1 Tesalonik 5
5
1Nutipá nupian insaná ɛ́ pɔ́núɔ́ŋɛn é púúpú púyoosonée puɔ́s kúnyaánɛ kisikɛl. 2Nuémenyen panɔ́ muɛ́t peseé kése ɛ́ɛ́ puɔ́s pú Ɔkɔ́n óókoólon ɛlɛɛ́ eŋépi ne putúk. 3Aká pɛɛnd peem ɔ́nyíɔyɔnɛ́ ɛ́ɛ́ tunyi é kiyeéwe, tunyi ɔ́ pilɔŋ pí inyáti, káakáani kindíkítíkɛ punyím ányíkuaninɛ pɔ́ ɛlɛɛ́ akáandɔ́ muɔ́nɔ́ menyipulu wɔ, nipínɔɔ́n tiányipá. 4Maná panúɛ paandimán nutipá kí imbíne, ɛ́ɛ́ puɔ́s pukáaní núpeletenyi ɛlɛɛ́ eŋépi. 5púnyɛ ɛ́ɛ́, Panɔ́ peem nunyɛ paán pé kisie, paán pɔ́ puɔ́s: tutipá tɛ́ pé putúk, tɛ pí imbíne. 6Tutipítímán kɔk niaŋ ní pɔsɔ́k, ínyiɛ́lɛ́ túpá pɛɛnyɔ túond tutipusupɔs. 7Epé pápitimanɛ ápítiman ne putúk, epé pótukoné ótukon ne putúk. 8Maná pasɔ́ tunyiɛ́ pɔ́ puɔ́s, tutipusupɔs, ínyiɛ́ túpílɛŋɛ́ mɛlɛŋ mé pitíí má kuátap ni iŋɔyɔ, pipíóndínyí ɔtɛ́m pi kisótio pá ipɔtɔ́ yiásɔ í pitíí. 9Á kiákí ɛ́ɛ́ Támbák timatúpílikɛn ɛ́ɛ́ útúpɛn, maná ɛ́ útusóti kɔ́ Ɔkɔ́n Yésus Kilíis. 10Umeékú kásɔ́ ó pusíó ɛ́ɛ́, tɛ tusɔ́tɔn, tɛ tupá pekúén túsɔ́tɔn papílatán kɛ́ɛ́yɛ́. 11Énupíekényí kɔk ilúndɛ panúɛ na panúɛ núond núkɛnkɛn nɔ ɔlɔŋ aná nú kanyiɛ kuɛlɛ.
Insúŋɛ sí kusúkin ni imbíkélie
12Paandimán tuɔnúɔyɔn ɛ́ɛ́ núɔ́pínɔn epé pɔ́kɔtɔnɛ́ɛ káánɔ́ ɛ́ kikɛtɛ́kɛtɛ́ɛ, pánúkíkanɛ́ ɛ́ kisiɛ́n kí Ɔkɔ́n póond pánúfán insúŋɛ; 13ánupián iŋupinɔ puólíkóoli nɔɔpɔ́, ni iŋɔyɔ, ó puólí púɔ́p. Ɔ́nusɔ́tɔ́n é kiyeéwe panúɛ na panúɛ. 14paandimán tuákand ɔnúɔyɔn ɛ́ɛ́, ánukalá ɔ panɔn, ánuákán ilúndɛ epé pátínyípá posol apian kutáam; nuákinan epé pɔ́fɔyɔnɛ́ ɔmbɔk, énuésépényényí mɔɔnd kitikit. 15Ánupá ni inséti kí imbalá ɛ́ɛ́ tɛ mɔɔnd utiondínyí kilɔk nɔ kilɔk, maná anuambá peseé káanɔ́ ɛ́ kikɛ́kɛtɛ́ andíkɛk na mɔɔnd kitkit.
16Ánupáán ká anyamɔ́ kisikɛl kitikit. 17Onupísókólónyi kisikɛl kitikit, 18énulémbésí Támbákɛ́ɛ á puandá kitikit, ákiákíɛ́ kuɔyɛt kú Támbák kukáánɛ́ káánɔ́ ó pusíó é Kilíis Yésus. 19Nutikányi no puólí pú emfúnkufúumɛ, 20nutifénén tukál tú peémí mekelié má Támbák; 21ánuanúná maandá kitikit ni indɛ́mbɛ́n, núɛ́tikin epú púnyiɛ́ peseé; 22ánupínyáŋá epú kitikit púnyiɛ́ kilɔk. 23Inyiɛ́ Támbákɛ́ɛ u kiyeéwe el ɛ́ɛ́ nupá pɛ́ɛ́yɛ́ mulút, andíkɛ́k ɛ́ɛ́ úkííka kiliínditíe, pumuundɛ puán nɔ tuɔ́l túán ɛ́ mapá kati kipalalá aká Ɔkɔ́n waasɔ́ Yésus Kilíis ányíandɛɛ́ kuol. 24Ewú u núpílanɛ́ nyɛ nulátát: wɔ́ andíkɛ́k wuónyíwónosíe. 25Paandimán, ónupísókólónyí kákánɔ kásɔ ó pusío. 26Énupíkélítí paandimán peem nukɔ́lɔn pɔ́ kisas niaŋ ní paandimán. 27Yiónúpísókolonyi, ɛ́ kisiɛ́n kí Ɔkɔ́n: ánuanúnin pekilísitɛn peem ɔmbɔp ewue. 28Inyiɛ́ ɔtɛ́m peseé ú Ɔkɔ́n waasɔ́ Yésus Kilíis pá naanɔ.
Цяпер абрана:
1 Tesalonik 5: yav
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2026, CABTAL