Matyò 2
2
Ghɨ ghɛ ə tɔŋɔ kê ghɛ zɛ ə lìmè pìə ə pə̀yn se kɔʼsə̂ Njisə̀s
1Ə tè piə Njisə̀s ə tɔ̂ŋ ə̀ Petlɛ̀ghêm apàs endaʼ ə Njòndyâkè, ə shɨŋ zɛ ə Ɛlɔ̀t tè nyi fɔ̀yn. Ghɨ yîghe mə tè naynə mlî tɔŋə kê èghɛ zɛ lì mə təm pìə, ə pə̂ Njèlusalɛ̀m, mə ndo apàs kɛ ə zhwize sa ətəyn, 2ghənə ə pfɨfə nə, “Vayn vɛ vàyn ə piə, è nyi sə̂ nyi sə̂ fɔ̀yn ə ghɨ Njûs ghə? Ghàs ə fe lîfè apàs endaʼ kɛ ə zhwize sa ətəyn, mə fe tyə̂nə̀ nə ə piə Vəyn. Ə̀ za nyi eghɛ zɛ ə ghàs pə̀yn se ngɨmnə vəyn.”
3Kə fɔ̀yn Ɛlɔ̀t zɨ ghɛ nə zɨ̂nə̀, ze ə fo ngəʼ sê vəyn nâʼà sə ŋaŋ, paʼsə̂ kə èghɨ ghə kɨ̂m ə Njèlusalɛ̀m. 4Ɛlɔ̀t ə tɔŋnə̂ zûŋtə̀ ə̀ghɨ ə kɔʼsə nə eshyə̀ ə ngaŋtəghe, è tyə̀ynsè sə alàŋ sekɨ̂m. È və ke pfɨf sê ghənə nə, “Ə nyi se nə piə ghayn vɛ ə Zhə̀fè chɔʼ ndə̂m ə?”
5Ghənə ə pə̀ynsə̀ nə, “Ə Petlɛ̀ghêm, apàs endaʼ ə Njòndyâkè. Fɨ̀aʼtè tè nyàʼ ə ŋwàʼlè ə̀ Fèzhə̀ nə,
6‹Sê ghàyn ə ghɨ Petlɛ̀ghemə̀, ə mchi mə Njondàmè,
tə̀ʼ zâynzè nyi tə̀ʼ èkɔʼnə èmɔ̀ʼ ə fètə̂ sètə̀ʼ endaʼa Njondàzè.
Kûmə̀ nə wùə tə fɨə ə ghàyn əfètəyn,
ə è və nyi àtu sê ghɨ ghɨmə ə Isìlây.›”
7Ɛlɔ̀t ə ke nyaʼtə̂ tɔŋɔ əghɨ ghɛ ə tɔŋɔ lìm zâ, ə pfɨfə sê ghənə shîŋə̀ kɛ ə lî nə fɛ tè fɨ ətəyn. 8È və tomə ghənə ə Petlɛ̀ghêm ə piə nə, “Ghàyn ndu tɔʼ kyiŋ vâ ətəyn. Ə ghàyn kyiŋ fe luʼ vɛ ə piə Vəyn ətəyn, gha kɛsə pə̂ tsâ sê mi kə m pɔŋ ndu ngɨmnê vəyn.”
9-10Ghənə ə ndò sè ndûə ə fɨnə fe fèlî fɛ ə ghənə tè fe ə ghənə apàs endaʼke zâ. Kə ghənə fe za sè saŋnə̂ nâʼà àchûŋ. Lî fə ətəyn fe ə ndùə kə ə̂ ghənə shi ə ndùə tyəmə̂ kə etuə èlùʼ vɛ ə tè piə vayn ətəyn. 11Ghənə ə njiə ndûə ə ndɛ. Kə ghənə nji, ə fe vayn yî nyìə vəyn Mèli. Ghənə ə tɨmə ə̀ndzɨs ə və shi ə ngɨmnə̂ vəyn. Ghənə zhə̀nə̀ sèshəyn sə ghənə̂sè ə fo èmâʼte, ə ngôlè,#2.11 Ngôl: Ə̀ nyi àfɨa ke tɛ è kɛve se chwìtè nə Njisə̀s nyi fɔ̀yn è ngwɨl mê lɨ̀mtə̂ mê chùŋə̀m e tɔŋtə̂ nə flaŋkyiŋsèyn,#2.11 Flaŋkyiŋsèyn: Ə̀ tè nyi mngwɨl mɛ ə tè fo foze ətəyn sê Zhə̀fè è mâyl,#2.11 Mâyl: Ə̀ tè nyi mngwɨl mɛ ə tè kɨmnə wùə èkwuə ətəyn nə è və vayn kàʼa è fi sê vəyn.
12Ghənə ə kɛsə̂ kwɨlə̂ ə ghənə endaʼ ndomve endom ə ndôvè kûmə̀ nə Zhə̀fè tè pì sê ghənə ə tsəm nə kə ghənə kɛse ndu sê fɔ̀yn Ɛlɔ̀t.
Njosɛ̀f ə tə ndu è Njisə̀s ə endaʼa Enjìpzè
13Ə̀ tè nyi kə ghɨ ghɛ ə tɔŋɔ lìm zɨə kê èghɛ zɛ m̀ pìə ndô, tsì ə pə̀ sê Njosɛ̀f ə tsə̂m ə pìə sê vəyn nə, “Ndwi ə njìə vayn yî nyì ə tə ndûə è ghənə ə Enjìp. Faŋ fu se zaʼâ kə m tsayn nə ò ndo, kûmə̀ nə Ɛlɔ̀t nə̀ tomə ə̀ghɨ nə ə kyiŋ vayn vɨnə̀ ə zhwi.”
14Njosɛ̀f ə ndwìə ə njìə vayn yî nyì, ghənə ə tə ndûə ə Enjìp è ètuʼu. 15È tè ndam fu se zaʼâ kə Ɛlɔ̀t kwu. Zɨnə mə tè kyàyn nə ghɛ zɛ ə Zhə̀fè tè pì tɔynə̂ ə fɨ̀aʼtè ə̀ vəyn pəyn səmɔʼ nə, “Mə pì nə vayn vɨ̂mè ndo fɨ ə Enjìp.”
Fɔ̀yn Ɛlɔ̀t ə zhwitê ghɔyn endômnèghè ə Petlɛ̀ghêm
16Kə Ɛlɔ̀t tè kote nə ghɨe etɔŋə nə mlì ghɛ ə lesê vəyn, è ve tsɨəfə. È və tsɛ̀sə̀ alâŋ nə ə zhwite ghɔyn endômnè ghəkɨ̂m ə Petlɛ̀ghêm è tə̀ʼtə̂m mə Pɛtlɛ̀ghêmə̀m. È və pìə nə ə zhwite mɨ̂ətə̀m se zhə̀tè ə sepìŋ sèpɛ̀ se tso pə ghɔ pɔ ghɛ ə kwûʼ piə. È tè nəyn zɨ̂yn mə è fɨ̀aʼnə̀ àshîŋə̀ kɛ ə ghɨe etɔŋə nə mlì ghɛ tè tsàyn nə lî fɛ tè fɨ ətəyn.
17Zɨnə tè kyàyn se lwiynsê eghɛ zɛ Zhə̀fè tè pi tɔynə̂ fɨ̀aʼtè Njèlìmayà nə:
18“Ghɨə tè zɨ apɔ̂ŋ epuʼəke è
chîe etɛ ze fɨə pə̂ ə Lamà kə
Làshɛ̀l tè chìə ghɔ və.
Ə tè piə sê vəyn nə kə è fɨyn chi, è ve chîə kə ndò kûmə̀ nə ghɔ vəyn ghə kàynè kwu.”
Njosɛ̀f, Mèli è Njisə̀s ə ndò ə Enjìp ə ndùə ə Nazalɛ̀t
19Ə̀ pə̀ kə Ɛlɔ̀t kwu, tsì ə̀ Pɛ̂pɛ ə pə̂ sê Njosɛ̀f ə tsə̂m endaʼ ə Enjìpzè ə piə nə, 20“Ndwi ə njìə vayn yî nyì, ə kɛse ndûə endaʼ ə Isìlây, kûmə̀ nə ghɨ ghɛ ə tè kyiŋə se zhwi va ə̀təyn ə kwutê” 21Njosɛ̀f ə ndwìə ə njiə Mèli yî vayn, ghənə ə kɛsə̂ ndûə endaʼ ə Isìlâyzè.
22Ə pə̀ kə Njosɛ̀f zɨ nə Àkelùs nyi zhîndɛ̂ ə pɨ̀a vəyn fɔ̀yn Ɛlɔ̀t apàs endaʼa Njòndyâkè, Njosɛ̀f e sè fânə̀ se ndù fu. Tsì ə̀ Fèzhə̀ ə fɨnə fo fɨ̀as sê vəyn ə tsə̂m nə kə è ndu ə Njòndyâ, è və ndùə apàs endaʼa Ngalìlîkè. 23È və ndùə sè ndamə ə tɔ̂ŋ zhîzè e tɔŋtə̂ nə Nazalɛ̀t. Ghɛ zɛ ə Zhə̀fè tè pi tɔynə̂ ə sèfɨ̀aʼtè nə: “Ə tə kê vəyn kə wùə ə Nazalɛ̀t ə pə̀ səmɔʼ.”
Цяпер абрана:
Matyò 2: bfm
Пазнака
Падзяліцца
Капіяваць
Want to have your highlights saved across all your devices? Sign up or sign in