Jøøn 20
20
Kanya Joot Bwöc Jecu Ni Ŋaam
(Mathiew 28:1-8; Maak 16:1-8; Luk 24:1-12)
1'Ba na tïme na täk tïïc#20:1 Täk tïïc manøgø beeye cäŋ man wø cwøl ni Cäŋ Jwøk yïth nïne moi. ka amöölla cøøn ni piny poot cøl, Meeri Magdalin amøøl bäät bwörö ni joot kïdi no odaa dhi bwörö. 2Køøre ena reeŋø ni ci baŋ Cayman Piter ki bääŋ maya, ŋata mëër Jecu ki gø, ni kööe jïge, «Geni dëër Kwäärö ege käl wøk yi bwörö, 'ba kanya kïthge gø yie kucwa.» 3Kanyøgø Piter aö wøk ki bääŋ manøgø ni cige bäät bwörö, 4ni ge rïïŋö bëët. 'Ba bääŋögøøni Piter ajööme ni kwøŋ pïï bäät bwörö. 5'Ba na gääŋe ni neeta yi bwörö, abïï koony ajoode no odööŋ kaace. 'Ba eni kär døny yi bwörö. 6Kanyøgø na pïïc Cayman Piterri na läm køøre, ena døny yi bwörö ni joot abïï koony no odööŋ kaace, 7ki puunhnha näk obøøny wïïe no obanø kur keere, ni ba en røk abïïk koony møga. 8Kanyøgø bääŋa kwøŋ pïï bäät bwörö adøny yie thuwø, ni joot gïnögø, ni put jïëy. 9Kiper kar kaace luumma en yi Wëël Jwøk tiere poot kärge kwanyø, ni eni ööa maal ki yi thøø. 10Køøre bäägögø adøø mïëcge.
Kanya Ö Jecu Na Nyooth Ree Jï Meeri Magdalin
(Mathiew 28:9-10; Maak 16:9-11)
11'Ba Meeri adööŋ ni cuŋŋö lak bwörö ni jwöŋö. 'Ba kanya jwöŋe ena gääŋ ni neena yi bwörö. 12Ni joot nyïïatwiet maal ariiø mo oruyö ka abïïe mo tar, ni geno pï piny jï kuna pïël dëër Jecu yie, na aciel opï kur wïïe, ni en maya kur tiete. 13Ni köge jïre, ni «?Nyijøøe, agïnaŋø ni jwøgï?»
Ni løgi ya dhaaŋŋøgø jïge, na «A jwöŋi kaper dëër Kwääya na kälge, ni kanya kïthge gø yie kuua.» 14'Ba na caan gïnögø, eni ree aløøe ni joot Jecu ni cuŋŋö. 'Ba kuue ni beeye Jecu.
15Ni kö Jecu jïre, «?Nyijøøe, agïnaŋø ni jwøgï? ?Aŋa ni cayï?»
'Ba kaa mana näk ee gø caarø ni beeye wää pwöthögøøni, ena köö jïgø, ni «Kwäärö, nee käla ïïni, caan kanya kïthï gø yie jïra, nee käla.»
16Ni kö Jecu jïre, ni «Meeri.»
Ni ö dhaaŋŋøgøøni ni put ree løk, ni kööe jïre ki dhi Ibaru, «Rabönay,» na näk tiere beeye Dïpööy.
17'Ba Jecu aköö jïre, «A kär gäämï, kiper a poot kär ci baŋ Wuuö. 'Ba ci baŋ nyïïmera ni caanï gø jïge, na ‹A cøøa baŋ Wära ni näk Wääu, ni beeye Jwøa ni näk Jwøu.› »
18Ni aac Meeri Magdalin ni caan gø jï bääŋi, ni kööe, ni «Kwäärö ajooda.» Ni køp gïïa caane jïre jïge.
Kanya Ö Jecu Na Nyooth Ree Jï Bääge
(Mathiew 28:16-20; Maak 16:14-18; Luk 24:36-49)
19'Ba dïcäŋögø na tïm pinynyi na wïthïënhö ki täk tïïc, ni dhøk odhuule mo øda en bääŋi yie ocïëgö kiper mana lwäärge ki jø Juuth, Jecu aöö ni cuŋŋe dïge, ni kööe jïge, ni «Bëët-mëër bëëde bäätu.» 20'Ba na nø caan gïnögø, ceŋŋe anyoodhe jïge ki tier-buute. Kanyøgø bääŋi yïthge amïnnö na neenge Kwäärö. 21'Ba Jecu acäŋ köö jïge, ni «Bëët-mëër bëëde bäätu. Kaa mana ö Wuue na jääŋ aani, u jääŋŋa jääŋŋö thuwø.» 22'Ba na lønye ki caan gïnögø, ena jwïëy bäätge ki jamø, ni kööe jïge, ni «Jwïëc Jwøk na en kur keere jïëyu nee ci dëëtu. 23Ni näk raac jø møøk weyu wiiø, raacge onø wec. 'Ba ni näk raac jø møøk you wii bäätge, raacge onø wii bäätge.»
Kanya Ö Jecu Na Nyooth Ree Jï Tøma
24'Ba Tøma na näk dhaanhø aciel dï bääŋi na näk apaar kurriiø, na cwøl na Acwiek, tøørø dïge kanya ö Jecu. 25'Ba acaan bääŋi møga jïre, ni «Waani Kwäärö ajootwa.»
'Ba ena köö jïge, ni «Ni näk ceŋŋe kwöra gur ki mucumääre kära joodø, ni kïtha lweeta kwör mucumääre, ni cøta cera tier-buute, aani, a ba jïëy.»
26'Ba na tïme na køør nïne abära, bääge acäŋ dwät yi øtø, ni Tøma ena dïge, no odhuuth øtø ocïëgö. 'Ba Jecu aöö ni cuŋŋe dïge, ni kööe, ni «Bëët-mëër bëëde bäätu.» 27Kanyøgø ena köö jï Tøma, «Kïth lweetï kany ni neenï ceŋŋa, ni kälï cerï ni kïthï gø tier-buuta. Kärï bëëdö ni bäŋ ŋäädhe cwïnyï, 'ba jïëyï ni ŋäädhï.»
28Ni puti ya Tøma løk jïre, «Wui, bee ï na Kwääya, ni bee ï na Jwøa.»
29Ni kö Jecu jïre, na «?Aŋø, ïïna jïëy kiper mana neenï aani? Gwïëth en jï jøøa jïëy ni ŋääthge, këël na kärge aani neenø.»
Gïna Göör Wëëlö Man Kipere
30'Ba Jecu atïïö ki ŋïïce møøk mo thööth buut bääge, mo kär göörö yi wëëlö man en. 31'Ba moi göör kaper nou jïëyu ni Jecu beeye na Krictø ni näk O Jwøk, kiper nee u jïëyu ki eni ni ŋääthu gø, nou jïtu ki kwøw ki nyeŋŋe.
Цяпер абрана:
Jøøn 20: AnyuB
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© The Bible Society of Ethiopia