Папулярныя біблейскія вершы з APOCALIPSIS 13

Падзяліцца

Miquianaya joya queasapaja'anee poanija queaja'a bacajji eyami queaquemonee enaojjojo ani nequisohuaja número. Maya dejja yamijjija número pea-ai poani ba'a: 666 jeasiime.

Jamajjeya ojjaña jiquio meshijo ba'ecacuaa Jesosaja nahue'yo pojjeamacuaaya ma enaojjojo ani nequisohua eyami queaquemonee bihuiacapoquinaje. Yahuajoneitii Eyacuiñajjija ojjaña meshi, aquianacuana pea-ai panajjimahuajo ojjaña joya Jesosaa nahuecaje'yo huisotiicuanaja bajjani etehue ejaatii poa. Joya Ovejaja Bacuaejja jayojja poani equecua'yo poajaya librojo ojaya bajjanicuana etehue ejaatiipoquiani eba'etiitiipoqui'yojji Eyahuasijje. Ma ojjaña peacuanaja eyami queaquemonee bihuiapoquijji poaja bajjani ca tehuejjima acapoa majoya.

Ma meshiquipajo ani cuayaa ojjaña meshijo ba'ecacuana jeasiimeecanaje oja ebañei mejje, ebahuajje jeasiimeecanaje emejje jeasiijjimajo. Ojjaña ca joya queaca'a etii poanicuana, joya ca'a-ama poanicuana pea-ai, ojjaña joya quea-aquianahuisonee poanicuana, joya aema'cuana pea-ai, ojjaña joya ejjeshe peajo chacochacopoquianitiicuana joya oyatii chacochacoanicuana pea-ai mahuisoya jamaya jeasiimeecanaje ojjañacuana. Jamajjeya ojjaña joya jjajeasiimeequijjima poanicuana emejje, ebahuajje pea-ai bobicuana jjeshemeejjima, quiameejjima pea-ai acanaje etii poanicuaa. Oja jeasii ma enaojjojo ani nequisohua eyami queaquemoneeja bajjanijji poanaje. Oja numerojji pea-ai poanaje.

“Ojjaña joya onaa jeanobiacaje huisotiicuana, mahuisotiiya dojocaje emejeyo ejeanobiajji. Ojjaña joya onaa baase'becaa yacuajeacaje'yo huisotiicuana, mahuisotiiya yacuajeacaje'yo cuaa. Jamajjeya ojjaña joya Eyacuiñajjija'yo poanicuana queaca'atii ba'ecapoquijji, oja esohuijotii jjashahuabaquicapoquijji” jama mimime poani Eyacuiñajjija Edojjoshahuapame.

Majoya aje eyaya jjacahuibaquiani jayojja aniya banaje bae-aiai enaquipajo ani oe eyami queaquemonee nequisohuaje etajahuasijje. Oya siete sapame huiso poanaje, diez she'aname huiso poanaje pea-ai. Oja eshe'anacuanajo copocopo corona queanahue eiya ani bapea-ainaje. Ojjaña oja sapacuana bajjanijji poanaje Eyacuiñajjija bajjanijji. Oyanei Eyacuiñajji jayojja poani jjabaquinaje. Jamaya epojji queamimishinee Eyacuiñajjiya bacani.

Eyacuiñajjija nahue'yocuananijje jjaquecuaquimajje queahuisoneecuana Jesosaja epeejji ohuaya manomeeca'yonaje. Jamajjeya oya queaca'a nequipoquinaje emeshimese ojjaña pea meshijo ba'ecacuana, ojjaña peajaajjicuana queahuesha, ojjaña pea esohuijo mimianicuana pea-ai huoojeapoquiajji epojji so'o Eyacuiñajjija esohuijo, oyatii pojjeama.

Jamaya ohuaya dejjaja ajjima'neineicuana ma pea enaojjojo ani nequisohua eyami queaquemoneeja cojjaneijo acapoquinaje Eyacuiñajjiya oya jama ameejjima pojjeama acanajeyajjejojo. Ohua dejjaja ajjima'neineicuana acaje bamajje queahuisoneecuana jiquio meshijo ba'ecacuana jjadasiameequinaje ojo. Ohuaya ma enaojjojo ani nequisohua eyami queaquemonee jayojja nemeecanaje cuana onaja bihuiapoquiajji eyacuiñajjinisho. Ma baase'becaja yacua-ajja'yo ejjajeaqui'yo jayojja nemeecanaje onaja bihuiapoquiajji. Ma enaojjojo ani nequisohua eyami queaquemonee jayojja onaja ne ebihuiajji eyacuiñajjinisho pea eyami queaquemonee meshiquipajo ani cuayaa oya sipojeacajje eshe ponananaje Eyacuiñajjiya jama ameejjima pojjeama acanajejjejojoya. Jamajjeya ma onaja ne eshe nequiya huohuicanaje ojjaña joya oja ecuioshajjajo nequi o bihuia-ajja poajecuana quecuameeca'yojji.

Ma enaojjojo ani nequisohuaja ojaya eyami queaquemonee ibia' jayojja banaje. Oya oso jayojja jeojjime poanaje. Ojaya enaba docuei ibiaja jayojja poanaje. Majoya ma shadaa-ai jayojjaa ma enaojjojo ani nequisohua eyami queaquemonee queaca'anee pomeecanaje o jayojja pea-ai enequijji queahuisocuana huoojeapoquiajji epojji.

Ma enaojjojo ani nequisohua eyami queaquemoneeya esohui queatainee acanaje Eyacuiñajjijo. Oya Eyacuiñajji jayojja poani jjabaquimajjeya queaquehuanee mimipoquinaje oya Eyacuiñajji jayojja poani oja ejjocojo enequi'yojji nisho. Cuarenta y dos ba'ime huiso Eyacuiñajjiya oya nequimeecanaje so'o queahuiso meshijo ba'ecacuana huoojeapoquiajji epojji.

Ma enaojjojo ani nequisohua eyami queaquemonee oe oja sapa eyacua-ajja'yo poanaje. Beshahuanei oya mano'yonaje majoya. Oja sapa jjajeaqui'yonaje bamajje queahuisonee meshijo ba'ecacuana jjabaneineiquicanaje ojo. Jamajjeya ojaya esohui shajja-ajjaneicanaje queahuisocuaa.

Majoya aje eyaya pea eyami queaquemonee meshiquipajo ani cuayaje bapea-ainaje. Oya she'ana beca poanaje oveja yahue jama. Oya miminaje shadaa-ai jayojja pea-ai mimime. Ohuaya ma meshiquipajje cuayaa, ma pea enaojjojo ani nequisohua eyami queaquemonee cojjaneijo nequiya ojjañacuana queaca'a huoojeacapoquinaje. Jamaya ma enaojjojo ani nequisohua eyami queaquemoneeya oya nequimeecanaje. Majoya ohuaya ma meshiquipajje cuayaa ojjañacuana enaojjojo ani nequisohua eyami queaquemonee bihuiameecapoquinaje, ma oja sapa eyacua-ajja'yo ejjajeaqui'yo poanajeya.