Папулярныя біблейскія вершы з 1 PEDRO 2

Падзяліцца

Miquianaya caca Eyacuiñajjija babaca poani. Onijje emimipoquijji ohuaya quiana bacani Emeshimeseneija'yo ojo queapame echacochacopoquijji. Ojaya'yo poani quiana ohuaya bacapoquiani pea-ai. Jama epojjiya Eyacuiñajjiya quiana nequiashiñacanaje. Majoya ohuaya quiana iyaacanaje peacuana sohuihuohuiya epoquijji achepamenee, acheca'anee Eyacuiñajji nequi ona huohuiquiya. Miquianaya yahuajo meca jayojjatii queaquehua ba'epoquiapoa. Jjeya quiana ca queaja'a eba'epoquijji epojjatii jama ohuaya pomeecanaje.

E'ejojonei ohuaya Quitohuanei ojjaña esejaya mimishicuana dojocapoa oja yamijo nequi. Acui ecuiata'apeejo ba'e oya manomeeca'yapoa cuaa mimishi eseja yamijo nequi queaca'atii epo poanijje, e-esemesetii enequitiipoqui poanijje. Ese queaja'a eyacua eba'epoqui'yojji Eyacuiñajjijo oya mano'yapoa. Jamajjeya oya queaneenee ba'yapoa ese mimishima'yo Eyacuiñajjija ebajjijo. Yahuajo miquianaya ovejacuana ecuaquisho jama ebionei ba'epoquiapoa sohuima'nei queaquehua. Jjeya quiana ca Quitoque poeyanaje ojo jjashahuabaqui'yomajje. Ohuaya quiana jaahuanacapoquiani, nahuecapoquiani pea-ai joya ecua ovejajaahuanajji poanicuaa ovejacuana acani jamaya.

Yahuajo quiana Eyacuiñajjija pojjeama ba'epoquiapoa. Jjeya ca quiana ca ojaya'yo poani. Yahuajo quiana queayenonee ba'epoquiapoa ojaya asahuajjima. Jjeya quiana ca ohuaya ba'emeesahuacapoquiani, queapame acapoquiani quiana ojayanei ejjashahuabaquijjijo.

Joya ecua ebacuasho'i jjeyanei cuayaa oja naeja tojjona' ishineineisa-acani jama saneineimeya Eyacuiñajjija esohui acue. Oja esohui bobicuana jama queaca'a etiipoquijji Eyacuiñajjijo. Majoya quiana queaja'a ba'epoquije oja esohuijo apoa epo etiica'ajji.

Ecue dohuecuana jjo'icuana, ecuea quiana queajeanee poani, jamajjeya jiquio esohui huohuiaña. Eseya jiquio meshijotii eba'etiipoquijji pojjeama poaje. Jiquio ecua jaajji pea queahuesha nequi iyehuiso cahuime aniya poeani, jamaya oe jjabaquicue. Cua miquianaja eyamiya saneineicani queamimishi epojji cajaa acue. A'a majoya queamimishi jjapomeequijji. Comaaya miquianaja esapadojjo queaquehua pomeecaje. Jesosaja epeejji pojjeamacuananijje pea-ai oe queapame ba'epoquicue. Jjeya pojja'a miquianajo queatainee mimiani cuana, jjaniñebaquiani queahuiso miquianaya queamimishi poani poso bamajje. Majoya miquianaya quenequenejjima ani queapametii ba'epoquiani bamajje Eyacuiñajji bihuiapea-aicaje cuaa quijje Eyacuiñajjija ojjañacuanaja mimishi huohui'yojji epojja apoa poajo.

Miquianaya oya jayojja pea-aiya meicuana eshe jayojja poani Eyacuiñajjija equi-aijo eiya ani. Ma equiya oja Edojjoshahuapameya iyacapoquiani. Eseya Eyacuiñajjija equi-ai jayojja pea-ai poani o anipoquijji. Eyacuiñajjiya quiana bapea-aicani ojo echacochacopoquijji. Ma ecua yahuajo oja equi-aijo chacochacopoquiani dejjacuaa ehuonecuana enaa jehui'yo quiacapoquiapoa jama pea-ai epojjiya ohuaya quiana bacani. Miquianajaya ca jjeya ehuonecuana quia'yoajja. Miquianaja eyami ca quiaa ca oe quiaña ojo queaja'a eba'epoquijji. Miquianaya e'ejojonei o bihuiajji sohuicuayani, onijje mimipea-aiani. Majoya Eyacuiñajji esejo queabihuinee poani Jesosa Quitoja bajjanijo ese jama sohuicuayame poani, onijje mimiani pea-ai shajja-ajjamajje.

Jamajjeya quiaa miquianaja ejjashahuabaquijji queamimishi epojji cajaa acue, jeajeacue. A'a oe peacuanajo siajje pojji. A'a oe Eyacuiñajjija epeejji jayojja pojji peacuanaja miquiana ebajji, e'ejojonei oe ba'epoquicue. A'a peaja aquianacuana jeabajji, a'a majotii jjashahuabaquijji. A'a oe peajo jjaniñebaquijji. Jama ca ba'eca-ajja Jesosaja epeejji.

Emeshimesenei nequiyasijje quiana oe jjanequichipiquicue. Oya mei queaquemo nequi jama, ojjañacuana eshe pomeejji poani. Ma ecua yahuajonei dejjacuaa equi iyajji oe mei queaquemo cajaa acapoa, jama pea-aiya Emeshimesenei acapoa cuaa o sapo-ajjaajjejojo. Jamatiiya oya Eyacuiñajjiya babacacapoa, queanahuenee bacapoa.

Queapame quiana oe ba'epoquicue Eyacuiñajjija'yo. Mimishi emiquianamesetii pojjeama po'yonaje, jamajjeya queabihui ba'epoquicue. A'a jama jjashahuabaquime pojji ba'a: “Bacue, eya Eyacuiñajjija'yo poani oja nahue'yo, jamajje eyaya cua eya asa-aña jamatii queamimishi epojji apoquiaje.” Chojja, eseya jama poca-ajja. Eyacuiñajjijo queapame echacochacopoquijji caca oe jama jjabaquicajji.

Eyacuiñajjiya quiana ojo queaja'anee ba'emeesa-acani. Majoya miquianaya jama poani bamajje joya o sapo-ajjanei poanicuanaja quiana queatai eniñebajji pojjeama poaje.