Ruma 1
1
Zlapzatana a həji aagi
1Pul, ala ma ɗal zlən ataa Yesu Kərist, ndə Bizlaf a yazə a ɗa ala ta zlən tə, ndə a mayə aska a ɗaf Ma wiyə ma təwah ataa Bizlaf. 2Ma wiyə ma təwah watsa, Bizlaf taghalazə ka a vələ ambəɗa tə gwara ara həji ma ɗaf ma ndə aa zlima ara aagi a Ɗerewal ma ghwaɗeɗe. 3Ma wiyə ma təwah watsa a zlap ata Mbə tə, Bay Madagal takwa Yesu Kərist ma mbəwha a həji ma dəgnak, ata shiŋ Dawda ma ɗa jiji tə. 4Gwara ara Miɗ ma ghwaɗeɗe, Bizlaf taghalazə ka a wəzaha ɓərɓər tə a ɗa Mbə Bizlaf, ndə a garazə a wəzəm a taba həji ma bazl ta aagi. A ɗa Yesu Kərist Bay Madagal takwa. 5Gwara ara sha abə sa lima sənma ataa Bizlaf aska sa aɗa ala ta zlən tə, aska a tsa sləf ata Kərist, aska sa adaaha həji ma ndza aŋge a manahayak aagi tiwtiw, aagi alamzə ɗal awa, abə hawanə a zləm tə, 6huni tə yəm, huni a taba həji ndə Yesu Kərist a yaata aagi. 7Huni həji ma ndza a Ruma aagi tiwtiw, ndə Bizlaf a kamayata aagi, huni həji ndə Bizlaf a yaata ma ghwaɗeɗe aagi, sənma abə təwah ataa Bizlaf Vava takwa abə ataa Bay Madagal Yesu Kərist mandza abə huni.
Pul abə həji Kərist ma ndza a hayak Ruma aagi
8Diw tə kwagwa ci, sa kaɗalanə wasiy a Bizlaf naka gwara ara Yesu Kərist dawna huni tiwtiw: ara ndə aa kazlap a manahayak tiwtiw ata ɗal awa kuni. 9Ndə sa kaɗaf Ma wiyə ma təwah ataa Mbə Bizlaf, sa ɗalanə zlən a Bizlaf abə ꞌunəf naka ŋtaguleŋ. Azha sha tə, a kasənə sa zlap ŋter: ndə sa katarha, sa kaya zləm kuni pal, 10kala ndə sa katarha, sa katarə aska sa alima təf a nda ara huni abə may tə. 11Ara ndə a ɗa, sa tamay bəz a guɗaŋ a nda gərazahuni, aska a daahuni səkən ma ɓəlaakaka ataa Miɗ ma ghwaɗeɗe, aska huni alima ŋgalaŋ a ɗal awa. 12Səkən ma kajaɓaka ara huni ci, aska həji alima ŋgalaŋ a walaŋ takwa, ara huni a ɗal awa takwa, gwara ara ɗal awa ma dzəvahəji. 13Zlina mana həji Kərist aagi, sa may huni sən ka ci, sa tadeŋ zhin dagala aska sa anda ara huni, ama pa anawatsə, sa talima a nda səku. Sa may ci, zlən naka maɗa səkən ma təwah ara huni andza ndə a ɗa təwah ara həji maparam ndiɓi aagi. 14Zlən naka ci, tsa nja ka ata həji ma wirwir aagi abə ata həji ma bam ta aagi, həji ma kasən səkən aagi tiwtiw, zhana ata həji ma ŋkula sən səkən aagi. 15Sha ana ndə sa deŋi yəm, a ɗafahuni Ma wiyə ma təwah, a huni həji Kərist ma ndza a hayak Ruma aagi.
Ɓərɓər ataa Ma wiyə ma təwah
16Ara ndə a ɗa, haw a kadzaka ara Ma wiyə ma təwah ataa Yesu səku, sha ana ɓərɓər Bizlaf, gwara ara ana reh həji ma kaɗal awa aagi, Yahuda aagi mpər, a diwzha tə həji ma ŋkula sən Bizlaf aagi. 17Ara ndə a ɗa, Ma wiyə ma təwah a kaghal ci: Bizlaf a sən həji aagi andza həji ma dəlili aagi, dawna ɗal awa ta a Yesu, ɗal awa watsa teete. Taŋtiraya a Ɗerewal ma ghwaɗeɗe iŋgaya: Ala ma kaɗalanə awa a Bizlaf ci, a ɗa ala ma dəlili, azha ikwa abə a alima miɗ.
Mpət ataa həji ma ŋkula ɗa Yahuda aagi
18A wəzəm a wəzlaf, Bizlaf a kaghalha ghuɗek tə dawna ndə həji aagi kaɗal mpət, zhana aa kaɗal səkən ma gamak. Gwara ara zlən ta ma gamak aagi, aa tatak ŋter aka a ɗal zlən. 19Ara ndə a ɗa, səkən ndə həji kaaɗa kula a sənə ata Bizlaf ci, ara təmta taghalaya ghwaɗeɗe, ara ndə a ɗa Bizlaf abə ha tə taghalatana bəza katkadək. 20Ɓərɓər Bizlaf ma ndza ka kwa vepiy, zhana sha tə abə ha tə, aa ɗa səkən ma gber ndə həji ŋkula gərata aagi. Ama ꞌwa aka ata diw baha manahayak ya, wirwir kula a sənata bəza gwara ara səkən ndə a ɗalata aagi. Ɗal tuh ara həji ma dəgnak atama tə akas. 21Ara ndə a ɗa, aa kasən Bizlaf, ama aa tavəlanə sləf akas, zhana aa taɗalanə wasiy a Bizlaf akas. Avəli ci, sha ana səkən ndə həji kaaɗalanə a Bizlaf. Aɓa azha ci, deŋ ŋkwaɓ ta tabəw tə gamak ikwa, ꞌunəf ta ma bam tə tafəcak weɗ la bəza. 22Aa kadeŋ ka ci, ni tawirwir cini, ama aa ɗa həji ma kawək aagi. 23Həna aagi ahawanə a sləf Bizlaf ma ŋkula mca, ama aa tsa kanda ta a hawanə a səkən aagi. Səkən watsa aagi ɗa həji ma dəgnak ma kaabazl ta aagi, aka səku vigin aagi, səkən ŋgas aagi, abə səkən ma kanda abə mabəra aagi.
24Sha ana ndə Bizlaf a mbaslata ka a dadawər dawna ndə aa kaɗal zlən ma gamak ndə zlikusəm ta a kamayə aagi, azha ikwa abə aa kadidizh ha ta abə zlən haw aagi. 25Bəw aa bəw ma ŋter ataa Bizlaf aka a gaɗaɗaŋ, dəba aagi ahawanə abə ɗalanə zlən a səkən ndə a bata aagi, a mavəy ndə aa kahawanə a Bizlaf ma kwa vepe ka. Amen! 26Sha ana ndə Bizlaf a mbaslata ka a ɗal səkən ma kavəlatana haw aagi: wali ta aagi kawan abə mawəl aagi akas, aa wan abə wali, aa ɗal səkən ma parpar abəra ndə Bizlaf a ghalə. 27Mawəl aagi, aa ndza ikwa yəm, mbasl aagi wan ma ndza abə wali ka, aa tsa kanda ta a wan abə mawəl aagi, wan ma ndza abə mawəl andza ha kwa ya, bay haw, ikwa abə aa lima ŋgəz a ha ta, ndə zlən ta ma gamak a daatana. 28Ndə aa ŋkula ji a sən Bizlaf ya, Bizlaf tapəlata ka aska aagi aɗal səkən ndə ŋkwaɓ ta a kamayə, azha, aa taɗal səkən ma ŋkula zhiva. 29ꞌunəf ta mkpef abə səkən ma ŋkula a ɗa dəlili aagi tiwtiw, abə səkən ma gamak aagi, ɗa nja aska səkən həji aagi, abə may səkən həji aagi, abə mshiɗ, jaga, jekjek, mbəɗku, aa ɗal səkən haw aagi, 30aa kaɗal ŋgwashŋgwash, aa ɗa həji jaga Bizlaf aagi, ma ra həji aagi, həji ghav aagi, aa kagəl ha ta, aa may ɗal səkən ma gamak pal, aa kahawatana a həji ma mbəwata aagi akas, 31ŋkwaɓ a ha ta akas, aa kaɗal səkən ndə aa ghal ka a ɗalə akas, ꞌunəf ta mgbaŋmgbaŋ ikwa, hahər a nja ta akas. 32Avəli aa kasən ma Bizlaf ŋter ma zlap: aa teete a mca ana həji ma kaɗal səkən ma həna watsə aagi. Ama aa kahats a heɗe a ɗaləs, aa vas a ghalə həji ma kaɗalə andza təmta aagi yəm.
Цяпер абрана:
Ruma 1: GOU
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце