Ŋaha 7
7
1M bia, gbibi n yɛligu, ka chɛ ka n ni zal’ a shɛm be a suhu ni. 2Doli n ni zal’ a shɛm, ka be. Gbibi n ni wuhir’ a shɛli kaman a nimbil’ biɛlim la. 3Zaŋmi li lo a nubihi ka sabi li niŋ a suhu ni. 4Yɛlim’ yɛm, “N tizɔpaɣa n-nyɛ a.” Ka boli tɛhi’ zilima mi “N zɔsimo.” 5Di ni gu a ka chɛ pagɔrili, ka gu a ka chɛ paɣ’ zinalan’ naŋgbammalisim.
Pagɔrili yɛla
6N daa ti lihi n yiŋ’ takɔro voya ni 7n-nya tarimba, ka n daa kpahim bipola n-nya nachimbil’ so ŋun ka yɛm bɛ ni. 8O daa dolila solɔɣu m-miri paɣa maa lɔndo polo. O daa dolila soli chani o yiŋa 9zaawuni yuŋ lihaliha saha ni yuŋ zibisim saha. 10Di saha ka paɣ’ so daa tuhir’ o soli na. O daa yɛla nɛma kaman pagɔrili la, ka o lihibu mali kɔre ni kukolimahim. 11O yee daa kpɛm’ pam ka o bi zɔri vi. O daa bi ʒiini yiŋa. 12Pumpɔŋɔ ŋuna m-be palli zuɣu la, pumpɔŋɔ ŋuna m-be daa ni la. O daa kul dola lɔriga kam ni guhira. 13Ka o daa dii gbaai nachimbil’ maa m-mɔɣis’ o kpariŋ, ka lih’ o ninni ka bi zɔri vi ka yɛl’ o, 14“N daa yɛn malila sara, ka zuŋɔ n niŋ n ni daa po pɔri ni n niŋ shɛli maa. 15Dinzuɣu ka n kana pumpɔŋɔ ni n tuh’ a soli. M bo a ni nimmoo, ka ti nya a maa. 16N bɔbi n gar’ bila zali. N zaŋla Ijipti tampiɛl’ shɛŋa bɛ ni niŋ shim niŋ pa di zuɣu. 17N zaŋla tulaale shɛŋa bɛ ni booni mɛɛr mini aloosi ni sinnamɔn tulaalɛnim’ la mihi li. 18Kamina ka ti dɔni bo taba hal ka biɛɣu ti neei. Chɛ ka ti mali suhupiɛlli taba bɔbu ni. 19Dama n yidana ka yiŋa. O go n-chaŋla katiŋa. 20O zaŋ liɣiri pam mali chaŋ. O ku kuna, naɣila goli muni.” 21Ka paɣ’ maa daa zaŋ naŋgbammalisim yɛtɔɣa ŋɔ dol’ o hal ka o ti saɣi. O yɛtɔɣ’ nyaɣisa maa ka o daa zaŋ gbaag’ o. 22Ka o daa dii yiɣisi n-dol’ o kaman naɣilaa ka bɛ vɔri chani ni bɛ ti kɔrigi la bee n-nyɛ tɔŋtɔŋ kaman molifu n-zɔri chani tɔŋ ni la, 23hal ka piɛm ti nyɔɣ’ o gbaag’ o nyɔri. O ŋmanila noombil’ so ŋun zɔri chani zana ni ka bi mi ni di nyɛla din yɛn di o nyɛvili.
24M bihi, pumpɔŋɔ wummiya, gbilisimiya tibili wum n noli ni yɛtɔɣa ŋɔ. 25Miriya ka yi chɛ ka yi suhuri kpe lala paɣ’ maa ni. Miriya ka yi birigi dol’ o soli. 26Dama o luhi niriba pam n-ti ba dansi. Ka o ni ku ninvuɣ’ shɛb’ ka tariga. 27O yiŋ’ nyɛla so’ shɛli din kuni kpiimba biɛhigu shee, ka nyɛ din kuni kum shee.
Red Letter Dagbani Bible © Bible Society of Ghana, 2011