utwile ni kuli Majuda ni baprisita ba lumezi kuli Simoni a be yena mueteleli wa bona kuya kuile, a nz'a li yena muprisita yo muhulu cwalo ku fitela fo ku ta fumanehela mupolofita ya sepahala. 42Hape ne ba lumelelani kuli i be yena mulen'a bona kaufela, ya ku talima za sibaka se si kenile ni manduna ba ba zamaisa misebezi, ku busa naha, ni ku talima za lilwaniso ni makwakwa. 43Ki yena yo muhulu wa sibaka se si kenile mi mañi ni mañi u na ni ku mu utwa. Mañolo a muso kamukana mwa naha n'a na ni ku ñolwa ka libizo la hae. N'a na ni ku apala siapalo sa bulena ni mikabo ya gauda.
44“Ne ku si na mutu ufi kamba ufi kamba muprisita ya n'a ka hanyeza litumelelano zeo, ku ñañisana ni manzwi a hae, kamba ku eza mukopano kai ni kai mwa naha kwand'a ku lumelelwa ki yena. Hape ha ku na ya n'a lumelezwi ku apala siapalo sa bulena kamba ku ba ni pini ya mendulu ya buhulu, haisi yena. 45Mutu kamukana ya hanyeza kamba ku hana litumelelano ze, u ta fiwa mulatu.
46“Batu kamukana ba lumelelana ku fa Simoni tukelo ya ku sebelisa milao yeo. 47Simoni a lumela ku ba muprisita yo muhulu, ku ba muzamaisi yo muhulu wa ndwa, mubusi wa sicaba sa Majuda ni baprisita, ni ku ba yena yo muhulu mwa linto kaufela.”
48Ba laela kuli zibiso yeo i ñolwe fa matapa a kopa, mi a bewe mwahal'a sibaka sa Tempele ili sibaka se si bonahala hande. 49Ba laela ni kuli mañolo, a swana ni lona leo, a swanezi ku bulukwa mwa pulukelo, ni kuli a te a kone ku fumanwa ki Simoni ni bana ba hae.
Цяпер абрана:
Buka ya Pili ya Makabaeusi 14: Lozi09
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Lozi Interconfessional Bible, Catholic Edition © Bible Society of Zambia, 2009.