à yoa tinare ji turia dija taa tjururi macaina cʉ̃hʉ sie sehe mehne sie sehe mehne Cohamacʉ ti ño payoboriro waro sehere ño payo duhu wahcãrucua nia tiha. à jia tuaro waro Yawere yʉhdʉrʉcaina wahaa nia tiha jʉna. Ti ã yʉhdʉrʉcaina jichʉ ñʉno, Yawe sehe tó pano macaa tjururi macainare to buhiri dahreriro cjiro seheta buhiri dahre mʉjaa tiha tina cʉ̃hʉre. à jiro tina cʉ̃hʉre tinare ñʉ tuhtiina cahma wajã yʉhdʉrʉca sãa tachʉ yoa, tinare ñano dutipechʉ yoa, buhiri dahre mʉjaa tiha tinare. Ti ã ñano dutipechʉ, israe masa ñano yʉhdʉa tiha. Ti ã ñano yʉhdʉchʉ ñʉ, pja ñʉno, Yawe sehe ti pʉhtoro cjihtore bese, sõbasaa tiha tina cʉ̃hʉre. à sõno, tiro mehne tinare noano yoadoho mʉjaa tiha. To ã yoadohochʉ, tiro pʉhtoro sehe to catisinino puro to masa mehne tinare ñʉ tuhtiinare sʉho cahma wajã yʉhdʉrʉca mʉjaa tiha. To yariari baharo, pa tjuru macaina cʉ̃hʉ pari turi mʉnanota “Cohamana jira” ni, ti ño payoa masʉrine ño payo mʉjaa tiha tjoa. à ño payoa, tó pano macaa tjururi macaina cjiri ti yʉhdʉrʉcaro bui tuaro yʉhdʉrʉcaa nia tiha tina. Tina cʉ̃hʉ ti ñano jia tiare ne duhuera tiha.