मत्ती 20
20
ईसु अंगुरेन वाड़ीन दाहड़क्यान दाखलु दीन सीकाड़े
1सरग वाळा भगवानेन राज तीना किरसाणेन तसों छे, चु तेरी अंगुरेन वाड़ी मां दाहड़क्या लागाड़ने करीन संदारे एगुत घर सी नीकळ्यु। 2चु दाहड़क्या काजे चांदीन एक रुप्या मां दाहड़की राखलु, ने तीनुक तेरी अंगुरेन वाड़ी मां मकल्यु। 3अळतेन चु नव बजेन नीकळीन दीसरा माणसे काजे हाटे मां रीकामा उबा हय रवला देखीन। 4तीनुक कह्यु, तुहुंं बी मारी अंगुरेन वाड़ी मां जावु, मे तुहुंंक वारु दाहड़की आपीस। 5ने चे बी वाड़ी मां काम करने करीन जाती रया, अळतेन चु बारे बजे ने तीनेक बजे खयड़े नीकळीन असुत दाहड़क्या हेरने करीन गुयु। 6अळतेन चु पांचेक बजे अळी खयड़े नीकळ्यु चां दीसराक अळी उबा हय रवला देखीन तीनुक कह्यु, “तुहुंं काहा जां दाहड़ु भरीन रीकामा उबा हय रया।” 7चे तीना काजे कह्या, हामुक काहनु बी दाहड़की नी लागाड़्यु करीन हामु जां उबा हय रया। चु तीनु काजे कह्यु, तुहुंं बी मारी अंगुरेन वाड़ी मां काम करने जावु।
8सांती वेळाय अंगुरेन वाड़ीन मालीक, आपसा मुनीम सी कह्यु, दाहड़क्या काजे बुलायन लाव पछेन आवणे वाळा सी लागाड़ीन पेहल आवणेवाळा लग, आखाक दाहड़की आप दे। 9जत्यार चे आया, ती चे पांच बजे कामे लागला, ती चु मुनीम तीनुक काजे चांदीन एकेक रुप्यु आप्यु। 10जत्यार चे पेहल दाहाड़क्या आवला, चे असा समजी गुया की हामुक अदुस आपसे, बाकुन चु तीनुक बी चांदीन एकेक रुप्युत आप्यु। 11जत्यार पयस्या लीन चे खेतेन मालीक पर कुर-कुर करने बाजी गुया, 12चे कह्या जे पछला ते एकतु घंटु काम कर्या, ने तेबी तु तीनुक हामरे बराबर दाहड़की आप्यु, ने चे दाहड़ु भरीन भार हाकल्या ने तप काजे झेल्या? 13तींद्रे मायन एक असु जपाप आप्यु, ए दुस्त, मे तारे सी काय बी बयमानी नी करो, मे तुसेक दाहड़ान दाहड़की चांदीन एक रुप्यु आपीस करीन तीयार नी हयु? 14ज्य तारो छे, चो हाकलीन जाती रव; मारी मरजी असी छे, की जतरो तुसे आखो आप्यु ततरोत हीना पछळ आवला काजे बी आपो। 15काय ज्य सय नी हय काय मे मारा पयस्या सी ज्य चाहो चो करो? तु मारी भलाय देखीन मार पर काहा कुहराय रयु? 16हीनी रीती सी जे हय अगळ छे, चे पछळ हय जासे; ने जे पछळ छे, “चे अगळ हय जासे।”
तेरे मरनेन बारामां ईसु तीसरी कावा अघी सी आवणे वाळी वात बताड़े
(मरकुस 10:32-34; लुका 18:31-34)
17ईसु यरुसलेम सहरेन वाट्ये अगु जाणे बाजी रवलु। ती चु बारे चेला काजे अथु ली जाय्न तीनुक कह्यु, 18“देखु, हामु यरुसलेम सहर मां जाणे बाजी रया; ने माणसेन पुर्यु मुख्या पुजारान ने यहुदी नीयमेन मास्तर्या हात मां धराय जासे, ने चे तीना काजे मारनेन डंड सामळावसे। 19ने चे तीना काजे नी-यहुदी माणसेन हात मां आपसे, की चे तीना काजे हासी मां उडाड़से ने सपाटा देसे ने कुरुस पर चड़ावसे, ने चु तीन दाहड़ाम मर्या-सर्याम सी जीवतु हय जासे।”
एक माय लीलघाये
(मरकुस 10:35-45)
20तत्यार जब्दीन पुर्यान माय, आपणा पुर्या काजे साते लीन ईसु धड़े आवीन आंधी, ने तेरे सी थुड़ोक मांगणे बाजी गुय।
21ईसु तीनीक पुछ्यु, “तुसेक काय चाहजे।”
ची कय, “जे मारा दुय पुर्या छे। तु तारा राज मां ईनु मायन एक तारे जेवड़्या हात भीणी ने एक तारे डाखर्या हात भीणी बसणेन हक आपजी।”
22ईसु जपाप आप्यु, “तु नी जाणु की काय मांग रय। जु मे दुखेन पीयालु मे पीणेवाळु छे, तुहुंं तीना दुखेन पीयाला काजे पी लेसु काय?” चे तीना काजे कह्या तु कह्यु तसोत हामु करसु।
23तत्यार ईसु तीनुक कह्यु, “तुहुंं मारु कटवरु ते पीसु, बाकुन मारे जेवड़्ये ने डाखर्ये हात मां काहानाक बी बठाड़नु मारो काम नी हय, बाकुन हींद्रे वाटे मारा बास भीणी सी तीयार करलो छे।”
24ज्य सामळीन दस चेला तीनु दुय संगा भायस पर रीसाय पड़्या। 25ईसु आपसा चेला काजे धड़े बुलायन कह्यु, “तुहुंं जाणु की नी-यहुदी राजा हींद्रे पर राज करे; ने जे मटला छे, चे हींद्रे पर हक जमाड़े। 26बाकुन तुंद्रे मां असला हकेन कायदु नी रहणु चाहजे; बाकुन जु कुय तुंद्रे मां मटा हवणे हींडे चु तुंद्रे मां पावर्यु बणसे। 27ने चु तुंद्रे मां मुख्यु बणने हींडे, चु तुंद्रु आखान पावर्यु बणसे। 28काहाकी माणसेन पुर्यु; ईनी कळी मां आपसी चाकरी कराड़ने नी, बाकुन आपसुत चाकरी करने, ने बेसका जणान जीव काजे छुड़ावने करीन आवलु छे।”
ईसु दुय आंदळा काजे वारु करे
(मरकुस 10:46-52; लुका 18:35-43)
29जत्यार चे यरीहो सहरेम सी नीकळीन जाणे बाजी रवला, ती माणसेन एक मट्लु टुळु ईसु पछळ चाल पड़्यु। 30ने चां सयड़क धड़े दुय आंदळा, जे बठला हतला, जत्यार चे जो सामळ्या की ईसु जाणे बाजी रवलु, ती चे आयड़ी-आयड़ीन कह्वणे बाजी गुया “ए मालीक, दावुदेन अवल्यात, हामरे पर दया कर।”
31माणसे तीनु आंदळा काजे हुगा हय रवु; करीन तीनुक लड़्या, बाकुन अळी बी आयड़ीन कह्या, “ए मालीक दावुदेन अवल्यात, हामरे पर दया कर।”
32ईसु हुबु हयन तीनुक बुलायु ने कह्यु, “तुहुंंक काय चाहजे?” मे तुंद्रे वाटे करो। 33चे कह्या “ए मालीक, हामरा डुळा उघड़ी जाणु चाहजे।”
34ईसु काजे तींद्रे पर दया आय तींद्रा डुळा धर्यु ने चे तत्यारुत देखणे बाजी गुया; ने ईसु पछळ#20:34 पिछे चाल पड़्या।
المحددات الحالية:
मत्ती 20: BSP25
تمييز النص
شارك
قارن
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
The Bhilali Bible ©The Word for the World International and Bhilali Bhasha Samiti, Warvani, (M.P.) 2025.
