Yirugana Yovapositoli 4
4
OPeturusa naJohanesa komeho zosigongi somasimbi goVajuda
1OPeturusa naJohanesa hava za mokuuyunga nombunga, makura vapristeli wovanene nomupitisili govanomeni wontembeli kumwe noVasadukayi tava va wizire. 2Awo va korere unene komutjima, yeeyi Vapositoli ava vavali va rongere mbunga, oku tava zi udisire asi vafe ngava vhumbuka ngwendi Jesus. 3Awo makura tava va kwata, tava va tura modorongo dogoro taku si, yeeyi ezuva kwa tokere. 4Nye wovanzi ava va zuvhire mbudi zawo, va zi pulire; ano sivaro sovantu tasi ya huru nye ngwendi pomayovi gatano.
5Eyi lya sa ko, makura vapangeli woVajuda nomasimbi gawo novalirongi womatjangwa tava pongo moJerusarema 6kumwe nomupristeli gomunene Anasi naKayifasa naJohanesa naArekisandere nava navenye va heme kekoro yomupristeli gomunene. 7Awo tava tura vapositoli komeho zawo, tava va pura asi: “Omu muna rugana eyi ngapi? Nonkondo musinke muna kara nado ndi medina lyalye muna kurugana?” 8Ano Peturusa tazi mu zura Mpepo zoKupongoka, ta va tantere asi: “Vapangeli one womuhoko nomasimbi gaIsraeli! 9Nsene yiyo muna kutupura oyo yokuhamena sirugana sosiwa, esi vana ruganene mugara gokuvera nomu va mu verura, 10yi diveni namuvenye nomuhoko nagunye gwaIsraeli asi, mugara ogu ana sikama komeho zeni, kuna kangukire morwaJesus Kristusa Munasareta, ogu mwa pamparerere kosilivindakano, nye Karunga yiyo ga mu pindura koufe. 11Jesus yige googu va tjanga asi,
‘Emanya eli va zumbire vatungi,
yilyo lya kara emanya lyemekovhu.’
12Eparu kuligwana mwendi mwelike, yeeyi kutupu hena nampili muntu gumwe gwapeke mouzuni mudima, ogu ga pa Karunga edina lyokutuparura.”
13Masimbi apa ga mwene uradi waPeturusa naJohanesa, va sike po asi awo kapisi valirongi, vantuuntu tupu, makura tayi va tetura. Awo makura tava va nongonona asi, nani kumwe naJesus va kere. 14Nomokumona hena mugara ogu va verwire, nawo ana sikama, namumwe si hena omu nkare va uyunge. 15Makura masimbi taga tantere vapositoli asi va pwage mo monzugo zosigongi, va liyongere ko tanko vene navene. 16Tava lipuragere asi: “Ngapi omu natu va rugana ava vagara? Yeeyi sitetu esi va rugana, poruzera sina kara, ano hena navenye ava va kara moJerusarema va si diva, ose nokuwapa si kusipatana. 17Mokuninka asi ya ha lihanena unene mombunga, tu yi va nyokereni tupu asi va ha sansaikira vantu yuma medina lyaJesus.”
18Makura tava va zigida, tava va tantere asi: “Narumwe si hena rooru asi mu uyunge ndi mu ronge medina lyaJesus.” 19Nye oPeturusa naJohanesa tava va limburura asi: “Nyamweni nyone nomu tokora, asi siwa po kombinga zaKarunga, sokulimburukwa kweni ndi kwaKarunga? 20Yeeyi ose ko nokuwapa si asi tu dire kuuyunga yokuhamena eyi twa zuvha neyi twa mona.” 21Masimbi eyi ga mana kuvanyokera unene, makura taga va sigi va ze, yeeyi kapi ga mwene konda zokuvapa usima, morwa vantu navenye kwa pandere Karunga kweyi ya horokere. 22Nye mugara ogu sa horokerere sitetu esi severuko, kwa kere nonomvhura dokupitakana nomurongo ne ngoso.
Vapuli tava hundire upampi
23Kwa va siga tupu va ze, oPeturusa naJohanesa makura tava tengwire kovakwaawo, tava ka va sansekera nayinye eyi va va tanterere vapristeli wovanene nomasimbi. 24Ano awo eyi va yi zuvha, navenye tava lizi mutjima gumwe mokukanderera Karunga asi: “Hompa Karunga, ove nyove Musiti geguru nevhu nefuta neyi nayinye ya kara mo! 25Nyove wa uyungisisa mukereli goge, zinyakurwetu Ndafita koMpepo zoKupongoka pokutanta asi:
‘Vapagani yinke vana kerere mondjorongani,
ano nombunga yinke dina kugazarera
yininke ya hana mutompo?
26Ohompa wouzuni ou vana liwapaike,
ano masimbi gana pongo,
ga di vyuke Hompa naKristusa gwendi.’
27“Yosili Herodesa naPontiusa Piratusi kwa pongere kumwe novapagani nomuhoko gwaIsraeli mositata esi, va di vyuke muntu goge gokupongoka Jesus, ogu wa gwaveka. 28Awo kwa pongere, va sikisilire mo nayinye eyi ya tokokwa nare mononkango doge nomompango zoge asi ngayi horoke. 29Apa ngesi Hompa, tara nye nontugumuko dawo, ove o kwafe vakereli woge, va udise nonkango doge nomupampi nagunye. 30Ano gonona kuwoko koge ku veruke, ano yidiviso noyitetu yi horokere medina lyomukereli goge gokupongoka Jesus.”
31Awo kwa mana tupu kukanderera, makura evega eli va pongere tali kankama, awo navenye tava zura Mpepo zoKupongoka, makura tava udisa nonkango daKarunga nomupampi.
Eturokumwe lyemona
32Mbunga zovapuli kwa lizire mutjima gumwe, nagumwe si nga tanta asi, “Eyi emona lyange,” nye nayinye kwa yi pakererere. 33Vapositoli ngava gava nomupampi gomunene umbangi wokuhamena epinduro koufe lyaHompa Jesus, ano nkenda zonene kwa kere nanavenye. 34Ano pokatji kawo nagumwe si ga hepere po, morwa navenye ava va kere nomapya nomambo, kwa yi randesere, ano eyi ya tundire mo, 35makura tava yi retere vapositoli. Awo kwa yi gawinine, nkenye ogu tava mu pe pohepero zendi.
36Pwa kere mugara, edina lyendi Josefa, Murevhi va vharera moKipurusa, ogu ngava tumbura vapositoli asi Baranabasa (kutanta asi Muradipiki). 37Age kwa randesere po epya lyendi, makura ta reta yimaliva kovapositoli.
© Egwanekerobibeli Lyanamibia 1987, 2003
© Bible Society of Namibia 1987, 2003