Matayo 4
4
Erirengwako lya Yesu
(Mk 1.12-13; Lk 4.1-13)
1Neryo Omũlĩmũ mwasondola Yesu omo mbwarara, eSatanĩ imulengeko. 2Neryo abere atsira akalyo emisibo makũmĩ ani nʼebiro makũmĩ ani, mwakwa enzala. 3Neryo Satanĩ oyukalenga abandu, mwasa mwamubwira ati, Wamabya uli Mugala wa Nyamuhanga, ubwire amabwe aya abye mandu. 4Nĩkwa Yesu mwamũsũbĩrya ati, Amasako akabũga ati, Omundu siendisyabyaho busana nʼobundu ĩbobwene, nĩkwa busana nʼobuli kĩnywa ekĩkalũa omo buno bwa Nyamuhanga.
5Kandi Satanĩ mwatwala Yesu yʼoko Mũyĩ Abũyĩrĩre; neryo mwamũhĩra oko litungulu lyʼeHekalũ, 6ati, Wamabya uli Mugala wa Nyamuhanga, uyiguse ahisi; kusangwa Amasako ati,
Nyamuhanga ayahamula abamalaĩka buwe busana nawe,
Basyakubagalira omo byala byabo,
Isiwahuma ekisando kyawe kyʼokwʼĩbwe.
7Yesu mwabwirayo ati, Kandi Amasako ati, Susyerenga oko Mukama Nyamuhanga wawe.
8Kandi Satanĩ mwatwala Yesu yʼoko kitwa kiri-kiri, mwamũkangya amami gosĩ wʼekihugo nʼolukengerwa lwago. 9Neryo Satanĩ mwabwira Yesu ati, Ebyosĩ ebĩ nasyakuhabyo wamanyĩkũkamira nʼerĩnyĩramya. 10Yesu mwabwirayo ati, Lũaho, uwe Satanĩ! Kusangwa Amasako ati, Wasyaramya Omukama Nyamuhanga wawe, kandi wasyamukolera ĩyowene.
11Neryo Satanĩ mwamũsĩganĩa; nĩkwa abamalaĩka mobasa nʼerikolera Yesu.
Yesu akatsũka omũbĩrĩ wuwe eGalĩlaya
(Mk 1.14-15; Lk 4.14-15)
12Neryo omugulu Yesu owa ko Yoane abĩrĩhĩrwa omo mũlĩkĩ, Yesu mwaya eGalĩlaya. 13Neryo Yesu mwalũa eNazaretĩ, mwayĩkala eKapernaũmũ, omũyĩ owali hakũhĩ nʼengetsi yʼeGalĩlaya, omo kihugo kya Zebũlũnĩ na Nafũtalĩ. 14Ekĩ kyakolawa erĩberererya ebyo mũmĩnyererĩ Ĩsaya abũga ati,
15Ekihugo kya Zebũlũnĩ, nʼekihugo kya Nafũtalĩ,
Ebwanga bwʼengetsi, eyisirya wʼeYorodanĩ,
EGalĩlaya yʼEbihanda!
16Abandu abĩkere omo mwĩrĩmya,
Mobalangira ekyakakala kinene!
Kandi busana nʼabĩkere omo kihugo nʼomo kyũtsũtsũ kyʼoluholo,
Ekyakakala kyamakoleryabo!
17Erĩtsũka oko mugulu oyo Yesu mwatsũka erĩtũlaganĩa ati, Mubindule emitima yenyũ erireka ebibi, kusangwa obwami bwʼelubula buli hakũhĩ!
Yesu akabirikira abasohĩ bani
(Mk 1.16-20; Lk 5.1-11)
18Neryo Yesu abere akalendera hakũhĩ nʼengetsi yʼeGalĩlaya, mwalangira ababiri abasubeneko, Sĩmonĩ oyukahulawa mo Petero, na Anderea, mugala wabo, ibakagusa ekĩsohĩ kyʼomo ngetsi; kusangwa babya basohĩ. 19Neryo Yesu mwabwirabo ati, Munyikwame, nage nasyabayira mo basohĩ bʼabandu. 20Neryoneryo mobasĩganĩa ebĩsohĩ byabo, mobakwama Yesu.
21Neryo mwagenda embere yo hake, mwalangira abandi babiri, Yakobo mugala wa Zebedayo, na Yoane mugala wabo. Babya omo bwato haguma na tata wabo ye Zebedayo, ibakalanda ebĩsohĩ byabo. Neryo Yesu mwabirikirabo. 22Neryo-neryo mobasĩganĩa ĩse wabo, nʼobwato, mobakwama Yesu.
Yesu akakangĩrĩraya nʼerĩlamya abakonĩ
(Lk 6.17-19)
23Kandi Yesu mwatĩmba eGalĩlaya hosĩ, erĩkangĩrĩrya omo manyũmba wabo wʼerĩhĩndanamo, nʼerĩtũlaganĩa Engulu Yowene yʼobwami, nʼerĩlamya abandu bʼobuli mũsĩndo wʼendwala, nʼobuli mũsĩndo wʼobũkonĩ omo katĩkatĩ kʼabandu. 24Neryo engulu yiwe moyatsungana omo kihugo kyosĩ kyʼeSũrĩa. Kandi mobamuletera abakonĩ bosĩ, abagalawa omo mĩsĩndo-mĩsĩndo yʼesyondwala nʼamagalĩ, nʼabali kwʼesyombĩnga, nʼabatũtsa, nʼababasĩre, nĩkwa Yesu mwalamya abosĩ. 25Nʼesyondeko nene mosyamukwama ĩbakalũa eGalĩlaya, nʼomo kihugo kyʼeMĩyĩ Ĩkũmĩ, nʼeYerũsalema, nʼe Yũdea, nʼeyisirya wʼeYorodanĩ.
Цяпер абрана:
Matayo 4: KB80
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bible in Kinandi © Bible Society of the Democratic Republic of Congo, and Bible Society of Uganda, 1980.