Папулярныя біблейскія вершы з Efes 4

Падзяліцца

Mal keke mihetahos min kami ka mihetie lat enmahisien min kami eris. Mihelele hetahos eris en kami hesuval koa Ahi lele tahos eris en kami ven tounah keil koa Kristo mumoni tuai.

Lisenges, mihesakin rendemien onami heha netan ka sakien keil onami hememerau enges. Mihoumoni hetahos min kami eris hetal min envatien ka rendemien onami hetaveah.

Minasontei selusien keil koa tisa, ka mihesa kesi min keil more selusien keil ten kataunien koa hetie lat more envatien onen Ahi. Hesakini, navong milesi mal keke mivoumoni, mihesan more selusien koa kilea vasakin koakeil alonge, rendemien one hemai hekeih tamun.

Sakini, mihelokovein sakien tatisa keil ekek. Minandemtei natisa en kami eris, minavuroh kattei kami, ka minasontei selusien takeih naha kat kami. Minavaetei natal min kami, minaselus karentei kami, ka minoumontei tounah sav keil min kami natal min rendemien tatisa.

Mal keke mihevuroh navong miles meatin tai mul mum tisa, ka mihelekat revi keke vurohien onami nasakintei kami minamot en tisaen. Ka mihekalah, mihetalimal eni helamu en avong koa meteiai hehita henu. Hesakini, mihersantei ahho min Temat keke valamun kami mivousil sise onen ten tisaen.

Avisein kami keke mihelokovein moulien matu onami hetal min sakien tatisa keil teni, hesuval koa kami mikulat musi eisin keil ka misoni eva. Veni, en avong enek, kami miluvos kami eris mivit tounah keil koa avemi en vati tahos imok. Ka tounah keil enek amul avou lin moulien onami enges. Avisein kami keke mihemaen Ahi hehiles tinomi neim ka rendemien onami, ka hesakin kami mihemai mihehi heite hau. Ka avisein kami keke mihekur sakien keil tetahos ten moulien hau onami hesuval koa mimul mimusin en eisin hau tai koa tahos vis tahos imok. Sakini, mal imok keke sakien keil onami hetie lati keke moulien hau koa Ahi sani min kami vi votut ka mal imok, suval koa kei varei vi votut ka mal imok.

Ninin Votut mumon kami mimai mivi vangi meatin tas tuai. Sakini, mihesak visi en sise vasi keil keke kami miheto vituai en tomat.

Ka Kristo san “more sanien keil” min meatin keil onen keke tei keil imai ihi eiloheh keil, tei imai ihi provet keil ten avong kosa, tei ihitehiten more longlongien, ka tei keil ilosil kat revi vangi Kristin keil ka ihisein revi keil. Kristo san more sanien keil min meatin keil onen ekek keke vasak mesein Kristin vasi keil avoumon more umen vakataun mesav keil eni. En sise enek, Sios, koa vi aven Kristo, hemai hekeih tamun en demkatien. Sakini, koakeil ten Sios imai vituai keke ilea Natin Ahi koa aling demkatien one eni, imai imatu revi en demkatien one, ka imoul en usite vasi keil heha vio … imai imal vasi hesuval Kristo enges.

Sakini, ronasuvaltei mun titiali keil en demkatien orer koa akalah avakur anatin en hihiseien sav vasi keil koa amul umai. Ronasuvaltei vot tai koa mules muloh kalkali navong eang sav keil umai ka amuh kati. Ronamaentei meatin keil taluvosien anamai analuvos ir natal min selusien keil one koa kas. Vuo, hermukteinek. Ir reheselus usil anatinien onen Ahi ka rehehitehiteni hetal min sakien ten envatien. Hesakini, rehemai rehematu revi en usite vasi keil ka rehemai rehesuval Kristo koa vi Avat ten Sios onen.