Папулярныя біблейскія вершы з Galácia 3

Падзяліцца

Kỹ Topẽ vỹ ẽg mỹ vĩ kónãn ke mũ vẽ, ẽg tỹ ti vĩ mranh ja to. Hã ra Cristo tóg Topẽ mỹ: “ha ag jagfy inh hã mỹ vĩ kónãn,” he ja nĩgtĩ'. Ti to tag tóg rán kỹ nĩ, ha mẽ: “ũ tỹ krunh to sa mũ ẽn mỹ tóg vĩ kónãn mũ, Topẽ ti,” he ja tóg nĩ. Hã kỹ ẽg tóg Cristo ki ge tugrĩn krenkren ke mũ.

Hã kỹ ẽg tóg tỹ jagnẽ ri ke nỹtĩ gé. Kỹ Judeu ag vỹ fóg mré tỹ jagnẽ ri ke nỹtĩ ha, kanhgág ag ke gé. Ũ camarada ag vỹ ag patrão ag ri ke nỹtĩ gé. Ag vỹ fag ri ke nỹtĩ gé. Nén ũ pir vỹ tỹ ẽg nỹtĩ, ẽg tỹ Jesus Cristo ki ge kỹ nỹtĩn kỹ.

Kỹ, ẽg tỹ tỹ Cristo mré ke nỹtĩn kỹ ẽg tóg tỹ Abraão krẽ'krẽ nỹtĩ gé sir, ẽg kar. Kỹ ẽg venh ke mũ sir, Topẽ tỹ Abraão mỹ nén to ja ẽn ti.

Topẽ tỹ Cristo hã mỹ vĩ kónãn kỹ tóg ẽg hã mỹ vĩ há han mũ sir, ti tỹ Abraão mỹ vĩ há han ja ẽn ri ke. Fóg ag mỹ tóg vĩ há han mũ, kanhgág ag mỹ ke gé, Jesus Cristo tugrĩn. Kỹ tóg ẽg mỹ ti kuprĩg jẽnẽg mũ sir, ẽg tỹ ti ki ge tugrĩn.

Hã kỹ, ẽg tỹ Topẽ tỹ vãsỹ ẽg jyvẽn mũ ẽn ki króm sór mũ ra ẽg tóg mranh tĩ. Kỹ ẽg tóg ti mỹ há tũ nỹtĩ. Hã kỹ tag tóg rán kỹ nĩ gé: “ẽg tỹ Topẽ ki ge hã to ẽg tóg ti mỹ tỹ ũn há nỹtĩ. Kỹ ẽg tóg krenkren ke mũ,” he ja tóg nĩ.