Moa Tïïc Nyïïatwieli 12
12
Kanya 'Näk Jeemeth Ni Twöc Piter
1'Ba yïth nïrögø nyeya ma Eerat cere arwaak dëët jø møøk røk jø acooŋ Jwøk. 2Ni wëëk Jeemeth cöök Jøønni 'näk ko opëëllö. 3'Ba na joot gø ni jø Juuth yïthge met kiper gïna tïïe, ena cäŋ köö ni Piter mak thuwø. 'Ba gïïögø täga yïth nïr Ajwöma Mar Møga Näk Ree Bäŋ Thømmø. 4'Ba na nø mak Piter, ena kïth øt twöc, ni cïp gø ceŋ jø tøŋ mo wø kurö ni welli na aŋween-aŋween, nee koorge, ni ee cooŋø ki cwïnye ni noo tïme na køør Cäŋ Cäŋa Pööth Thøøe Yie, nee käl wøk nyïm jiy. 5Kiper manøgønø Piter awii øt twöc. 'Ba jø acooŋ Jwøk, Jwøk akwaacge døøc kipere ki cwïnyge bäre.
Kanya Ö Nyïïatwiel Maalli Na Pät Piter Øt Twöc
6'Ba dïwääna ö Eerati na bun man käl Piter wøk ka amöölla, Piter obutö yïthakic jø tøŋ ariiø, no otwöö ko oguudi ariiø, ni dïkuye ena dhi øtø ni ge koora øt twöc. 7'Ba kanyøgø nyïïatwiel maal mør mar Wuuö aput öö, ni ö tarri ni meeny yi øda bëëde yie. Ni gween Piter ki tier-buut gø ni jiec gø, ni kööe, ni «Laar ö maal!» Ni ö oguudi ni päthge piny ceŋŋe. 8Ni kö nyïïatwiel maalli manøgø jïre, ni «Røø abïïgï dëërï, ni kïthï wayï tietï.» Ni tïïc ge. Ni kö nyïïatwielli jïre, ni «Meen aleeŋŋï yiï ni lämmï køøra.» 9Ni døny wøk køør gø, ni kuue ni gïna tïïc nyïïatwiel maalli adïëri, 'ba ki baŋe ni mare lääk. 10'Ba na nø kaalge dïkuye moa dïkwøŋ ki moa en køørge, gena pïï dhi kal mana näk odhuulle nywïënyö, na en jï løø pääny. Ni ö dhi kal manøgø ni jap ree keere jïge, ni dønyge wøk, ni putge pöödhö ni ge caatha jöörögø. Ni puti ya nyïïatwiel maalli wec.
11Ni ö Piterri ni put dëëre ŋäc ni kööe, ni «Kawaane, ajooda na adïëri møn, ni Wuuö nyïïatwiel maal mare ajääŋŋe ni piem aani cer Eerat, ki luupa näk ocooŋ jø Juuthi bëët ki cwïnyge.»
12'Ba kanya ŋäc gïnögø ki cwïnye, ena aa po Meeri mii Jøønni ni wø cwøl ni Maak, kanya cuŋ jiyi yie mo thööth ni ge lämö. 13'Ba kanya dwøŋ dhi kal, nyakøø mo nyeŋŋe Rööda aö kuna neen gø. 14'Ba na ŋec dwør Piter, yie amïnnö ni put døø ni rïïŋö ni dhi kal käre jabø, ni caan gø ni Piter cuŋŋö dhi kal. 15Ni köge jïre, ni «Ïïna bøøl.» 'Ba na nieŋ ri gø ni beeye adïëri, gena köö, ni «Manøgø tïmö ni beeye nyïïatwiel maal mare.»
16'Ba Piter poot dööŋö. 'Ba na japge dhi kal, ena jootge ni thäŋ yïthge. 17'Ba Piter cere atïŋ maal ni jooga geni nee lïŋge, ni caan yi jöö mana ö Wuue na käl eni wøk øt twöc ki gø jïge. Ni kööe jïge, ni «Caannu gïn jï Jeemeth ki nyïïmëëe.» Kanyøgø ena aay ni ci kanymør.
18'Ba na tïme na amöölla, luubö mo ba thiinh apïï dëët jø tøŋ kiper na tøør Piterri. 19'Ba na cayi ya Eerati ni käre gø joodø, dïkuye atete døøc, ni cïpe ki dwøl ni ge 'näk.
Køøre Eerat aaa Judia ni pööth Cecaria, ni bëëde kunöce.
Kanya Thøw Eerati
20'Ba Eerat bëëdö no ogootø ki jø Tayar ki jø Caydan. Ni ö jøøgø baŋe bëët ni rege ege cooŋø. 'Ba na nø kwaacge Balacta na näk nyikuŋ nyeya, na jïëc marge, nyeya akwaacge kiper nee bëëtge ki bëët-mëër. Kiper poge bëënna po nyeya ma Eerat kiper caammi. 21'Ba na tïme na dïcäŋa näk ocaanø, Eerat abïïk nyec arøø dëëre, ni pï bäät wälu mare, ni cään geni. 22Ni köök jiyi bëët, ni köge, ni «Manøgø beeye dwør jwøk kiree! Patha dwør dhaanhø!» 23Ni puti ya nyïïatwiel maalli mør mar Wuuö gøøc, kiper na käre Jwøk jiemø. Ni ö dëëre ni cami twöŋi ni thøøe.
24'Ba luum Jwøk anyaay ni pälle.
25'Ba kanyøgø Barnaba ki Cøøl na thöörge tïïge, gena duuö ki yi Jerucalem, ni kuuge Jøøn ni wø cwøl ni Maak.
Цяпер абрана:
Moa Tïïc Nyïïatwieli 12: AnyuB
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© The Bible Society of Ethiopia